ސޮސިއެޑާޑް ބަލިކޮށް، ރެއާލް އެއް ވަނަ އަށް

ސްޕެނިޝް ލީގުގައި ރެއާލް ސޮސިއެޑާޑްއާ ދެކޮޅަށް ކުޅުނު މެޗުން މޮޅުވެ، ރެއާލް މެޑްރިޑް އިން ލީގު ތާވަލްގެ އެއް ވަނަ މަގާމަށް ޖެހިލައިފި އެވެ. 

ރެއާލްގެ އަމިއްލަ ދަނޑުގައި ހޮނިހިރު ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 4-1 އިންނެވެ. މެޗުގެ ފުރަތަމަ ހާފުގައި ރެއާލް އިން ތިން ލަނޑު ޖެހިއިރު، ސޮސިއެޑާޑް އިން ވެސް ލަނޑެއް ޖެހި އެވެ. ރެއާލް އިން އަނެއް ލަނޑު ޖެހީ މެޗުގެ ދެ ވަނަ ހާފުގަ އެވެ.

މެޗު ފަށައިގެން ފަސް ވަނަ މިނެޓުގައި ރެއާލް އަށް ލީޑު ނަގައިދިނީ ގޮންޒާލޯ ގާސިއާ އެވެ. އެއީ ޓްރެންޓް އެލެގްޒެންޑާ އާނޯލްޑް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން މެޗުގެ 21 ވަނަ މިނެޓުގައި ސޮސިއެޑާޑް އަށް ލިބުނު ޕެނަލްޓީ ކާމިޔާބުކޮށް، އެ ޓީމަށް ނަތީޖާ ހަމަހަމަ ކޮށްދިނީ މިކޭލް އޮޔާޒަބާލް އެވެ.

ސޮސިއެޑާޑް އިން ނަތީޖާ ހަމަހަމަ ކުރިތާ ހަތަރު މިނެޓު ފަހުން، ރެއާލް އަށް ލިބުނު ޕެނަލްޓީ ކާމިޔާބުކޮށް ދެ ވަނަ ފަހަރަށް ލީޑު ނަގައިދިނީ ބްރެޒިލްގެ ވިނީޝިއުސް ޖޫނިއާ އެވެ. ފުރަތަމަ ހާފު ނިމުމުގެ ކުރިން ރެއާލްގެ ތިން ވަނަ ލަނޑު ޖެހީ ފެޑެރިކޯ ވަލްވާޑޭ އެވެ. މެޗުގެ ދެ ވަނަ ހާފު ފަށައިގެން ތިން ވަނަ މިނެޓުގައި ރެއާލް އަށް ލިބުނު ޕެނަލްޓީ ކާމިޔާބުކޮށް ހަތަރު ވަނަ ލަނޑު ޖެހީ ވިނީޝިއުސް އެވެ.

މޮޅާ އެކު ރެއާލް އިން ވަނީ ލީގު ތާވަލްގެ އެއް ވަނަ މަގާމަށް ޖެހިލައިފަ އެވެ. އެގޮތުން މިހާތަނަށް ލީގުގައި ކުޅެފައިވާ 24 މެޗުން ރެއާލް އަށް ލިބެނީ 60 ޕޮއިންޓެވެ. ރެއާލް އަށް ވުރެ އެއް މެޗު މަދުން ކުޅެގެން ދެ ވަނައިގައި އެންމެ ފަހުގެ ޗެމްޕިއަން ބާސެލޯނާ އަށް 58 ޕޮއިންޓު ލިބޭއިރު، މެޗުގެ އަދަދު ހަމަކޮށް ބާސެލޯނާ އަށް އެއް ވަނަ މަގާމަށް ޖެހިލުމުގެ ފުރުސަތު އޮންނާނެ އެވެ.