ސައުދީން ރަމަޟާން މަހާ ދިމާކޮށް ރާއްޖެއަށް ހަދިޔާ ކުރާ ކަދުރު މިއަހަރު އަދި ނުލިބޭ: އިސްލާމިކް މިނިސްޓްރީ
ކަދުރު ލިބުން ލަސްވުމާ ގުޅިގެން، މިއަހަރު އާންމު ރައްޔިތުންނަށް ކަދުރު ބެހޭނީ ރަމަޟާން މަހުގެ ފަހުކޮޅު ނުވަތަ ފިތުރު އީދާ ދިމާކޮށް ކަމަށް ބެލެވޭ. މިދިޔަ އަހަރު ރަމަޟާން މަސް ފެށުމުގެ ކުރިން ކަދުރު ބަހާފައިވާއިރު، މިއަހަރުވެސް ކަދުރު ލިބުނުހާ އަވަހަކަށް އުސޫލުގެ ތެރެއިން ބަހަން ފަށާނެ ކަމަށް މިނިސްޓްރީން މައުލޫމާތުދޭ.
މިދިޔަ ރޯދަމަހާ ދިމާކޮށް، ސައޫދީން ރާއްޖެއަށް ހަދިޔާކުރި ކަދުރު ހަވާލުކުރުމުގެ ރަސްމިއްޔާތުގެ ތެރެއިން- ފައިލް ފޮޓޯ | އިސްލާމިކް މިނިސްޓްރީ
ސައުދީ ސަރުކާރުން ކޮންމެ އަހަރެއްގެ ރަމަޟާން މަހާ ދިމާކޮށް ދިވެހިރާއްޖެއަށް ހަދިޔާ ކުރާ ކަދުރު މިއަހަރު އަދި ނުލިބޭ ކަމަށް އިސްލާމިކް މިނިސްޓްރީން ބުނެފި އެވެ.
ކޮންމެ އަހަރެއްގެ ރަމަޟާން މަހުގެ ކުރިން ސައުދީ ސަރުކާރުން ދޭ ކަދުރު ރާއްޖެ އަށް ލިބެ އެވެ. މިއަހަރު ކަދުރު ނުލިބޭ ގިނަ ރައްޔިތުން ދަނީ އެކަމާމެދު ސުވާލު އުފައްދަމުންނެވެ.
ކަދުރު ނުލިބޭ މައްސަލައާ ގުޅޭގޮތުން ބުރާސްފަތި ދުވަހު ރާއްޖެޓީވީގެ ފަށާއިރު ޕްރޮގްރާމްގެ ތެރެއިން އިސްލާމިކް މިނިސްޓްރީއަށް ގުޅުމުން، އެ މިނިސްޓްރީގެ މުވައްޒަފެއް ބުނީ ސައުދީ ސަރުކާރުން ކޮންމެ އަހަރަކު ރަމަޟާން މަހާ ދިމާކޮށް ހަދިޔާ ކުރާ ކަދުރު މިއަހަރު ނުލިބޭ ކަމަށާއި، އެ ކަދުރު ލިބުމާއެކު އުސޫލުގެ ތެރެއިން ބަހާނެ ކަމަށެވެ. އަދި ކަދުރު ލިބޭނީ މިމަހުގެ ފަހު ކޮޅު ކަމަށް މައުލޫމާތު ލިބިފައިވާ ކަމަށް އެމުވައްޒަފު ބުންޏެވެ.
ބެލެވޭ ގޮތުގައި ސައުދީ ސަރުކާރުގެ ފަރާތުން ހަދިޔާ ކުރާ ކަދުރު އާއްމު ރައްޔިތުންނަށް ލިބޭނީ ރަމަޟާން މަހުގެ ފަހުކޮޅު ނުވަތަ ފިތުރު އީދަށެވެ.
މިދިޔަ އަހަރުގެ ރަމަޟާން މަހު ވެސް ސައުދީ ސަރުކާރުން ވަނީ ރާއްޖެއަށް 50 ޓަނުގެ ކަދުރު އަދި ސައުދީގެ މިނިސްޓްރީ އޮފް އިސްލާމިކް އެފެއާޒް ދައުވާ އެންޑް ގައިޑެންސްއިން ރާއްޖެއަށް 10 ޓަނުގެ ކަދުރު ހަދިޔާކޮށްފައިވެ އެވެ. އަދި ރަމަޟާން މަސް އައުމުގެ ކުރިން ކަދުރު ގޭބިސީތަކަށް ދޫކޮށްފައިވެ އެވެ.
