އޮސަސޫނާ އަތުން ޕޮއިންޓު ހޯދައި ކުރިއަށް ޖެހިލުން ވަރަށް މުހިންމު: އާބެލޯ
21 ފެބުރުއަރީ 2026 | ހޮނިހިރު 04:14ލީގު ތާވަލްގެ އެއް ވަނަ މަގާމުގައި ރެއާލް އޮތްއިރު، އާބެލޯ ބުނީ ފާއިތުވި ދުވަސްތައް މާޒީ އަށް ދޫކޮށްލުމަށް ފަހު، ކުރިއަށް ޖެހިލަން މިއީ ރެއާލް އަށް ރަނުގެ ފުރުސަތެއް ކަމަށް.
ރެއާލް އަށް އިރުޝާދު ދެމުން އަންނަ އަލްވާރޯ އާބެލޯ | ރޮއިޓާސް
ސްޕެނިޝް ލީގުގައި އޮސަސޫނާއާ ދެކޮޅަށް ކުޅޭ މެޗުން މޮޅުވެ، ތިން ޕޮއިންޓާ އެކު ކުރިއަށް ޖެހިލުމަކީ ވަރަށް މުހިންމު ކަމެއް ކަމަށް ރެއާލް މެޑްރިޑުގެ ކޯޗު އަލްވާރޯ އާބެލޯ ބުނެފި އެވެ.
އޭނާ މިހެން ބުނީ ހޮނިހިރު ދުވަހުގެ ރޭ އޮސަސޫނާއާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. އެ މެޗާ ގުޅޭ ގޮތުން ވާހަކަ ދައްކަމުން އާބެލޯ ބުނީ، އަމިއްލަ ދަނޑުގައި އޮސަސޫނާ ބަލި ނުވާތާ ދެ މަސް ވެފައިވާ ކަމަށާއި، އެ ޓީމަކީ އިިދިކޮޅަށް ކުޅެން އުނދަގޫ ޓީމެއްކަން އިނގޭ ކަމަށެވެ.
އާބެލޯ ބުނީ ރެއާލްގެ ކުރިމަތީގައި އޮތީ ވަރަށް ބޮޑު ޗެލެންޖެއް ކަމަށެވެ. އިދިކޮޅު ޓީމުގެ ފެންވަރާއި، އެ ޓީމުގެ ކޯޗު ކުރަމުން އަންނަ ރަނގަޅު މަސައްކަތް ފެންނަ ކަމަށް އޭނާ ބުންޏެވެ. އެހެންކަމުން އެ ޓީމާ ދެކޮޅަށް ރެއާލް ނިކުންނާނީ ވަރަށް ފުރިހަމަ އަށް ތައްޔާރުވެގެން ކަމަށާއި، އެ މެޗުން ތިން ޕޮއިންޓު ހޯދުމަށް ހުރިހާ މަސައްކަތެއް ކުރާނެ ކަމަށް އޭނާ ވަނީ ބުނެފަ އެވެ.
ލީގު ތާވަލްގެ އެއް ވަނަ މަގާމުގައި ރެއާލް އޮތްއިރު، އާބެލޯ ބުނީ ފާއިތުވި ދުވަސްތައް މާޒީ އަށް ދޫކޮށްލުމަށް ފަހު، ކުރިއަށް ޖެހިލަން މިއީ ރެއާލް އަށް ރަނުގެ ފުރުސަތެއް ކަމަށެވެ. އެއާ އެކު، ލީގު ރޭހުގައި ރެއާލް ވާދަ ކުރަމުން އައި އައުން ދެމި އޮތް ކަމަށާއި، ރެއާލް އަކީ ހިތްވަރު ދޫކޮށްލާނެ ޓީމެއް ނޫން ކަމަށް އޭނާ ފާހަގަ ކޮށްފައިވެ އެވެ.
މީގެ އިތުރުން އާބެލޯ ވަނީ، ރެއާލް އަށް ކުޅެމުން އަންނަ ވިނީޝިއުސް ޖޫނިއާ އަށް ނަސްލީ ގޮތުން ކުރަމުން އަންނަ ފުރައްސާރަ ތަކަށް ވެސް ރައްދު ދީފަ އެވެ. އެގޮތުން އޭނާ ބުނީ ފުޓުބޯޅައިގައި ނަސްލީ ދިމާ ކުރުމަށް އެއްވެސް ފުރުސަތެއް ނޯންނާނެ ކަމަށާއި، އެކަންކަމުގެ ސަބަބުން ފުޓުބޯޅައިގެ ރީތި ނަން ހަޑިވަމުން އަންނަ ކަމަށެވެ. ނަސްލީ ގޮތުން ފުރައްސާރަ ކުރުމާ ދެކޮޅަށް މަސައްކަތް ކުރުމުން ރެއާލް އަށް އޮތީ ފަހު ފުރުސަތެއް ލިބިފައި ކަމަށް ވެސް އޭނާ ބުންޏެވެ.
މިވަގުތު ލީގު ތާވަލްގެ އެއް ވަނަ މަގާމުގައި ރެއާލް އޮތީ މިހާތަނަށް އެ ޓީމު ކުޅެފައިވާ 24 މެޗުން 60 ޕޮއިންޓާ އެކު އެވެ. ދެ ޕޮއިންޓުގެ ލީޑަކާ އެކު ރެއާލް އެއް ވަނައިގައި އޮތްއިރު، ދެ ވަަނައިގައި އޮތް އެންމެ ފަހުގެ ޗެމްޕިއަން ބާސެލޯނާ އަށް ލިބެނީ 58 ޕޮއިންޓެވެ. އޮސަސޫނާއާ ދެކޮޅަށް ކުޅޭ މެޗުން މޮޅުވެ، ލީޑު ފުޅާ ކުރުމުގެ ފުރުސަތު ރެއާލް އަށް އޮންނާނެ އެވެ.
