އޮސަސޫނާ އަތް ދަށުވެ، ރެއާލް އިން ފުރުސަތު ނަގާލައިފި

ސްޕެނިޝް ލީގުގައި އޮސަސޫނާއާ ދެކޮޅަށް ކުޅުނު މެޗުން ބަލިވެ، ލީގު ތާވަލްގައި ލީޑު ފުޅާ ކުރަން ލިބުނު ފުރުސަތު ރެއާލް މެޑްރިޑް އިން ނަގާލައިފި އެވެ.

އޮސަސޫނާގެ އަމިއްލަ ދަނޑުގައި ހޮނިހިރު ދުވަހުގެ ރޭ ކުޅުނު މެޗުގައި އެ ޓީމުން ވަނީ 2-1 އިން ރެއާލް ބަލިކޮށްފަ އެވެ. މެޗުގައި އޮސަސޫނާ އިން ލަނޑު ޖަހައި ކުރި ހޯދާފައި ވަނިކޮށް، ރެއާލް އިން ނަތީޖާ ހަމަހަމަ ވެސް ކުރި އެވެ. ނަމަވެސް، މެޗުގެ ފަހު ވަގުތުގައި ލަނޑު ޖަހައިގެން އޮސަސޫނާ އިން ވަނީ ރެއާލް ބަލިކޮށްފަ އެވެ.

މެޗުގެ ފުރަތަމަ ހާފުގެ 38 ވަނަ މިނެޓުގައި އޮސަސޫނާ އަށް ލިބުނު ޕެނަލްޓީ ކާމިޔާބުކޮށް، އެ ޓީމަށް ލީޑު ނަގައިދިނީ އަންޓޭ ބުޑިމީއާ އެވެ. ނަމަވެސް، މެޗުގެ ދެ ވަނަ ހާފުގެ 73 ވަނަ މިނެޓުގައި ވިނީޝިއުސް ޖޫނިއާ ވަނީ ލަނޑު ޖަހައި ރެއާލް އަށް ނަތީޖާ ހަމަހަމަ ކޮށްދީފަ އެވެ. އޭގެ ފަހުން މެޗުގެ 90 ވަނަ މިނެޓުގައި ރައުލް ގާސިއާ ވަނީ އޮސަސޫނާގެ ދެ ވަނަ ލަނޑު ޖަަހައި މެޗުން އެ ޓީމު މޮޅު ކޮށްދީފަ އެވެ.

މެޗުން މޮޅުވެ، އެއް ވަނައިގައި ފަސް ޕޮއިންޓުގެ ލީޑެއް ނެގުމުގެ ފުރުސަތު ރެއާލް އަށް އޮތް ނަމަވެސް، މެޗުން ބަލިވެ އެ ފުރުސަތު ވަނީ ގެއްލިފަ އެވެ. ލީގު ތާވަލްގެ އެއް ވަނަ މަގާމުގައި ރެއާލް އޮތީ 25 މެޗުން 60 ޕޮއިންޓާ އެކު އެވެ. ރެއާލް އަށް ވުރެ އެއް މެޗު މަދުން ކުޅެގެން ދެ ވަނައިގައި އެންމެ ފަހުގެ ޗެމްޕިއަން ބާސެލޯނާ އަށް 58 ޕޮއިންޓު ލިބޭއިރު، މެޗުގެ އަދަދު ހަމަކޮށް އެއް ވަނަ އަށް ޖެހިލުމުގެ ފުރުސަތު ބާސެލޯނާ އަށް އޮންނާނެ އެވެ.