މޭރީގެ މަރުގެ މައްސަލައިގައި ދައުވާ ލިބޭ އޭނާގެ ފިރިމީހާ މާވިން ޖަލުގައި އިސްލާމް ވެއްޖެ

އައިޖީއެމްއެޗްގައި މަސައްކަތް ކުރި މޭރީ ގްރޭސްގެ މަރުގެ މައްސަލައިގައި، ދައުވާ އޭނާ ގެ ފިރިމީހާ މާވިން އެސްވައި ވަރގަސް އިސްލާމްވެފައިވާ ކަން އިސްލާމިކް މިނިސްޓްރީން ކްރިމިނަލް ކޯޓަށް އަންގައިފި އެވެ.

ބުރާސްފަތި ދުވަހު ބޭއްވި އަޑުއެހުމުގައި އެ މައްސަލަ މިހާރު ބައްލަވާ ގާޒީ މުޒައްމިލު ނާސިރު ވިދާޅުވީ ޖަލު ބަންދުގައި ހުރި މާވިންއާ ގުޅޭގޮތުން އިސްލާމިކް މިނިސްޓްރީން ސިޓީއެއް ފޮނުވާފައިވާ ކަމަށެވެ. އެ ސިޓީގައި އޮތީ މާވިން އިސްލާމްދީން ގަބޫލުކޮށް، އޭނާ ގެ ނަން ޔޫސުފްގެ ނަމަށް ބަދަލުކޮށްފައިވާ ކަމަށް ގާޒީ ވިދާޅުވި އެވެ.

އެހެންކަމުން އަޑު އެހުން ކުރިއަށް ގެންދިޔައީ ޔޫސުފްގެ ނަމުން މުހާތަބު ކޮށްގެންނެވެ.

މިކަމާއި ގުޅިގެން ދައުލަތުގެ ވަކީލު ވަނީ، އާއްމުކޮށް ދައުލަތުން މީހުންނާ މުހާތަބު ކުރަނީ ޕޯސްޕޯޓު ފަދަ ރަސްމީ ލިޔުމުގައި އޮންނަ ނަމުން ކަމަށާއި، ދައުލަތުން ދެކޭ ގޮތް ސާފުކޮށް ދިނުމަށް އެދިވަޑައިގެންފަ އެވެ. އަދި އޭނާ އިސްލާމްވުމާއެކު، އަދަބަށް ބަދަލު އަންނާނެތޯ މަޝްވަރާ ކުރުމަށްފަހު އެކަން ހާމަ ކުރާނެ ކަމަށެވެ.

ބުރާސްފަތި ދުވަހުގެ އަޑު އެހުމަކީ ބަޔާން އިއްވަން ބޭއްވި އަޑު އެހުމެއް ނަމަވެސް ބައެއް ލިޔުންތައް ނުލިބޭ ކަމަށާއި، ދިފާއު ވުމަށް ތައްޔާރު ނުވެވޭ ކަމަށް ބުނެ އިތުރު ވަގުތަށް ވަނީ އެދިފަ އެވެ. އެކަމާއި ގުޅިގެން ގާޒީ ވަނީ އިތުރު ފުރުސަތެއް ދޭން ނިންމާފަ އެވެ. އަދި މަރޗް މަހުގެ ތެރޭގައި ހުލާސާ ބަޔާން އިއްވަން އަޑު އެހުމެއް ތާވަލު ކުރި އެވެ. 

މޭރީ ގްރޭސްގެ މަރުގެ މައްސަލައިގައި، ދައުވާ އޭނާ ގެ ފިރިމީހާ މާވިން އާއި އޭނާ ގެ ލޯބިވެރިޔާ ހަލީމަތު ލަމްހާގެ މައްސަލަ ކުރިން ގެންދިޔައީ ވަކި ވަކީންނެވެ. ނަމަވެސް، މިހާރު ޝަރީއަތް ކުރިއަށް ގެންދަނީ އެއްކޮށެވެ. މޭރީގެ ފިރިމީހާ މާވިންގެ މައްޗަށް ކުރަނީ އެނގިހުރެ މީހަކު މެރުމުގައި ބައިވެރިވުމުގެ ކުށުގެ ދައުވާ އެވެ. އަދި ލަމްހާގެ މައްޗަށް އުފުލާފައިވަނީ އެނގިހުރެ މީހަކު މެރުމުގައި ބައިވެރިވުމުގެ ކުށުގެ ދައުވާއާއި، އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށުގެ ދައުވާއާއި، ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ކުށުގެ ދައުވާ އެވެ.

މޭރީ ގްރޭސްގެ މަރާ ގުޅިގެން ފުލުހުން ތުހުމަތުތައް ކުރަން ފެށީ، ދަން ޖެހިފައި ހުރި ކަމަށް ބުނެ އޭނާ ހޮސްޕިޓަލަށް ގެންދިޔަ ނަމަވެސް، އޭނާ ގެ ހަށިގަނޑުން ދަން ޖެހިފައި ހުރިކަމުގެ ނިޝާނެއް ފެންނަން ނެތުމުންނެވެ. އެހެންކަމުން އޭނާ މަަރުވި ސަބަބު ދެނެގަތުމަށް ފުލުހުން ވަނީ އޭނާ ގެ ހަށިގަނޑު އިންޑިއާއަށް ފޮނުވައިގެން ޕޯސްޓްމޯޓަމް ހަދާފަ އެވެ.

ޕޯސްޓްމޯޓަމް ރިޕޯޓުން އެނގޭގޮތުގައި މޭރީ މަރުވެފައިވަނީ ލިބުނު ޒަޚަމްތަކުގެ ސަބަބުން ކަމަށް ފުލުހުން ބުނެފައިވެ އެވެ.

މޭރީގެ ޕޯސްޓްމޯޓަމް ރިޕޯޓާ ގުޅިގެން ފުލުހުން ބުނެފައިވަނީ, އޭނާ މަރުވެފައިވަނީ ދަންޖެހިގެން ކަމަށް ނުބެލެވޭ ކަމަށެވެ. އަދި މަރުވެފައިވަނީ ބްލަންޓް އިންޖަރީއެއްގެ ސަބަބުން ކަމަށެވެ. ބްލަންޓް އިންޖަރީއަކީ ގަދަކަމުން މީހަކަށް އަނިޔާއެއްދީގެން ނުވަތަ އެއްޗަކުން ޖަހައިގެން ލިބޭ އަނިޔާއަކުން ނުވަތަ ގެއްލުމަކުން ވާ މަރެކެވެ.