އީރާނަށް އެމެރިކާގެ ހަމަލާ ދިނުން އޮތީ ވަރަށް ގާތުގައި ކަމަށް އިޒްރޭލުގެ އޮފިޝަލަކު ހާމަ ކޮށްފި
އީރާނުގެ ނިއުކްލިއާ މައްސަލައިގައި އެމެރިކާއާއެކު އެއްބަސްވުމަކަށް ނާދެވިއްޖެނަމަ، އެ ގައުމާ ދެކޮޅަށް އަސްކަރީ ހަމަލާއެއް ދިނުމުގެ އަމުރު ނެރުއްވުމަށް ރައީސް ޑޮނަލްޑް ޓްރަމްޕް ހުންނެވީ ތައްޔާރަށް. މި ނުރައްކާތެރި ދަނޑިވަޅުގައި ދެ ގައުމުގެ މެދުގައި މަޝްވަރާތަކުގެ އާ ބުރެއް ބޭއްވުމަށް ތައްޔާރުވަމުންދާއިރު، ކުރިމަތިވެދާނެ ކޮންމެ ހާލަތަކަށްވެސް އިޒްރޭލުން އޮތީ ތައްޔާރަށް ކަމަށް އެ ގައުމުން ވަނީ ބުނެފައި. އީރާނުން އާ ހުށަހެޅުންތަކެއް ހުށަހަޅަން މަސައްކަތް ކުރި ނަމަވެސް، މި މަޝްވަރާތަކުން އެދެވޭ ނަތީޖާއެއް ނުކުމެދާނެ ކަމާމެދު ޑިޕްލޮމެޓިކް ދާއިރާތަކުން ޝައްކު އުފައްދާ.
އީރާނުގެ އިސްލާމީ އިންގިލާބަށް 47 އަހަރު ފުރުން ފާހަގަކުރުމަށް 2026 ވަނަ އަހަރުގެ ފެބްރުއަރީ މަހުގެ 11 ވަނަ ދުވަހު އެ ގައުމުގެ ވެރިރަށް ތެހެރާންގައި ބޭއްވި ހަރަކާތްތަކުގެ ތެރެއިން، ދައްކާލުމަށް ބަހައްޓާފައި ހުރި މިސައިލެއްގެ ކައިރީގައި އީރާނުގެ ދިދަ ވިހުރެނީ. | ވޯނާ
އެމެރިކާއިން އީރާނަށް ދޭން އުޅޭ ހަމަލާ "ވަރަށް ބޮޑަށް ގާތްވެފައިވާ" ކަމަށް އިޒްރޭލަކު އޮފިޝަލަކާ ހަވާލާދީ އިޒްރޭލުގެ ނޫހެއް ކަމަށްވާ "ޔެދިއޮތް އަހްރޮނޮތް" އިން އަންގާރަ ދުވަހު ބުނެފި އެވެ.
ފާއިތުވި ދުވަސްތަކުގައި އެމެރިކާގެ ރައީސް ޑޮނަލްޑް ޓްރަމްޕާ ވާހަކަދެއްކެވި މަސްދަރުތަކާ ހަވާލާދީ އެ ނޫހުން ރިޕޯޓްކޮށްފައިވާ ގޮތުގައި، އީރާނާ ދެކޮޅަށް އަސްކަރީ ހަމަލާއެއް ދިނުމުގެ އަމުރު ނެރުއްވުމަށް ރައީސް ޓްރަމްޕް ހުންނެވީ ތައްޔާރަށެވެ.
މިކަމާ ގުޅޭގޮތުން އިޒްރޭލުގެ "ޗެނަލް 12" އަށް މަސްދަރުތަކުން މައުލޫމާތު ދީފައިވާ ގޮތުގައި، އިތުރު ފްރަންޓްތަކެއް ނުވަތަ ހަނގުރާމައިގެ އާ ދޮރުތަކެއް ހުޅުވިގެންދާނެ ފަދަ ހާލަތަކަށް ތައްޔާރުވުމުގެ މަސައްކަތް ތެލް އަވީވުން މިހާރު ވަނީ ކޮށް ނިންމާފައެވެ.
މީގެ ކުރިން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވީ، ތެލް އަވީވުން މިހާރު ހޭދަކުރަމުންދަނީ ވަރަށް ހައްސާސް ދުވަސްތަކެއް ކަމަށާއި، ކުރިމަތިވެދާނެ ކޮންމެ ފަދަ ހާލަތަކަށްވެސް އޭނާގެ ސަރުކާރު އޮތީ ތައްޔާރަށް ކަމަށެވެ.
