އީރާން އާއި އެމެރިކާގެ މަޝްވަރާ ތަކުގެ ތިން ވަނަ ބުރު ބުރާސްފަތި ދުވަހު ޖެނީވާގައި ކުރިއަށް ގެންދަނީ

އީރާން އާއި އެމެރިކާއާ ދެމެދު ކުރިއަށް ގެންދަމުން އަންނަ ނިއުކްލިއާ މަޝްވަރާ ތަކުގެ ތިން ވަނަ ބުރުގެ ބައްދަލުވުން، ބުރާސްފަތި ދުވަހު ސްވިޒަލެންޑުގެ ޖެނީވާގައި ކުރިއަށް ގެންދަން ނިންމާފައިވާ ކަމަށް ހާމަ ކޮށްފި އެވެ. 

މިކަން ހާމަ ކޮށްފައި ވަނީ މި މަޝްވަރާ ތަކުގައި މެދުވެރިއެއްގެ ދައުރު އަދާ ކުރަމުން އަންނަ އޮމާންގެ ފޮރިން މިނިސްޓަރު ބަދުރު އަލް ބަސައިދީ އެވެ. 

އެގޮތުން ބުސައިދީ އެކްސްގައި ކުރެއްވި ޕޯސްޓެއްގައި ވިދާޅުވީ، މި މަޝްވަރާތައް އަލުން ފަށަނީ އެއްބަސްވުމަކަށް އައުމަށް ކުރެވޭ މަސައްކަތް ތަކަށް ލިބުނު ހެޔޮ ބަދަލާ އެކު ކަމަށެވެ. އަދި އެންމެ ފަހުގެ ނިންމުންތަކާ ހަމައަށް ވާސިލުވުމުގެ އުންމީދުގައި ކަމަށް ވެސް އޭނާ ވިދާޅުވި އެވެ. 

މި މަޝްވަރާތަކާ ގުޅޭ ގޮތުން އީރާންގެ ފޮރިން މިނިސްޓަރު އައްބާސް އަރާގްޗީ އެމެރިކާގެ ސީބީއެސް ނިއުސް އަަށް ދެއްވި އިންޓަވިޔުއެއްގައި ވިދާޅުވީ، އެމެރިކާ އިން އީރާން އަށް ހަމަލާ ދީފި ނަމަ، މެދު އިރުމަތީގައި ހުރި އެމެރިކާގެ މަސްލަޙަތު ތަކަށް ހަމަލާ ދޭނެ ކަމަށެވެ. ނަމަވެސް، އަދި ވެސް ޑިޕްލޮމެޓިކް ޙައްލެއް ފެނުމުހެ ފުރުސަތު އެބަ އޮތް ކަމަށް އޭނާ ވިދާޅުވެފައިވެ އެވެ. 

މެދު އިރުމަތީގައި އެމެރިކާގެ އަސްކަރީ ބާރުތައް ވަރުގަދަކޮށް، އީރާން އަށް ހަމަލާ ދީފާނެ ކަމުގެ ބިރު ބޮޑުވެފައިވާ ދަނޑިވަޅެއްގައި އަރާގްޗީ ވިދަޅުވީ، އެމެރިކާ އިން ހަމަލާ ދީފި ނަމަ އަމިއްލަ ނަފްސު ދިފާއު ކުރުމުގެ ފުރިހަމަ ހައްގު އީރާން އަށް ލިބިގެންވާ ކަމަށެވެ. އެމެރިކާ އިން މިހާރު ވަނީ އެ ސަރަހައްދަށް ދެ އެއާކްރާފްޠް ކެރިއަރާއި، ހަނގުރާމަ މަތީ މަތިންދާ ބޯޓުތަކާއި އަދި މަނަވަރުތައް ފޮނުވައި، ވައިގެ ދިފާއީ ނިޒާމު ވެސް ވަރުގަދަ ކޮށްފަ އެވެ.

އީރާންގެ ނިއުކްލިއާ ޕްރޮގްރާމް އަކީ، ނިއުކްލިއާ ބޮން އުފެއްދުމަށް ކުރިއަށް ގެންދާ މަސައްކަތެއް ކަމަށް ހުޅަނގުގެ ޤައުމު ތަކުން ތުހުމަތު ކޮށްފައި ވީ ނަމަވެސް، އީރާން އިން ގެންދަނީ އެކަން ދޮގު ކުރަމުންނެވެ. އެކަމާ ގުޅޭ ގޮތުން އަރާގްޗީ ވިދާޅުވެފައި ވަނީ މަދަނީ ބޭނުން ތަކަށް ޔުރޭނިއަން މުއްސަނދި ކުރުމަކީ މިނިވަން ދައުލަތެއްގެ ހައިސިއްޔަތުން އީރާން އަށް ލިބިގެންވާ ހައްގެއް ކަމަށެވެ. ޖެނީވާގައި އެންމެ ފަހުން ބޭއްވި މަޝްވަރާ ތަކަށް ފަހު، އަސްކަރީ ކުރިމަތިލުމަކުން ސަލާމަތްވުމަށްޓަަކައި އީރާން އިން މިހާރު ގެންދަނީ އެއްބަސްވުމުގެ ދެލި ކޮޕީއެއް ތައްޔާރު ކުރަމުންނެވެ. 

އެމެރިކާގެ އެކްސިއޯސް ނޫހުން ރިޕޯޓު ކޮށްފައިވާ ގޮތުގައި، ކުރިއަށް އޮތް 48 ގަޑިއިރުގެ ތެރޭގައި އީރާން އިން އެ ހުށަހެޅުން ހުށަހަޅައިފި ނަމަ، ތަފްސީލީ މަޝްވަރާތައް ފެށުމަށް އެމެރިކާ އޮތީ ފުރިހަމަ އަށް ތައްޔާރަށެވެ. އީރާން އިން ބޭނުން ވަނީ އެ ޤައުމުގެ އިޤްތިޞާދަށް ބޮޑެތި ގެއްލުން ތަކެއް ލިބެމުންދާ ދަތި ކުރުމުގެ ފިޔަވަޅު ތަކުން ސަލާމަތް ވުމަށް އަވަސް އެއްބަސްވުމަކަށް އައުމަށް ކަމަށް ވެސް ރިޕޯޓު ކޮށްފައިވެ އެވެ. 

އީރާން އާއި އެމެރިކާއާ ދެމެދު އަލުން މަޝްވަރާތައް ފެށިއިރު، ފުރަތަމަ ބައްދަލުވުން އޮތީ އޮމާންގަ އެވެ. ދެ ވަނަ ބައްދަލުވުން ޖެނީވާގައި އޮތްއިރު، ތިން ވަނަ ބައްދަލުވުން ވެސް އޮތީ ޖެނީވާގަ އެވެ. މިއީ ދެ ވަނަ ބައްދަލުވުމަށް ފަހު، ދެ ޤައުމުން ވެސް އެއްބަސްވެފައިވާ ބައްދަލުވުމެކެވެ.