ބަންދުގެ މުއްދަތު އިންތިހާއަށް ގިނަ މީހަކަށް ޝަރީއަތުން ނަސޭހަތްތެރިވުން: ''ކުށްތަކަށް ތަކުރާރުކޮށް އަރައިގަނެވެނީ ވަޒީފާއެއް ނެތި، މަގުމަތީގައި ދިރިއުޅެން ޖެހުމުން''
ވައްކަމުގެ ތުހުމަތުގައި ހައްޔަރުކުރި ޅ. ކުރެންދޫ އަބްދުﷲ ޝަރީފްގެ ބަންދަށް ކްރިމިނަލް ކޯޓުން 5 ދުވަސް ވަނީ ޖަހާފައި. ގިނަ ކުށުގެ ރެކޯޑް އޮތް މި މީހާ ކޯޓުގައި ބުނީ ކުށްތަކަށް އަރައިގަނެވެނީ ވަޒީފާއެއް ނެތި މަގުމަތީގައި ދިރިއުޅެން ޖެހުމުން ކަމަށް. އޭނާގެ ހާލަތަށް ރިއާޔަތްކޮށް ބަންދުކުރާ ތަން އުފަން ރަށަށް ބަދަލުކޮށް ދިނުމަށް ޝަރީއަތުން ވަނީ ފުލުހުންނަށް އިރުޝާދު ދީފައި. އޭނާ ހައްޔަރުކުރީ މޯލްޑިވްސް ޑިޖިޓަލް ސާވިސްގެ ތެރެއަށް ވަދެ ވައްކަން ކުރަން އުޅެނިކޮށް ކަމަށާއި، އޭނާ ފެނުނު އިރު އިނީ ރަމަޟާން މަހު ދުވާލު ވަގުތުގައި ކާން ކަމަށް ފުލުހުން ބުނޭ.
ފުލުހުންގެ ހިންގި ޚާއްސަ އޮޕަރޭޝަނެއްގައި ބަޔަކު ހައްޔަރު ކުރަނީ. | މޯލްޑިވްސް ޕޮލިސް
ބަންދުގެ މުއްދަތު އިންތިހާއަށް ގިނަވެ، ޝަރީއަތުން ނަސޭހަތްތެރިވުމުން ކުށްތަކަށް ތަކުރާރުކޮށް އަރައިގަނެވެނީ ވަޒީފާއެއް ނެތި، މަގުމަތީގައި ދިރިއުޅެން ޖެހުމުން ކަަމަށް ކްރިމިނަލް ކޯޓަށް ބަންދުގެ މުއްދަތު ޖެހުމަށް ގެންދިޔަ މީހަކު ބުނެފި އެވެ.
ހޮނިހިރު ދުވަހު، ވައްކަން ކުރި ކަމުގެ ތުހުމަތުގައި ހައްޔަރުކޮށް، ބަންދު މުއްދަތު ޖެހުމަށް ކޯޓަށް ހާޒިރުކޮށްފައިވަނީ ޅ. ކުރެންދޫ އަށް ނިސްބަތްވާ 48 އަހަރުގެ، އަބްދުﷲ ޝަރީފް އެވެ. އޭނާ ގެ ބަންދަށް 5 ދުވަސް ޖަހައި ކަސްޓޯޑިއަލް ޖަލެއްގައި ބެހެއްޓުމަށް އަމުރު ކޮށްފައިވެ އެވެ.
ކޯޓު އަމުރުގައިވާ ގޮތުން، މޯލްޑިވްސް ޑިޖިޓަލް ސަރވިސްގެ ތެރެއަށް ވަދެ ވައްކަން ކުރަން އުޅެ، އިމާރާތުގެ ކެމެރާ ޑައިރެކްޝަން ބަދަލުކޮށްފައިވާ ކަމަށް ބެލެވޭ ކަމަށާއި، އޭނާ ފެނުނު އިރު އިނީ ރަމަޟާން މަހު ދުވާލު ވަގުތުގައި ކާން ކަމަށް ފުލުހުން ކޯޓުގައި ބުނެފައިވެ އެވެ. އޭނާ ކައިރީގައި ރޫޅާލާފައިވާ އޭސީ އައުޓްޑޯ ޔުނިޓަކާއި ރޫޅާލަން ބޭނުންކުރާ ޓޫލްސް ފެނިފައިވާ ކަމަށާއި، ޝަރީފްއާ ސީންގައި ސުވާލުކުރުމުން ފުރަތަމަ ބުނެފައިވަނީ ވަރުބަލި ވެގެން އަރާމު ކޮށްލަން އެތަނަށް ވަނީ ކަމަށެވެ. އަދި ފަހުން ބުނެފައިވަނީ އޭނާއާ އިތުރު ދެމީހަކު ވެގެން ވައްކަން ކުރީ ކަމަށާއި، ބައިވެރިވި ދެމީހުން އެތަނުން ފިލާފައިވާ ކަމަށެވެ.
ނަމަވެސް ޝަރީއަތުގައި ތުހުމަތަށް އިންކާރުކޮށް ތަކުރާރުކޮށް ބުނެފައިވަނީ އެތަނަށްވަނީ ވަރުބަލި ވެގެން ކަމަށެވެ.
ޝަރީފްއަކީ މަސްތުވާތަކެއްޗާ ވައްކަމާ ގުޅުންހުރި ރެކޯޑް އޮތް މީހަކަށްވާއިރު، އޭނާ ގެ މައްޗަށް ތުހުމަތު ކުރެވޭ ކަންކަމާއި ހައްޔަރު/ބަންދު އިންތިހާއަށް ގިނަކަމުން އޭނާ އަށް ޝަރީއަތުން ވަނީ ނަސޭހަތްތެރިވެފަ އެވެ. އެކަމާ ގުޅިގެން އަސަރާއެކު އޭނާ ބުނީ، ދިރިއުޅޭނެ އެއްވެސް ބޯހިޔާވަހިކަމެއް ނެތްކަމަށާއި، ވަޒީފާއެއް ނެތް ކަމާއި ނިދަނީ ވެސް މަގުމަތީގައި ނުވަތަ ޖޯލިތަކުގައި ކަމަށެވެ.
ނަމަވެސް މީގެ ކުރިން ވެސް އުފަން ރަށަށް ބަދަލުވުމަށް އޭނާ އެދިގެން އެފުރުސަތު ފަހި ކޮށްދީފައިވާ ކަމަށް ކޯޓުގައި މި މައްސަލަ ތަހުގީގު ކުރާ ފުލުހުންގެ އޮފިސަރު ވިދާޅުވި އެވެ. ޝަރީފް ބުނާގޮތުގައި ރަށަށް ބަދަލު ނުވެވުނީ އޭނާ ޖޯއްޔެއްގައި ނިދާފައި އޮއްވައި ޖީބު ކީހާލައިގެން ފައިސާއާއި ފޯނު ވަގައް ނަގާފައިވާތީ ކަމަށެވެ.
އޭނާ ގެ ހާލަތަށް ރިއާއަތް ކޮށް ފުލުހުންގެ އިންތިޒާމްތަކުގެ ތެރެއިން އޭނާ ބަންދުގައި ބަހައްޓާތަން އުފަން ރަށް ހިމެނޭ ތަނަކަށް ބަދަލު ކުރެވިއްޖެނަމަ އެކަން ހާސިލްވާނެ ކަމަށް ޝަރީއަތަށް ފެންނަ ކަމަށް ބުނެފައިވެ އެވެ.
