ޖަލްސާގެ ކޯރަމް ހަމަނުވެގެން އިއުލާނު ކުރާ ފަހުން މީހަކު ވަނުމަކުން ކޯރަމް ހަމަވިކަމަކަށް ނުބެލެވޭނެ: އާޒިމް
މާލެ ސިޓީ ކައުންސިލްގެ ރަސްމީ ޖަލްސާގެ ކޯރަމް ހަމަނުވެގެން ކެންސަލް ކުރަން ޖެހުނު މައްސަލައިގައި، ޑެޕިއުޓީ މޭޔަރު މުހައްމަދު އަރީޝް އިތުރުފުޅު ހައްދަވާފައިވާ ކަމަށް މޭޔަރު އާދަމް އާޒިމް ވިދާޅުވި. ޖަލްސާ ނިންމާލި ފަހުން މެންބަރަކު ހާޒިރުވުމަކީ ކޯރަމް ހަމަވުން ކަމަށް ނުބެލެވޭނެ ކަމަށާއި، ޕީއެންސީގެ ކައުންސިލަރުންގެ ސަބަބުން ކައުންސިލްގެ މަސައްކަތްތަކަށް ހުރަސްއެޅި މުޅި ނިޒާމު ގަޑުބަޑުވަމުންދާ ކަމަށް މޭޔަރު ވިދާޅުވި.
މާލެ ސިޓީ ކައުންސިލްގެ މޭޔަރ އާދަމް އާޒިމް. | ރާއްޖެ އެމްވީ
މާލެ ސިޓީ ކައުންސިލްގެ އަންގާރަ ދުވަހުގެ އާންމު ރަސްމީ ޖަލްސާގެ ކޯރަމް ހަމަނުވެގެން 17 މިނެޓް މަޑުކުރުމަށްފަހު ޖަލްސާ ނިންމާލި ފަހުން އެތަނަށް މީހަކު ވަނުމަކުން އެއީ ކޯރަމް ހަމަވުންކަމަށް ނުބެލޭނެ ކަމަށާއި، ކޯރަމް އޮންނަ ގޮތެއް ވެސް ޑެޕިއުޓީ މޭޔަރު އަރީޝް އަށް އެނގިވަޑައިގަންނަވާހެން ހީނުވާ ކަމަށް މާލެ ސިޓީގެ މޭޔަރ އާދަމް އާޒިމް ވިދާޅުވެއްޖެ އެވެ.
މާލެ ސިޓީ ކައުންސިލުން ވެސް ވަނީ ކޯރަމް ހަމަނުވެގެން ޖަލްސާ ނިންމާލި މައްސަލައިގައި ޑެޕިއުޓީ މޭޔަރ މުހައްމަދު އަރީޝް ދޮގު ވާހަކަތަކެއް އެކްސްގައި ޕޯސްޓް ކޮށްފައިވާތީ އެކަން ސާފުކޮށް ބަޔާނެއް ނެރެފަ އެވެ. ސިޓީ ކައުންސިލްގެ ބަޔާނުގައި ބުނީ ޢާންމު ރަސްމީ ޖަލްސާގެ އެޖެންޑާ އެކުލަވާ، ކައުންސިލަރުންނާ ޙިއްސާކޮށްފައިވާނީ 15 ފެބްރުއަރީ 2026 ވީ އާދިއްތަ ދުވަހުގެ 2:00 ގަ އެވެ. ޖަލްސާ ތާވަލުކޮށްފައި ވާނީ މިއަދު (17 ފެބުރުވަރީ 2026 ވީ އަންގާރަ) ހެނދުނު 9:30 އަށް ކަމަށް ކައުންސިލުން ބުނެފައިވެ އެވެ. ޖަލްސާގެ ކޯރަމަކީ 10 އެވެ.
އަންގާރަ ދުވަހުގެ ޖަލްސާގެ ކޯރަމް ހަމަވޭތޯ ގަޑިން 9:47 އާ ހަމައަށް ރިޔާސަތުން ބެއްލެވުމަށްފަހު، ކޯރަމް ހަމަނުވާތީ ޖަލްސާ ނިންމާލިކަން އިޢުލާން ކުރިކަމަށް ސިޓީ ކައުންސިލުން ބުނެފައިވެ އެވެ.
މިކަމާއި ގުޅޭ ގޮތުން މޭޔަރ އާދަމް އާޒިމް ވިދާޅުވީ އަރީޝް އަކީ ޖަލްސާތަކަށް ގަޑިއަށް ހާޒިރު ނުވާ ކައުންސިލަރެއް ކަމަށެވެ. އަދި ހަމަ މިއާއެކު ޖެހިޖެހިގެން 5 ރަސްމީ ބައްދަލުވުމަށް ހާޒިރު ނުވާ ކަމަށާއި، އަންގާރަ ދުވަހުގެ ޖަލްސާއާއި ގުޅިގެންވެސް ހެއްދެވީ ދޮގު ކަމަށެވެ. އާޒިމް ވިދާޅުވީ ކޯރަމް ހަމަނުވެ އިޢުލާނުކުރި ފަހުން މީހަކު ވަނުމަކުން ކޯރަމް ހަމަވި ކަމަށް ނުބެލެވޭނެ ކަމަށެވެ.
9:30 ގައި އަންނަން އޮންނާނީ އަންގާފަ. 9:30 ގައި ނާދެވިގެން 5 މިނެޓު މަޑުކޮށްފަ، 15 މިނެޓު 17 މިނެޓު މަޑުކޮށްފަ އަޅުގަނޑު އިޢުލާނުކުރީ ކޯރަމް ހަމަނުވާ ކަމަށެވެ. އިޢުލާނުކުރި ފަހުން މީހަކު މި ވަންނަނީ. އެވަރު ވެސް ނޭނގޭ މީސްމީހުން ތަންތަނަށް މީހުން ޢައްޔަންކުރީމާ ރައްޔިތުންނަށް ވާނީ ގެއްލުން.މޭޔަރު އާދަމް އާޒިމް
އާޒިމް ވިދާޅުވީ މިއަދު މުޅި ޤައުމަށް ޖެހިފައިވާ ހާލަތަކީ ޕީއެންސީއަށް ނިސްބަތްވާ މީހުން ތަންތަނަށް ހޮވައިގެން ޖެހޭ ހާލަތު ކަމަށެވެ. އަދި ޕީއެންސީއަށް ނިސްބަތްވާ ރައީސުލްޖުމްހޫރިއްޔާއެއް ހޮވައިގެން މިއަދު ޤައުމަށް ލިބުނު ފައިދާއެއް ނެތް ކަމަށެވެ. އަދި މުޅި ޤައުމު ގަޑުބަޑުކޮށްލާފައިވާ ކަމަށާއި، ކައުންސިލަރު އަރީޝް ހުރެގެން، ޕީއެންސީގެ ކައުންސިލަރުން ތިބެގެން މުލީ ކައުންސިލް ގަޑުބަޑު ކޮށްލާފައިވާ ކަމަށެވެ.
