ހުޅުމާލޭ ސެންޓްރަލް ޕާކުގައި މާރާމާރީއެއް: ބަންގްލަދޭޝް ދެ މީހަކު ހައްޔަރު ކުރިއިރު، ދެމީހަކު ވަނީ ފިލާފައި
ހުޅުމާލޭ ސެންޓްރަލް ޕާކުގައި ބިދޭސީންގެ މެދުގައި ހިނގި މާރާމާރީއަކާ ގުޅިގެން ބަންގްލަދޭޝްގެ ދެ މީހަކު ހައްޔަރުކޮށް، އެ މީހުންގެ ބަންދަށް ކޯޓުން ހަތް ދުވަސް ވަނީ ޖަހާފައި. މި ހާދިސާގައި އިތުރު ބަޔަކު ބައިވެރިވެފައިވާ ކަމަށް ބެލެވޭއިރު، މާރާމާރީގައި ބައިވެރިވި ބައެއް މީހުން ފިލާފައިވާ ކަމަށް ފުލުހުން ކޯޓުގައި ބުނެފައިވޭ.
ކްރިމިނަލް ކޯޓު. އެ ދެމީހުންގެ ބަންދަށް ވަނީ 7 ދުވަސް ޖަހާފައި | ރާއްޖެއެމްވީ
ހުޅުމާލޭ ސެންޓްރަލް ޕާކުގައި މާރާމާރީއެއް ހިންގުމުގެ ތުހުމަތުގައި ބަންގްލަދޭޝް ދެ މީހަކު ހައްޔަރުކޮށްފި އެވެ.
ހުޅުމާލެ ސެންޓްރަލް ޕާކު ތެރޭގައި މާރާމާރީ ހިންގި ކަމުގެ ތުހުމަތުގައި ހައްޔަރު ކޮށްފައިވަނީ ބަންގްލަދޭޝްއަށް ނިސްބަތްވާ 36 އަހަރު ނަޔަން މިއާ އަދި 35 އަހަރުގެ މުހައްމަދު މޮޝަރޮފް އެވެ.
ހުކުރު ދުވަހު ކޯޓުން ވަނީ މި ދެމީހުން ކަސްޓޯޑިއަލް ޖަލެއްގައި ބެހެއްޓުމަށް އަމުރުކޮށް ބަންދަށް 7 ދުވަސް ޖަހާފަ އެވެ.
ކްރިމިނަލް ކޯޓުގެ އަމުރުގައި ބުނެފައިވަނީ، ތުހުމަތުކުރެވޭ ކުށް ދެމީހުން ކުރި ކަމަށް ކޮންމެވެސް މިންވަރެއްގެ ހެކި ހުށަހަޅާފައިވާ ކަމަށާއި، ހާދިސާގެ ރިޕޯޓު ހުށަހަޅާފައިވާ ކަމަށެވެ. މިރިޕޯޓަށް ބަލާއިރު، ހުޅުމާލެ ސެންޓްރަލް ޕާކު ތެރޭގައި ބިދޭސީންގެ މެދުގައި ހިނގި މާރާމާރީއެއްގައި ދެމީހުން ބައިވެރިވި ކަމަށް ބެލެވޭ ކަމަށާއި، އިތުރު ބައެއްގެ ބައިވެރިވިކަން އޮތް ކަމަށް ވެސް ބެލެވޭ ކަމަށެވެ. އަދި މާރާމާރީގައި ބައިވެރިވި ދެ މީހަކު ފިލާފައިވާ ކަމަށް ފުލުހުން ކޯޓުގައި ބުނެފައިވެ އެވެ.
މީގެ އިތުރުން އެ ދެ މީހުންގެ ސްޕޮންސަރާ ގުޅޭނެ އިންތިޒާމު ހަމަޖައްސައި، ސްޕޮންސަރުގެ ބަހެއް ހޯދުމަށް ވެސް އަމުރުގައިވެ އެވެ.
މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
