އެމްޑީޕީގެ ޕިކަޕް ޖަލްސާ: "ގޮތް ހުސްވެ ވަޒީފާ އާއި އެހެން ގޮތް ގޮތުން ނުފޫޒު ފޯރުވާ، އިންތިޚާބު އޮޅުވާލުމަށް ސަރުކާރުން ދަނީ މަސައްކަތް ކުރަމުން"
ކުރިއަށް އޮތް އިންތިޚާބުތަކާ ދިމާކޮށް ސަރުކާރުން ވަޒީފާގެ ބިރުދައްކައި، ނުފޫޒު ފޯރުވަމުންދާ ކަމަށް އެމްޑީޕީގެ ވަގުތީ ޗެއާޕަރސަން އަބްދުލް ޣަފޫރު މޫސާ ތުހުމަތު ކުރެއްވި. ސަރުކާރަށް އެއްވެސް އާ މަޝްރޫއެއް ނުހިންގޭތީ ރައްޔިތުންގެ ނުރުހުން އަމާޒުވެފައިވާ ކަމަށާއި، ކައުންސިލް މުވައްޒަފުންގެ މުސާރަ ބޮޑުކުރުމުގެ ނަމުގައި ސަރުކާރުން އޮޅުވާލަމުންދާ ކަމަށް މާލޭގެ މޭޔަރު އާދަމް އާޒިމް ވެސް ވަނީ ވިދާޅުވެފަ.
އެމްޑީޕީ ޕިކަޕް ޖަލްސާގެ ތެރެއިން. | ރާއްޖެ އެމްވީ
ކުރިއަށް އޮތް ކައުންސިލް އަދި ޑަބްލިއުޑީސީ އިންތިޚާބުގައި ސަރުކާރު ބަލިވާނެކަން އެނގުމުން ސަރުކާރަށް ގޮތް ހުސްވެ، ވަޒީފާ އައި އެހެނިހެން ގޮތް ގޮތުން އާއްމުންނަށް އިންތިހާ އަށް ނުފޫޒު ފޯރުވަމުން ދާކަމަށް އިދިކޮޅު އެމްޑީޕީގެ ވަގުތީ ޗެއާޕަރސަން އަބްދުލް ޣަފޫރު މޫސާ ވިދާޅުވެއްޖެ އެވެ.
އޭނާ އެފަދައިން ވިދާޅުވީ އެމްޑީޕީގެ ޕިކަޕް ޖަލްސާގައި ހޯމަ ދުވަހު ހަވީރު ވާހަކަދައްކަވަމުންނެވެ.
ޣަފޫރު ވަނީ ސަރުކާރުން ދަނީ ސަރުކާރަށް ވޯޓު ލިބޭނެކަން ޔަޤީން ނުވާ މީހުން އެހެން ރަށްރަށަށް ބަދަލުކޮށް އެ މީހުންނަށް ވޯޓުލުމުގެ ފުރުސަތު ގެއްލުވާލަމުން ކަމަށް ވިދާޅުވެފަ އެވެ. އަދި ސަރުކާރުން ވަޒީފާގެ ބިރު ދެއްކުމާއި ވަޒީފާ ދޭނެ ކަަމަށް ބުނެ ނުފޫޒު ފޯރުވުން ފަދަ ކަންކަން ކުރަމުންދާ ކަމަށް އޭނާ ވިދާޅުވި އެވެ. މި ހުރިހާ ކަމެއް ކުރަމުން ދަނީ ސަރުކާރަށް ޕަރފޯރމް ނުކުރެވޭތީ އާއްމުންގެ ނުރުހުންތަކާއި ކުރިމަތިވުމުން އެކަން މަތި އެޅުމަށް ކަމަށް ޣަފޫރު ވިދާޅުވި އެވެ.
"ސަރުކާރަށް ހިންގުނު އާ މަޝްރޫޢު އެއް ނެތޭ. ސަރުކާރަށް ކުރެވުނު ކަންކަމެއް ނެތޭ. މިހެން ވީމަ ރައްޔިތުން ސުވާލު ކުރުމުން އެ ސުވާލުތަކަށް ޖަވާބެއް ނުދެވޭ. ދެން އެކި ގޮތް ގޮތުން އާއްމުންނަށް އޮޅުވާލުމަށް މި މަސައްކަތް ކުރަނީ." ޣަފޫރު ވިދާޅުވި އެވެ.
އެމްޑީޕީގެ ޕިކަޕް ޖަލްސާގައި ވާހަކަދައްކަވަމުން، މާލޭގެ މޭޔަރ އަދި އެމްޑީޕީގެ ޓިކެޓްގައި މާލޭ ސިޓީ ކައުންސިލްގެ މޭޔަރ ކަމަށް ވާދަކުރައްވާ އާޒިމް ވަނީ ސަރުކާރުން ކައުންސިލް މުވައްޒަފުންގެ މުސާރަ ބޮޑު ކުރާ ކަމަށް ބުނެ އޮޅުވާލަމުންދާ ކަމަށް ވިދާޅުވެފަ އެވެ. ނަމަވެސް މި ސަރުކާރުން އަމަލުކުރަމުން ދަނީ ހައްތަހާ ވެސް ވެރިންނަށް މުސާރަ ބޮޑުވާ ގޮތަށް ކަމަށް އާޒިމް ވިދާޅުވި އެވެ. ރާއްޖޭގެ ސިވިލް މުވައްޒަފުންގެ މުސާރަ ކުޑަ ވާގޮތަށް އަމަލުކުރަމުންދާ ކަމަށް އާޒިމް ވިދާޅުވި އެވެ. ސަރުކާރުން އާއްމުންނާއި މެދު ކަންކަން ކުރަނީ ނިކަމެތި ކޮށްކަމަށް ފާހަގަކުރައްވާ، އާޒިމް ވަނީ ސަރުކާރަށް އާއްމުންގެ އިތުބާރު އެއްކޮށް ގެއްލިފައިވާ ކަމަށް ވިދާޅުވެފަ އެވެ.
