ރެއާލް އިން ބެންފީކާ ބަލިކުރިއިރު، ވިނީޝިއުސްއާ ނަސްލީ ގޮތުން ދިމާކޮށްލުމުން މެޗު ހޫނުވެއްޖެ

ޔުއެފާ ޗެމްޕިއަންސް ލީގުގެ ޕްލޭ އޮފްގެ ފުރަތަމަ ލެގުގައި ބެންފީކާ ބަލިކޮށް، ރެއާލް މެޑްރިޑް އިން މުބާރާތުގެ ގަދަ 16 ވަނަ ބުރުގެ އުންމީދު ބޮޑު ކޮށްފި އެވެ.

ބެންފީކާގެ އަމިއްލަ ދަނޑުގައި އަންގާރަ ދުވަހުގެ ރޭ ކުޅުނު މެޗު ރެއާލް އިން ކާމިޔާބު ކުރީ 1-0 އިންނެވެ. ޕްލޭ އޮފް މެޗުގެ ކުރިން، މުބާރާތުގެ ލީގު ބުރުގައި ވެސް ބެންފީކާ އާއި ރެއާލް ވަނީ ބައްދަލު ކޮށްފަ އެވެ. އެ މެޗުގައި ބެންފީކާ އިން ވަނީ ރެއާލްގެ މައްޗަށް ކުރި ހޯދައިފަ އެވެ.

މެޗުގެ ފުރަތަމަ ހާފުގައި ދެ ޓީމަށް ވެސް ލަނޑު ޖަހާނެ ފުރުސަތު ލިބުނުއިރު، އެއްވެސް ޓީމަކަށް ފުރުސަތުގެ ބޭނުމެއް ނުކުރެވުނެވެ. މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި ރެއާލް އިން ވަނީ ލަނޑު ޖަހައި ލީޑު ނަގައިފަ އެވެ. ފްރާންސްގެ ކެޕްޓަން ކީލިއަން އެމްބާޕޭ ތަނަވަސްކޮށްދިން ފުރުސަތެއްގައި ރެއާލް އަށް ލީޑު ނަގައިދިނީ ބްރެޒިލްގެ ވިނީޝިއުސް ޖޫނިއާ އެވެ.

ރެއާލް އިން ލީޑު ނެގި ފަހުން ބެންފީކާގެ ބައެއް ކުޅުންތެރިން ވިނީޝިއުސްއާ ނަސްލީ ގޮތުން ދިމާ ކޮށްލުމުގެ ސަބަބުން މެޗު ވަރަށް ބޮޑަށް ހޫނުވެގެން ދިޔަ އެވެ. ދެ ޓީމުގެ ކުޅުންތެރިންގެ ދެ މެދުގައި ދެބަސްވުން ތަކެއް ހިނގިއިރު، ގާތް ގަނޑަކަށް 10 މިނެޓު ވަންދެން މެޗު މެދު ކަނޑާލަން ވެސް ޖެހުނެވެ. ދެ ޓީމުގެ ކުޅުންތެރިން ވަނީ އެއް ކުޅުންތެރިޔަކު އަނެއް ކުޅުންތެރިޔަކަށް ބަހުގެ ހަމަލާތައް އަމާޒުކޮށްފަ އެވެ.

މެޗުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް، ބެންފީކާގެ ކޯޗު ހޯސޭ މޮރީނިއޯ އަށް ވަނީ ދެ ވަނަ ރީނދޫ ކާޑާ އެކު ރަތް ކާޑު ދައްކައިފަ އެވެ. މީގެ ސަބަބުން ރެއާލްގެ އަމިއްލަ ދަނޑުގައި ކުޅޭ ޕްލޭ އޮފްގެ ދެ ވަނަ މެޗުގައި މޮރީނިއޯ އަށް ބެންޗުގައި ނުހުރެވޭނެ އެވެ.

ރެއާލް އަމިއްލަ ދަނޑުގައި ކުޅޭ ދެ ވަނަ ލެގުގައި ބެންފީކާއާ ދެކޮޅަށް އެ ޓީމު ނިކުންނާނީ ފެބްރުވަރީ މަހުގެ 26 ވަނަ ދުވަހު އެވެ.