އަމީން މިއާގެ މަރުގެ މައްސަލަގައި ހައްޔަރުކުރި ލަންކާ މީހާގެ ބަންދުގެ މުއްދަތު އިތުރު ކޮށްފި
19 ފެބުރުއަރީ 2026 | ބުރާސްފަތި 05:1501 ފެބްރުއަރީ 2026 ގައި ކޯޓު އަމުރެއްގެ ދަށުން ހައްޔަރުކުރީ، 32 އަހަރު ހެޝަން މަދުރަންގަ ޑިސަނަޔަކަ މެނިކަ. އޭނާގެ ބަންދުގެ މުއްދަތު ހަމަވުމުން 18 ފެބްރުއަރީ 2026 ގައި ވަނީ އިތުރަށް 45 ދުވަހަށް ބަންދު ކުރުމަށް އަމުރު ކޮށްފައި. ގަސްދަކާ ނުލައި މީހަކު މެރުމުގެ ތުހުމަތު ކުރެވޭ މި މީހާ ބަންދުގައި ބަހައްޓަން ނިންމީ، އޭނާ ފަރުވާކުޑަކޮށް އަމަލުކުރި ކަމަށް ބެލެވޭ ހެކިތަކެއް ހުރުމާއި، ގައުމުން ފިލައިގެން ގޮސްދާނެ ކަމުގެ ބިރު އޮތުމުން.
ތިލަފުށިން މަރުވެފައި އޮއްވާ ފެނުނީ ބަންގްލަދޭޝްގެ ރައްޔިތެއް ކަމަށްވާ އަމީން މިއާ. | ރާއްޖެއެމްވީ
އަމީން މިއާގެ މަރުގެ މައްސަލަގައި ހައްޔަރުކުރި ސްރީލަންކާ މީހާގެ ބަންދުގެ މުއްދަތު އިތުރު ކޮށްފި އެވެ.
މި މައްސަލާގައި 01 ފެބްރުއަރީ 2026 ގައި ކޯޓު އަމުރެއްގެ ދަށުން ހައްޔަރުކުރީ، 32 އަހަރު ހެޝަން މަދުރަންގަ ޑިސަނަޔަކަ މެނިކަ އެވެ. އެ ދުވަހު ކްރިމިނަލް ކޯޓަށް ހާޒިރު ކުރުމުން، ކޯޓުން ވަނީ ކަސްޓޯޑިއަލް ޖަލެއްގައި ބެހެއްޓުމަށް އަމުރުކޮށް، އޭނާ ގެ ބަންދަށް 7 ދުވަސް ޖަހާފައިވެ އެވެ. އަދި ބަންދުގެ މުއްދަތު ހަމަވުމުން 18 ފެބްރުއަރީ 2026 ގައި ވަނީ 45 ދުވަހަށް ބަންދު ކުރުމަށް އަމުރު ކޮށްފަ އެވެ.
އޭނާ ގެ މައްޗަށް ގަސްދަކާ ނުލައި މީހަކު މެރުމުގެ ތުހުމަތު ކޮށްފައިވެ އެވެ.
ބަންދުގައި ބަހައްޓަން ނިންމި ސަބަބުގެ ގޮތުގައި ބުނެފައިވަނީ ތުހުމަތުކުރެވޭ އެކަށީގެންވާ މިންވަރުގެ ހެކި ލިބިފައިވާ ކަމަށެވެ.
އެގޮތުން ހުށަހަޅާފައިވާ ބަޔާންތަކާއި، ސީސީޓީވީ ފުޓޭޖުގެ ފޮޓޯތަކުން އެނގޭ ގޮތުގައި އޭނާ ދުއްވަން އިން އެކްސްކަވޭޓަރުން ޖެހުމުގެ ސަބަބުން މީހަކު މަރުވެފައިވާ ކަމަށް ބެލެވޭ ކަމަށެވެ. އަދި އޭނާ އެކްސްކަވޭޓަރު އޮޕްރޭޓު ކޮށްފައިވަނީ ބަލަން ޖެހޭ ވަރަށް ނުބަލައި ކަމަށް ފުލުހުން ކޯޓުގައި ބުނެފައިވެ އެވެ.
މީގެ އިތުރުން ހެއްކެއްގެ ބަޔާނުން އެނގޭ ގޮތުގައި އެ ހާދިސާ ހިނގިފަހުން އޭނާ އަމިއްލަ ގައުމަށް ދާން ބޭނުންވާ ކަމަށް ބުނެ ވާހަކަ ދައްކާފައިވުމާއި، އޭނާއަކީ ލަންކާ ރައްޔިތަކަށްވުމުން އެގައުމަށް ދިއުމަށްފަހު ފިލުމުގެ އިހްތިމާލު ވުޖޫދުވާ ކަމަށް ކޯޓު އަމުރުގައި ބުނެފައިވެ އެވެ.
ތިލަފުށި ވެމްކޯ ސައިޓްގައި މަސައްކަތް ކުރަމުން ދިޔަ ބަންގްލަދޭޝްގެ އަމީން މިއާ މަރުވުމަށް މެދުވެރިވެފައި ވަނީ 26 ޖެނުއަރީ 2026 ވަނަ ދުވަހުގެ މެންދުރުގެ ވަގުތެއްގައި ކުނި ޖަމާކޮށްފައިވާ ސައިޓްގެ ބައެއްގައި އެކްސްކެވޭޓަރަކުން ކުނި ނެގުމުގެ މަސައްކަތްކުރަނިކޮށް، އޭގެ ދަތްގަނޑުން ޖެހި ވެއްޓި، އެކްސްކެވޭޓަރުން ކުނިތައް އެތަނުގެ ކައިރިން އެހެން ދިމާލަކަށް ބަދަލުކުރުމުގެ ތެރޭގައި އެ މީހާގެ ހަށިގަނޑާއެކު ކުނިތައް ބަދަލުކުރެވި މީހާގެ ގައިމައްޗަށް ކުނިތަކެއް އެޅިގެން ހިނގި ހާދިސާއެއްގައި ކަމަށް ފުލުހުން ބުނެފައިވެ އެވެ.
