މުއިއްޒުބޭއެވެ. މި ރޯދަމަހު ލޮލަށް ބޮލަށް ގޮވަން ނުހަދާށެވެ!

މުއިއްޒުބޭއަށް.

ލާމަރުކަޒީ ދުވަހުގެ މުނާސަބަތުގެ ތަހުނިޔާއާއި ސަނާ ފަތިވަރު ފަތިފައްޗަށް އަމުނަ އަމުނާފައި ފޮނުވާކަށް ނެތީމެވެ.

މުއިއްޒުބޭއެވެ. ހަމަ ހައިރާންވެ އަންތަރީސް ވެއްޖެއެވެ. ކޮންމެ ކަމެއްގައިވެސް ކަންނުވެ މެޑެއްޔެއް ޖެހޭތޯ ފޫގަޅުއްވައިގެން ތިޔަ އުޅުއްވަނީ އަމަށަކު ވަރަކަށް ނޫން ވިއްޔާއެވެ. ރެކޯޑް ހެއްދޭތޯ މީހުން އުޅެނީ ކަންކަން ކޮށްގެންނެވެ. އެކަމުގައިވެސް އަރުވާ ޖައްސަވާފައި ތިޔަވަޑައިގަން ނަވަނީ ދިމާ އިދިކޮޅަށެވެ.

ދިއުޅި ދިގުކުރާކަށް ހާސަރުތަކެއް މަށަކު ނުދަމާނަމެވެ. ލާމަރުކަޒީ ދުވަހޭ ކިޔައިގެން ކްރެޑިޓް ނަގަން ތިޔަ އުޅުއްވި ގޮތުން ލައްކަ މީހުން ލައްކަ ކުދި އެބަކިޔައެވެ. މުއްޒުބޭ ތިޔަ ފޮނުއްވި ޚިތާބެއްގައި ދައްކަވާފައި އެހެރަ އެހެރަ ވާހަކަތައް ފެނިފައި މަގޭ ގާތައްވެސް އަންނަނީކީ އަމަށަކު ހިންޏެއް ނޫނެވެ. ހަމަގައިމުވެސް މީހުން އެވާހަކަތައް ކިޔާފައި އެކިޔާހާ އެއްޗެހި ކިޔާކަށް މަށަކަށްވާ ލާހިކު ކުޅަދާނައެއް ނޫނެވެ.

މުއްޒުބޭއެވެ. ލާމަރުކަޒީ ނިޒާމްގެ ބައްޕައަށް ނޫނީ ޗެމްޕިއަންއަކީ ތިމަންނާއޭ ބުނާފަދަ ގޮތަކަށް ތިޔަ ވާހަކަތައް ތިޔަގޮތައް ދެއްކެވިއިރު އެހެންމީހުންވެސް އުޅޭނޭ ހަމަ ހިތްޕުޅަށްވެސް ނޭރީ ދެއްތޯއެވެ.

މުއިއްޒުބޭއެވެ. ތިޔަވިދާޅުވަނީ މި ވޭތުވި ދެ އަހަރު ދުވަހު ލާމަރުމަޒީ ޚިދުމަތްތައް ފުޅާކުރުމަށް އިތުރު ބާރާއި، ރައްޔިތުންގެ އިތުބާރު ހޯދައިދިނުމަށް ބޮޑެތި މަސައްކަތްތަކެއް ކުރެވިފައިވާ ކަމަށެވެ. އެކަމަކު ކައުންސިލަރުންނާއި ކަމުގެ މާހިރުން ބުނަމުން އެދަނީ މިދިޔަ ދެއަހަރަކީ އެންމެބޮޑު ގޮންޖެހުމެއް ކުރިމަތިވި ދެއަހަރު ކަމަށެވެ. ގާނޫންތަކަށް ބަދަލު ގެނެސްގެން ކައުންސިލްތަކުގެ ބާރުތައް ކަނޑުވާލުމުގައި އަރާހުރި ދެއަހަރު ކަމަށެވެ.

މުއިއްޒުބޭއެވެ. އަދި ކައުންސިލްތަކަށް އާމްދަނީ ލިބޭނެ މަގުތައް އިތުރަށް ފަހިކޮށްދިނުމަށް ލައްކަ ކަންކަން ކުރެއްވިކަމަށް ވިދާލުވާއިރު ގާނޫނުގައި ބުނާ އަދަދަށްވެސް ފައިސާ ނުދޭން ހިފެހެއްޓީ މިދިޔަ ދެއަހަރުގެ ތެރޭގައެވެ. އިޚްތިސާސް ތެރޭގައި ހިމެނޭ ތަންތައް ހިތުހުރި ގޮތަކަށް ބަދަލު ގެންނަމުންވެސް ތިޔަ ގެންދަވަނީ މިހިނގާ ދިޔަ ދެއަހަރުގެ ތެރޭގައެވެ.

