ކުލަބު ބްރޫޖް އިން އެތުލެޓިކޯ މޮޅުވިޔަ ނުދީ ހިފަހައްޓައިފި

ޔުއެފާ ޗެމްޕިއަންސް ލީގުގެ ޕްލޭ އޮފްގެ ފުރަތަމަ ލެގުގައި ކުލަބު ބްރޫޖްއާ ދެކޮޅަށް ކުޅުނު މެޗުން، އެތުލެޓިކޯ މެޑްރިޑް އެއްވަރުވެއްޖެ އެވެ. 

ބުދަ ދުވަހުގެ ރޭ ކުލަބު ބްރޫޖްގެ އަމިއްލަ ދަނޑުގައި ކުޅުނު މެޗު ނިމުނީ ދެ ޓީމު 3-3 އިން އެއްވަރު ވެގެންނެވެ. މެޗުގައި އެތުލެޓިކޯ އިން ދެ ފަހަރެއްގެ މަތިން ކުރި ހޯދިއިރު ވެސް، ދެ ފަހަރު ވެސް ކުލަބު ބްރޫޖް އިން ވަނީ ނަތީޖާ ހަމަހަމަ ކޮށްފަ އެވެ.

މެޗު ފަށައިގެން އަށް ވަނަ މިނެޓުގައި އެތުލެޓިކޯ އަށް ލިބުނު ޕެނަލްޓީ ކާމިޔާބުކޮށް ލީޑު ނަގައިދިނީ އާޖެންޓީނާގެ ހޫލިއަން އަލްވަރޭޒް އެވެ. އޭގެ ފަހުން ފުރަތަމަ ހާފުގެ އިތުރު ވަގުތުގައި އަޑެމޮލާ ލުކްމަން ވަނީ އެތުލެޓިކޯގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

މެޗުގެ ދެ ވަނަ ހާފު ފަށައިގެން ހަތް ވަނަ މިނެޓުގައި ކުލަބު ބްރޫޖްގެ ފުރަތަމަ ލަނޑު ޖަހައި ފަރަގު ކުޑަ ކޮށްދިނީ ރަފައެލް އޮންޔެޑިކާ އެވެ. އޭގެ އަށް މިނެޓު ފަހުން ކުލަބު ބްރޫޖް އިން ވަނީ ދެ ވަނަ ލަނޑެއް ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ނިކޮލޯ ޓްރެސޮލްޑީ އެވެ. 

ކުލަބު ބްރޫޖް އިން ނަތީޖާ ހަމަހަމަ ކޮށްފައި ވަނިކޮށް، މެޗުގެ 78 ވަނަ މިނެޓުގައި ދެ ވަނަ ފަހަރަށް އެތުލެޓިކޯ އަށް ލީޑު ލިބުނީ ކުލަބު ބްރޫޖްގެ ޔޮއެލް އޯޑޮނެޒް އަތުން ބައި ކޮޅަށް ވަތް ލަނޑުންނެވެ. ނަމަވެސް، މެޗުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް، ކުލަބު ބްރޫޖްގެ ތިން ވަނަ ލަނޑު ޖަހައި ނަތީޖާ ހަމަހަމަ ކޮށްދިނީ ކްރިސްޓޮސް ޒޮލިސް އެވެ.

ޕްލޭ އޮފްގެ ފުރަތަމަ ލެގު އެއްވަރުވެފައިވާއިރު، ދެ ވަނަ ލެގު އޮންނާނީ އެތުލެޓިކޯގެ އަމިއްލަ ދަނޑުގަ އެވެ. މުބާރާތުގެ ގަދަ 16 ވަނަ ބުރުން ޖާގަ ލިބޭނީ އެ މެޗުން މޮޅުވާ ޓީމަކަށެވެ.