އެމެރިކާގެ ސަފީރަށް ފްރާންސްގެ ވަޒީރުންނާ ބައްދަލު ކުރުން މަނާ ކޮށްފި

ފްރާންސްގައި ހުންނަވާ އެމެރިކާގެ ސަފީރު ޗާލްސް ކުޝްނާ އަށް، ފްރާންސް ސަރުކާރުގެ ވަޒީރުންނާ ބައްދަލު ކުރުން މަނާ ކޮށްފި އެވެ. 

ފްރާންސް އިން މި ފިޔަވަޅު އަޅާފައި ވަނީ ހޯމަ ދުވަހު އެވެ. މި ފިޔަވަޅު އަޅާފައި ވަނީ ކަނާއަތު ފިޔައިގެ އެކްޓިވިސްޓަކު މަރުވި މައްސަލައާ ގުޅުން ހުރި ބަހުސްތަކާ ގުޅިގެން، ސަފީރުއާއި ސުވާލު ކުރުމަށް ހާޒިރުވާން އަންގާފައި ވަނިކޮށް، އޭނާ ހާޒިރުވެފައި ނުވާތީ އެވެ. 

މިއީ އެމެރިކާގެ ރައީސް ޑޮނަލްޑް ޓްރަމްޕްގެ ވެރިކަމުގައި، އެމެރިކާ އާއި ފްރާންސްއާ ދެމެދު އޮތް ނުތަނަވަސްކަމަށް އިތުރު ވެގެން ދިޔަ މައްސަލަ އެކެވެ. ފްރާންސް އިން ތުހުމަތު ކޮށްފައި ވަނީ، އެމެރިކާ އިން އެ ޤައުމުގެ ޤައުމީ މަސްލަހަތު ތަކުގައި ބައިވެރިވަމުން އަންނަ ކަމަށެވެ. 

ކުޝްނާގެ ދަރިކަލުން ޖެރާޑް ކުޝްނާ އަކީ ޓްރަމްޕްގެ ދަނބި ދަރިކަލުންނެވެ. ޓްރަމްޕްގެ އިވާންކާ ޓްރަމްޕްއާ ކައިވެރި ކުރައްވައިގެން އުޅުއްވާ ޖެރާޑް ކުޝްނާ އަކީ، ޓްރަމްޕްގެ ޚާއްސަ މަންދޫބެއްގެ ގޮތުގައި ވެސް މަސައްކަތް ކުރައްވަމުން އަންނަ ފަރާތެކެވެ. މީގެ ކުރިން ވެސް ޗާލްސް ކުޝްނާ އަށް ހާޒިރުވާން އަންގާފައި އޮތްއިރު، އެފަހަރު ވެސް ވަޑައިނުގެން އޭނާ ވަނީ އެހެން މީހަކު ފޮނުއްވައިފަ އެވެ. އެފަހަރު އެއީ ފްރާންސް އިން ޔަހޫދީންނާ ދެކޮޅަށް ކުރާ އަމަލުތަކާ ގުޅިގެން ޗާލްސް ކުޝްނާ ފްރާންސް އަށް ފާޑު ވިދާޅުވުމާ ގުޅިގެންނެވެ. 

ފްރާންސްގެ ފޮރިން މިނިސްޓްރީ އަށް ހާޒިރުވުމަށް ޗާލްސް ކުޝްނާ އަށް އަންގަވާފައި ވަނީ، ފްރާންސްގެ ފޮރިން މިނިސްޓަރު ޖީން ނޮއެލް ބަރޮޓް އެވެ. އެއީ މި ހިނގާ ފެބްރުވަރީ މަހުގެ ތެރޭގައި މަރުވި ކަނާއަތު ފިޔައިގެ އެކްޓިވިސްޓެއް ކަމަށްވާ، ކުއެންޓިން ޑެރާންކްގެ މައްސަލައާ ގުޅިގެން، ފްރާންސްގައި ހުންނަ އެމެރިކާގެ އެމްބަސީ އިން އެކަމުގައި ވާހަކަ ދައްކާފައިވާތީ އެވެ. 

އާދީއްތަ ދުވަހު ފްރާންސްގެ ފޮރިން މިނިސްޓަރު ބަރޮޓް ވިދާޅުވީ، މި މަރުގެ މައްސަލަ ސިޔާސީ މަޤުސަދަކަށް ބޭނުން ކުރުމަކީ ޤަބޫލު ކުރެވޭނެ ކަމެއް ނޫން ކަމަށެވެ. އަދި އޭނާ ވަނީ ސުވާލު ކުރުމަށް ޗާލްސް ކުޝްނާ ހާޒިރު ކުރުމަށް ވެސް ގޮވާާލައްވައިފަ އެވެ. ނަމަވެސް، ޑިޕްލޮމެޓިކް ވެރިންގެ މައުލޫމާތަށް ބަލާއިރު، ކުޝްނާ ވިދާޅުވެފައި ވަނީ އަމިއްލަ ކަންތައްތަކެއް ހުރި ކަމަށާއި، އެހެންވެ އެހެން އޮފިޝަލަކު ފޮނުވާފައިވާ ކަމަށެވެ. 

އެއާ އެކު ފްރާންސްގެ ފޮރިން މިނިސްޓްރީ އިން ބުނެފައި ވަނީ، ސަފީރު ކަމުގެ މަސައްކަތުގެ އަސާސީ ބޭނުންތައް ޗާލްސް ކުޝްނާ، ނުވިސްނިވާތީ، އަދި ޤައުމެއް ތަމްސީލު ކުރުމުގެ ޝަރަފަށް އިޙުތިރާމް ނުކުރާތީ، އޭނާ އަށް ފްރާންސް ސަރުކާރުގެ ވަޒީރުންނާ ސީދާ ބައްދަލު ކުރުން މަނާ ކޮށްފައިވާ ކަމަށެވެ. ނަމަވެސް، ޑިޕްލޮމެޓިކް މަސައްކަތްތައް ކުރިއަށް ގެންދިޔުމާއި، އޮފިޝަލުންނާ ވާހަކަ ދެއްކުމުގެ ފުރުސަތި ދެވޭނެ ކަމަށް ބުނެފައިވެ އެވެ.

މި މައްސަލައިގައި މިހާތަނަށް އެމެރިކާ އިން ވަކި އެއްޗެއް ބުނެފައި ނުވެ އެވެ.