މުއިއްޒުބޭއެވެ. ކައުންސިލަރުންގެ ބާރު ކަނޑުވާލައި އެވެރިންނަށް ބިރު ދައްކައި ހަންމަތަކުރާން އެމީހުންގެ މައްޗަށް މިނިސްޓްރީއެއް އުފައްދައި އެލްޖީއޭ އަތަށް މަހާލީމާ ދެން އޭގެ ބަދަލުގައި ލާމަރުކަޒީގެ ބައްޕައޭ ބުނާނީ ކިހިނެއް ހެއްޔެވެ.

މުއްޒުބޭއެވެ ކައުންސިލްތަކަށް ބިރުދައްކައި ފިކުރު ދިމާ ނުވާ ކައުންސިލަރުންގެ ސިޓީތަކަށް އަޅާލުމެއް ކިޔާލުމެއްނެތި ދެއަހަރު ދުއްވާލީމާ އެއަކަށް ކައުންސިލްތަކަށް ފަހި މާހައުލެކޭ ކިޔޭނެ ހެއްޔެވެ. އަމުދުން ކައުންސިލްތައް ކުޑަކޮށް އަތޮޅު ކައުންސިލްތައް އުވާލީމާ އޭގެ ބަދަލުގައި ކައުންސިލްތަކުގެ ޗެމްޕިއަންއޭ ބުނެވޭނެ ހެއްޔެވެ.

މުއިއްޒުބޭއެވެ. ކައުންސިލަރުން ބުނަމުން އެދަނީ އެވެރިންނަށް އެންމެ އިހާނަތްތެރިވީވެސް މިދިޔަ ދެއަހަރުގެ ތެރޭގައި ކަމަށެވެ. އެވެރިންގެ އަގު އެންމެ ބޮޑަށް ވައްޓާލަން މަސައްކަތް ކުރީވެސް މިދިޔަ ދެއަހަރުގެ ތެރޭގައި ކަމަށެވެ. ނުރުހުނީމާ ނޫންނަމަ ގަޔާވާގޮތައް ހުށާމިދު ނުކުރާނެހެން ހީވީމާ ބައްދަލުވެސް ނުކޮށް އަދި ބަހެއްބުނެލާނެ ފުރުސަތުވެސް އެންމެ ގިނައިން ދިޔައީ މިދެއަހަރުގެ ތެރޭގައެވެ.

މުއިއްޒުބޭއެވެ. ރައްޔިތުންނާ ކައުންސިލަރުންނާ ޖައްސައި ރަށުގެ ތަރައްގީއަށް ހުރަސްއަޅަނީ ކައުންސިލަރުންނޭ ބުނެ އެވެރިނަށް ހެއްދެވި ނުހެއްދެވިއަށް ގޮވާއިރު އެމީހުންނާ ނުވެސް ބައްސައިވެސް ކަންކުރެވޭގޮތައް ގާނޫނަށް ބަދަލު ގެނައީވެސް މިދިޔަ ދެއަހަރުގެ ތެރޭގައެވެ. ރައްޔިތުންގެ ލޮލުގައި އަނދުން އަޅުވަން ނުހިންގޭ މަޝްރޫއުތަކުގައި ސޮއިކޮށް އެއްވެސް އާކަމެއްވެސް ނުފެށި އަދި ކުރިން ކުރަމުން ކުރަމުންއައި ކަންކަންވެސް ހުއްޓުނީމާ އެކަމުގެ މަތިޖަހަން ކައުންސިލަރުންގެ ބޮލަށް ކަނޑަމުން ތިޔަ ގެންދަވަނީވެސް ވޭތުވެ ދިޔަ ދެއަހަރުގެ ތެރޭގައެވެ.

ކޮންމެއަކަސް ކިތަންމެ ބޭނުންވިއަސް ލާމަރުކަޒީ ދުވަހުގެ ފަޚުރާ ޝަރަފެއް މުއިއްޒުބޭއަށް ދޭކަށް މަށަކަށް ހަމަ ލާހިކު ކުޅަދާނައެއް ނޫނެވެ. މުއިއްޒުބޭ މޭޔަރަކަށް ހުރެގެން ގަތް ގަނޑުތައް ބެލިއަ ނުދޭން މުިއްޒުބޭގެ ކައުންސިލަރުން ލައްވައި މުޅި މާލެ ސިޓީ ކައުނސިލް ގަޑުބަޑުކުރަން ތިޔަ ކުރައްވާ މަސައްކަތަށް އެކަނިވެސް އެކަން ވާކަށް ނެތެވެ. މިރޯދަމަހު މީހުން ލައްވައި ލޮލަށް ބޮލަށް ގޮވަން ނުހަދާށޭއެވެ. މަށަށް ބުނެވޭނީ މުއިއްޒުބޭއަކީ ލާމަރުކަޒީ ނިޒާމަށް ހެވެއް އެދޭ މީހެއް ނޫންކަމަށެވެ. މުއިއްޒުބޭއާ މުއިއްޒުބޭގެ އައުވާނުން ކޮންމެ ގޮތަކަށް ނިންމިއަސް މަށަށް ވަރިހަމައެވެ. ވަރަށް ސަލާމެވެ.