މާލޭގެ މަގުތަކުގައި ނަންބޯޑު ހަރުކުރުމާ ގުޅޭ ގޮތުން ޑެޕިއުޓީ މޭޔަރ އަރީޝް އާ ހަވާލާދީ ފަތުރަމުންދަނީ ދޮގު ހަބަރެއް: މާލެ ސިޓީ ކައުންސިލް

މާލެ ސިޓީ ކައުންސިލުން ފާސްނުކޮށް މާލެ އާއި ވިލިމާލޭގެ މަގުތަކުގައި ނަންބޯޑު ޖެހުމަށް 25 މިލިއަން ރުފިޔާ އަށް ބަޔަކާ ހަވާލުކުރިކަމަށް މާލެ ސިޓީ ކައުންސިލްގެ ޑެޕިއުޓީ މޭޔަރ މުހައްމަދު އަރީޝް އާ ހަވާލާދީ ބައެއް މީޑިއާ ތަކުގައި ފަތުރަމުންދާ ހަބަރަކީ ކަނޑައެޅިގެން ދޮގެއް ކަމަށް މާލެ ސިޓީ ކައުންސިލުން ބުނެފި އެވެ. 

މިކަމާ ގުޅިގެން ބުރާސްފަތި ދުވަހު މާލެ ސިޓީ ކައުންސިލުން ނެރުނު ނޫސް ބަޔާނެއްގައި ބުނީ މާލޭ މަގުތަކުގައި ނަންބޯޑު ހަރުކުރުމަކީ މެއި 2021 ގައި އެ ކައުންސިލުން ފާސްކޮށްފައިވާ ސްޓްރެޖިކް އެކްޝަން ޕްލޭންގައި ބަޔާން ކޮށްފައިވާ މަސައްކަތެއް ކަމަށެވެ. އަދި މި މަސައްކަތް ކުރިޔަށް ގެންދަނީ 7 އޮކްޓޯބަރު 2025 ގައި ގެޒެޓްގައި އިއުލާނުކޮށް، 19 އޮކްޓޯބަރު 2025 ގައި 7 ފަރާތަކުން ކުރިމަތިލައި، އޭގެ ތެރެއިން އެންމެ ގިނަ  މާކްސް ލިބުނު ފަރާތުން ހުށަހަޅާފައިވާ އަގުކަމުގައިވާ 3،988،290.06 (ތިން މިލިއަން ނުވަލައްކަ އައްޑިހަ އައްހާސް ދުއިސައްތަ ނުވަދިހަ ރުފިޔާ ނުވަދިހަ ހަ ލާރި) އަށް ކަމަށެވެ. 

ޑެޕއުޓީ މޭޔަރ އަރީޝް އާ ހަވާލާދީ ރިޕޯޓް ކޮށްފައިވާ 25 މިލިއަން ރުފިޔާގެ އަދަދަކީ މި މަސައްކަތަށް ކުރިމަތިލި 7 ފަރާތުން ހުށަހެޅި އަގުތަކުގެ ޖުމްލަ އަދަދު ކަން ފާހަގަކޮށް ސިޓީ ކައުންސިލުން ބުނީ، މި މަސައްކަތަކީ 7 ކުންފުންޏަކާ ހަވާލުކޮށްގެން ހިންގާ މަސައްކަތެއް ނޫން ކަމަށެވެ.

ޑެޕިއުޓީ މޭޔަރ އަރީޝް، މާލެ ސިޓީ ކައުންސިލާއި ކައުންސިލްގެ މުވައްޒަފުން ބަދުނާމުވާގޮތަށް ހަގީގަތާ ހިލާފު މައުލޫމާތު ދީފައިވުމުން އެކަމުގެ ކަންބޮޑުވުން ސިޓީ ކައުންސިލުން ވަނީ ފާޅުކޮށްފަ އެވެ. އަދި އަރީޝް ކައުންސިލްގެ ޖަލްސާތަކަށް ފަރުވާތެރިކަމާއެކު ގަވާއިދުން ހާޒިރުވެ، އެކަށީގެންވާ ގޮތުގައި ކައުންސިލްގެ މަސައްކަތުގަ ބައިވެރިވެ ވަޑައިގަންނަވާނަމަ ކަން ހިނގާގޮތް ރަނގަޅަށް ސާފުވާނެކަމަށް ކައުންސިލުން ދެކޭކަމަށް ބަޔާނުގައި ބުނެފައިވެ އެވެ. 

މީގެ އިތުރުން ނޫސްތަކުން ހަބަރު ގެނެސްދޭ އިރު ކަމާބެހޭ ސައްހަ މައުލޫމާތު އިތުބާރު ހުރި މަސްދަރުތަކުން ސާފުކުރެއްވުމުގު މުހިންމުކަން މާލެ ސިޓީ ކައުންސިލްގެ ބަޔާނުގައި ވަނީ ފާހަގަ ކުރައްވާފަ އެވެ.