ފަހަތުން އަރައި މޮޅުވެ، ބާސެލޯނާ އިން ގަދަ 16ގެ ޖާގަ ކަށަވަރު ކޮށްފި

ޔުއެފާ ޗެމްޕިއަންްސް ލީގުގައި ކޯޕަންހޭގަންއާ ދެކޮޅަށް ކުޅުނު މެޗުން މޮޅުވެ، ބާސެލޯނާ އިން މުބާރާތުގެ ގަދަ 16 ގެ ޖާގަ ކަށަވަރު ކޮށްފި އެވެ. 

ބާސެލޯނާގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 4-1 އިންނެވެ. މެޗުގައި ކޯޕަންހޭގަން އިން ލަނޑު ޖަހައި ކުރި ހޯދާފައި ވަނިކޮށް، ބާސެލޯނާ އިން ވަނީ ފަހަތުން އަރައި ހަތަރު ލަނޑު ޖަހައިގެން މޮޅުވެފަ އެވެ.

މެޗު ފަށައިގެން ހަތަރު ވަނަ މިނެޓުގައި ކޯޕަންހޭގަން އަށް ލީޑު ނަގައިދިނީ ވިކްޓާ ޑަޑަސަން އެވެ. އޭގެ ފަހުން މެޗުގައި ލަނޑު ޖަހަން ބާސެލޯނާ އިން ގިނަ މަސައްކަތް ތަކެއް ކުރިއިރު، އެ ޓީމުގެ ހަތަރު ލަނޑު ވެސް ޖެހީ މެޗުގެ ދެ ވަނަ ހާފުގަ އެވެ.

މެޗުގެ ދެ ވަނަ ހާފު ފަށައިގެން ތިން ވަނަ މިނެޓުގައި ބާސެލޯނާ އަށް ނަތީޖާ ހަމަހަމަ ކޮށްދިނީ ރޮބާޓް ލެވަންޑޯސްކީ އެވެ. އޭގެ ފަހުން މެޗުގެ 60 ވަނަ މިނެޓުގައި ލަމީން ޔަމާލް ވަނީ ބާސެލޯނާގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. 

އޭގެ ނުވަ މިނެޓު ފަހުން ބާސެލޯނާގެ ތިން ވަނަ ލަނޑަކީ އެ ޓީމަށް ލިބުނު ޕެނަލްޓީ ކާމިޔާބުކޮށް ރަފީނިއާ ޖެހި ލަނޑެކެވެ. އަދި މެޗުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް ބާސެލޯނާގެ ހަތަރު ވަނަ ލަނޑު ޖެހީ މާކަސް ރަޝްފޯޑު އެވެ.

މޮޅާ އެކު ބާސެލޯނާ އިން ގަދަ 16ގެ ޖާގަ ހޯދީ ފަސް ވަނައިގަ އެވެ. އެއީ ބާސެލޯނާ ކުޅެފައިވާ އަށް މެޗުން 16 ޕޮއިންޓާ އެކު އެވެ.