އެމެރިކާގެ ބާރުވެރިކަމާ ދެކޮޅަށް އީރާން އިން އަމާންނުދޭތީ ޓްރަމްޕް ހުންނެވީ އަޖައިބުވެފައި، އެކަމާ ސުވާލު ވެސް އުފައްދަވައިފި

އެމެރިކާގެ އަސްކަރީ ބާރުތައް މެދު އިރުމައްޗަށް ޖަމާކޮށް، ނިއުކްލިއާ އެއްބަސްވުމަކަށް އައުމަށް އީރާން އަށް ބާރު ބޮޑު ކުރަމުންދާއިރު، އެ ޤައުމުން އަދި ވެސް އަމާންނުދީ އޮތް އޮތުމާ އެކު، އެމެރިކާގެ ރައީސް ޑޮނަލްޑް ޓްރަމްޕް ސުވާލު އުފައްދަވާފައިވާ ކަމަށް، ޓްރަމްޕްގެ ޚާއްސަ މަންދޫބު ސްޓީވް ވިޓްކޮފް ވިދާޅުވެއްޖެ އެވެ. 

ހޮނހިރު ދުވަހު ވިޓްކޮފް މިހެން ވިދާޅުވެފައިވާއިރު، އެމެރިކާ އިން ދެ މަތިންދާ ބޯޓު އުފުލާ މަނަވަރާއި، ހަނގުރާމަ މަތީ ބޯޓުތަކާއި، ގިނަ އަދަދެއްގެ ހަތިޔާރު އެ ސަރަހައްދަށް ފޮނުވައި އިންޒާރު ދިނުމާ ގުޅިގެން، އަސްކަރީ ގޮތުން ކުރިމަތިލުމަކަށް ދިޔަ ނުދިނުމަށްޓަކައި ދެ ޤައުމުގެ ދެ މެދުގައި މަޝްވަރާތައް ވެސް ފަށާފައިވާ ދަނޑިވަޅެއްގަ އެވެ. 

އޮމާން މެދުވެރިވެގެން މަޝްވަރާތައް އަލުން ފަށާފައިވާއިރު، ދެ ވަނަ ބުރުގެ ބައްދަލުވުން ބާއްވާފައި ވަނީ ސްވިޒަލެންޑުގެ ޖެނީވާގަ އެވެ. އެ ބައްދަލުވުމަށް ފަހު ދެ ޤައުމުން ވެސް ވަނީ، ތިން ވަނަ ބުރުގެ ބައްދަލުވުމެއް ބާއްވަން އެއްބަސްވެފަ އެވެ. 

ވިޓްކޮފް ވިދާޅުވީ އެއްބަސްވުމަކަށް ނުދެވިއްޖެ ނަމަ، ނުރައްކާތެރި ނަތީޖާއަކާ ކުރިމަތިލާން ޖެހޭނެ ކަމުގެ އިންޒާރު ދެއްވާފައި ވަނިކޮށް، އީރާން އިން މިހާރު ގެންގުޅޭ ސިޔާސަތާ މެދު ޓްރަމްޕް ހުންނެވީ އަޖައިބުވެފައި ކަމަށެވެ. އެގޮތުން އޭނާ ވިދާޅުވީ، ރައީސް ޓްރަމްޕް ހުންނެވީ މާޔޫސްވެވަޑައިގެންފައި ކަމަށް ބުނަން ބޭނުން ނުވާ ކަމަށެވެ. ސަބަބަކީ ޓްރަމްޕްގެ އަތުގައި އިތުރު ބާރު ތަކެއް އޮތުން ކަމަށް ވިޓްކޮފް ވިދާޅުވެފައިވެ އެވެ. 

ނަމަވެސް، އެމެރިކާ އިން މިހާރު ވެސް އަސްކަރީ ގޮތުން ބޮޑު ބާރުވެރި ކަމެއް ދައްކަމުން އަންނައިރު، އީރާން އިން އަމާންދީ އަދި ނިއުކްލިއާ ހަތިޔާރު ބޭނުން ނުވާ ކަމަށް ބުނެ އެއްބަސްވުމަކަށް އައުމަށް ތައްޔާރު ނުވާތީ، އެކަމަށް ޓްރަމްޕް ސުވާލު އުފައްދަވާފައިވާ ކަމަށް ވިޓްކޮފް ވިދާޅުވި އެވެ.

