މަރާލާނެކަމަށް ބުނެ ބިރުދެއްކި މީހަކު 15 ދުވަހަށް ބަންދުކޮށްފި
19 ފެބުރުއަރީ 2026 | ބުރާސްފަތި 10:17މީހަކަށް މަރުގެ އިންޒާރު ދިން މައްސަލައެއްގައި ހއ. ހޯރަފުށީ، ނޫވިލް، އަހުމަދު ފައިރިޝް 15 ދުވަހަށް ބަންދުކުރުމަށް ކްރިމިނަލް ކޯޓުން އަމުރުކޮށްފި. މާރާމާރީ އާއި އިންޒާރު ދިނުމުގެ ގިނަ ރެކޯޑުތަކެއް އޮތް މި މީހާ ބަންދުކުރަން ނިންމީ، އޭނާގެ ފަރާތުން މުޖުތަމައުގެ ސަލާމަތަށް ނުރައްކާވެދާނެ ކަމަށް ބަލައި ހުށަހެޅިފައިވާ ހެކިތަކަށް ރިއާޔަތްކުރުމަށްފަހު.
ކްރިމިނަލް ކޯޓް ބިލްޑިންގް | ރާއްޖެ އެމްވީ
މަރާލާނެކަމަށް ބުނެ ބިރުދެއްކި މީހަކު 15 ދުވަހަށް ބަންދުކޮށްފި އެވެ.
މަރާލާނެ ކަމަށް ބުނެ ބިރުދައްކާ އިންޒާރު ދިން މައްސަލައިގައި ބަންދު ކޮށްފައިވަނީ ހއ. ހޯރަފުށީ / ނޫވިލްގެ އަހުމަދު ފައިރިޝް އެވެ. މި އަމުރަކީ ޖިނާއީ އިޖުރާއާތުގެ ޤާނޫނުގެ ދަށުން ކަސްޓޯޑިއަލް ޖަލެއްގައި ބަހައްޓަން ކޯޓުން ނިންމި އަމުރެކެވެ.
ފައިރިޝްގެ ބަންދު ފެށުނީ 2026 ފެބްރުއަރީ 18 ވަނަ ދުވަހުގެ ހަވީރު 12:35 ގަ އެވެ. އޭނާގެ ބަންދު ހަމަވާނީ 2026 މާރިޗު 5 ވަނަ ދުވަހުގެ ހަވީރު 12:34 ގަ އެވެ.
ކްރިމިނަލް ކޯޓުން ބަންދުގެ އަމުރު ނެރުނީ ތުހުމަތުކުރެވޭ އެކަށީގެންވާ މިންވަރުގެ ހެކި ލިބިފައިވާތީއެވެ. ހުށަހެޅިފައިވާ ހެއްކެއްގެ ބަޔާނުން މީނާ އަނިޔާ ދޭނެކަމުގެ އިންޒާރު ދީފައިވާކަން އެނގިފައިވާކަމަށް ކޯޓުން ބުނެ އެވެ. މި މައްސަލައިގައި ތުހުމަތުކުރެވޭ ފަރާތުން މީނާއަށް ހަމަލާދީ އަނިޔާކުރުމުގެ ނުރައްކާ ކުރިމަތިވެދާނެކަމަށް ކޯޓުން ބުނެ އެވެ.
ބަންދުގެ އަމުރު ނެރުމުގައި ކޯޓުން ރިޢާޔަތްކުރީ ޤާނޫނުއަސާސީގެ 49 ވަނަ މާއްދާއާއި ޖިނާއީ އިޖުރާއާތުގެ ޤާނޫނުގެ 59 ވަނަ މާއްދާއާއި 60 ވަނަ މާއްދާއަށެވެ. ބަންދު ކުރީ މުޖުތަމަޢުގެ ސަލާމަތަށް ނުރައްކަލެއް ކުރިމަތިވެދާނެކަމަށްޓަކަ އެވެ.
ކޯޓުން ބުނީ މީނާގެ ކުށުގެ ރެކޯޑަށް ބަލާއިރު، އެކި ބާވަތްތަކުގެ ގިނަ އަދަދެއްގެ މައްސަލަތަކުގެ ތުހުމަތުގައި ހައްޔަރުކުރެވިފައިވާ އިރު، އިންޒާރުދިނުމާއި، އަނިޔާދީ މާރާމާރީ ހިންގުމުގެ މައްސަލަތައް މީގެ ތެރޭގައި ހިމެނެ އެވެ. އަދި މީނާ އިންޒާރުދީފައިވަނީ އެކި އަނިޔާތަށް ދޭނެ ކަމަށް ބުނެ ކަމުގައިވާ އިރު، މި ބާވަތުގެ މައްސަލަތަކެއްގެ ރެކޯޑު ހުރުމުން މީނާ މި ބާވަތުގެ އަނިޔާއެއް ދިނމުހެ ކުށެއް ކުރުމުގެ އިހްތިމާލު ވުޖޫދުވާ ކަމަށް ބުނެފައިވެ އެވެ.