ރައީސް ޓްރަމްޕްގެ "ޓްރޫތް ސޯޝަލް" ޕްލެޓްފޯމުގައި ކުރެއްވި ޕޯސްޓެއްގައި ވިދާޅުވީ، އީރާނުގެ ނިއުކްލިއާ މަޝްރޫއާ ގުޅޭގޮތުން އެމެރިކާއާއެކު އެއްބަސްވުމަކަށް ނާދެވިއްޖެނަމަ، އެއީ އީރާނަށް ވަރަށް ހިތްދަތި ދުވަހަކަށް ވާނެ ކަމަށެވެ.
އީރާނާ ދެކޮޅަށް ފުޅާ ދާއިރާއެއްގައި އަސްކަރީ އޮޕަރޭޝަނެއް ހިންގުމުގެ ނުރައްކަލާ މެދު ޖޮއިންޓް ޗީފްސް އޮފް ސްޓާފްގެ ޗެއާމަން ޑެން ކޭން އިންޒާރު ދެއްވި ކަމަށް ބުނާ ރިޕޯޓްތައް ރައީސް ޓްރަމްޕް ވަނީ ދޮގުކުރައްވާފައެވެ. އަދި ކުރިމަތިލުމެއް ހިނގައިފިނަމަ، ތެހެރާން "ވަރަށް ފަސޭހައިން" ބަލިކުރުމުގެ ގާބިލްކަން އެމެރިކާއަށް ލިބިގެންވާ ކަމަށް އެމަނިކުފާނު ފާހަގަކުރެއްވިއެވެ.
"އީރާނާއެކު ހަނގުރާމައަކަށް ދިއުމާ ޖެނެރަލް ޑެނިއަލް ކޭން (ބައެއް ފަހަރު ރާޒިންގެ ނަމުން ނިސްބަތްކުރެވޭ) ދެކޮޅު ކަމަށް ބުނެ ފޭކް ނިއުސް މީޑިއާތަކުން ގިނަ ވާހަކަތަކެއް ދަނީ ފަތުރަމުން،" ޓްރޫތް ސޯޝަލްގައި ޓްރަމްޕް ލިޔުއްވާފައިވެއެވެ. "މި ވާހަކަތަކަކީ އެއްވެސް އަސާސެއް ނެތް، 100 އިންސައްތަ ދޮގު ވާހަކަތަކެއް."
މި ދަނޑިވަޅުގައި، އެމެރިކާއާއި އީރާނާ ދެމެދު ބާއްވާ މަޝްވަރާތަކުގެ ތިންވަނަ ބުރު ބުރާސްފަތި ދުވަހު ޖެނީވާގައި ބޭއްވުމަށް ވަނީ ހަމަޖެހިފައެވެ. ދެ ގައުމުގެ ދެމެދުގައި މަސްރަހު ގޯސްވެފައިވާ މި ދަނޑިވަޅުގައި ބާއްވާ މި ބުރަކީ މިހާތަނަށް ބޭއްވޭ އެންމެ ހައްސާސް ބުރުގެ ގޮތުގައި ވަނީ ސިފަކޮށްފައެވެ.
ރިޕޯޓްތައް ބުނާގޮތުން، އޮމާންގެ ފޮރިން މިނިސްޓަރު ބަދުރު އަލް-ބުސައިދީ މެދުވެރިކޮށް އީރާނުން އާ ހުށަހެޅުމެއް ހުށަހެޅުމަށް ދަނީ މަސައްކަތް ކުރަމުންނެވެ. ނަމަވެސް، އިޒްރޭލުގެ "އިޒްރޭލް ހަޔޯމް" ނޫހުން ރިޕޯޓްކޮށްފައިވާ ގޮތުގައި، މަޝްވަރާތަކުގެ މައުލޫމާތު އެނގޭ ޑިޕްލޮމެޓިކް މަސްދަރުތަކުން ވަނީ އީރާނުގެ ހުށަހެޅުމުގައި ކުރީގެ ހުށަހެޅުންތަކާ އަޅާބަލާއިރު މާބޮޑު ބަދަލެއް ހުންނާނެ ކަމާމެދު ޝައްކު ކަމަށް ބުނެފަ އެވެ. އަދި ކުރިއަށް އޮތް ބުރުގައި އެދެވޭ ކުރިއެރުމެއް ލިބޭނެ ކަމަށް ނުބެލެވޭ ކަމަށްވެސް އެ މަސްދަރުތަކުން ބުނެ އެވެ.