މީގެ އިތުރުން އެ އިންޓަވިޔުގައި ވިޓްކޮފް ވަނީ އީރާންގެ ކުރީގެ ރަސްކަލުންގެ ދަރިކަލުން، އަދި މިހާރު އެ ޤައުމުގައި އޮތް ސަރުކާތާ ދެކޮޅު ބޭފުޅެއްގެ ގޮތުގައި ހުންނެވި ރެޒާ ޕަހްލަވީއާ ބައްދަލު ކުރައްވާފައިވާކަން ކަށަވަރު ކޮށްދެއްވައިފަ އެވެ. 1979 ވަނަ އަހަރުގެ އިންޤިލާބަށް ފަހު ޤައުމުން ބޭރުގައި ދިރިއުޅެމުން އަންނަ ޕަހްލަވީއާ ބައްދަލު ކުރެއްވީ ޓްރަމްޕްގެ އިރުޝާދުގެ މަތިން ކަމަށް ވެސް ވިޓްކޮފް ވިދާޅުވެފައިވެ އެވެ. 

ޕަހްލަވީ އަކީ ޤައުމަށް ވަފާތެރި ބޭފުޅެއް ކަމަށް ޤަބޫލު ކުރެއްވި ނަމަވެސް، ކުރިއަށް އޮތް ތަނުގައި ކަންކަން ނިންމާނީ ރައީސް ޓްރަމްޕްގެ ސިޔާސަތު ތަކުގެ މައްޗަށް ބިނާކޮށް ކަމަށް ވިޓްކޮފް ފާހަގަ ކުރެއްވި އެވެ. ވިޓްކޮފް މިހެން ވިދާޅުވެފައިވާއިރު، މިދިޔަ ހަފުތާގެ ތެރޭގައި ބަޔާންގެ މިއުނިކްގައި ވާހަކަ ދައްކަވަމުން ޕަހްލަވީ ވަނީ އީރާންގައި ޑިމޮކްރަޓިކް ވެރި ކަމެއް ޤާއިމު ކުރުމަށް އިސް ނެންގެވުމަށް ތައްޔާރަށް ހުންނެވި ކަމަށް ވިދާޅުވެފަ އެވެ.

ޓްރަމްޕްގެ ޚާއްސަ މަންދޫބެއްގެ ގޮތުގައި ހުންނަވާ ވިޓްކޮފް މިފަަދައިން ވިދާޅުވެފައި މި ވަނީ، އެމެރިކާ އާއެކު އެކުލަވާލާ އެއްބަސްވުމުގެ ދެލި ކޮޕީ ކުރިއަށް އޮތް މަދު ދުވަސް ކޮޅެއްގެ ތެރޭގައި ތައްޔާރު ވާނެ ކަމަށް އީރާންގެ ޚާރިޖީ ވަޒީރު އައްބާސް އަރާގްޗީ ވިދާޅުވެފައިވާ ދަނޑިވަޅެއްގައިކަން ފާހަގަ ކުރެވެ އެވެ. މިދިޔަ ބުރާސްފަތި ދުވަހު ޓްރަމްޕް ވިދާޅުވެފައި ވަނީ، އެއްބަސްވުމަކަށް އައުމަށް އީރާން އަށް އޮތީ 15 ދުވަހުގެ މުއްދަތެއް ކަމަށެވެ. 

ދެ ޤައުމުގެ ދެ މެދުގައި ހޫނު ބަހުގެ ހަމަލާތަކެއް ބަދަލު ކުރަމުން އަންނައިރު، ޓްރަމްޕް އަށް ރައްދު ދެއްވައި އީރާންގެ ރޫހާނީ ލީޑަރު އާޔަތުﷲ އަލީ ޚާމަނާއީ ވިދާޅުވެފައި ވަނީ، އީރާންގެ އިސްލާމީ ޖުމްހޫރިއްޔާ ނައްތާލުމަށް ޓްރަމްޕް ކުރައްވާ މަސައްކަތް ކާމިޔާބު ނުވާނެ ކަމަށެވެ.