މެކްސިކޯ އާއި މެދުތެރޭ އެމެރިކާގެ ވައިގެ ސަރަހައްދުގައި "އަސްކަރީ ހަރަކާތްތަކެއް" ހިންގާ ކަމަށް ބުނެ އެމެރިކާ އިން އިންޒާރު ދީފި
ނެވިގޭޝަން ސެޓެލައިޓް ސިސްޓަމަށް ބުރޫއަރާފާނެތީ ވައިގެ ދަތުރުފަތުރަށް ނުރައްކާތެރި ހާލަތު މެދުވެރިވެދާނެކަމަށް ބުނެ ޕައިލެޓުންނަށް އިރުޝާދު ނެރެފައިވޭ.
އެމެރިކާގެ މަތިންދާބޯޓު އުފުލާ މަނަވަރު ޔޫއެސްއެސް ޖެރަލްޑް އާރް ފޯޑް އިން ފައިޓަރ ޖެޓް ތަކެއް އުތުރު ކަނޑުގައި އުދުއްސާލަނީ - ސެޕްޓެމްބަރު 24، 2025. | އޭއެފްޕީ
މެކްސިކޯ އާއި މެދުތެރޭ އެމެރިކާގެ ވައިގެ ސަރަހައްދުގައި "ސިފައިންގެ ހަރަކާތްތަކެއް" ކުރިއަށްދާތީ، އެ ސަރަހައްދުން ދަތުރުކުރާ އެއާލައިންތަކުން "ސަމާލުވުމަށް" އެމެރިކާގެ އޭވިއޭޝަން އިދާރާތަކުން ހުކުރު ދުވަހު އިންޒާރު ނެރެފި އެވެ.
ފެޑަރަލް އޭވިއޭޝަން އެޑްމިނިސްޓްރޭޝަން (އެފް.އޭ.އޭ) އިން ނެރުނު މެސެޖުތަކެއްގައި ބުނެފައި ވަނީ، ދުނިޔޭގެ ނެވިގޭޝަން ސެޓެލައިޓް ސިސްޓަމަށް ބުރޫއަރާފާނެ ކަމަށް ބެލެވޭތީ، އެ ސަރަހައްދުގެ ވައިގެ ދަތުރުފަތުރަށް ނުރައްކާތެރި ހާލަތެއް މެދުވެރިވެދާނެ ކަމަށެވެ.
އެފް.އޭ.އޭ ގެ ތަރުޖަމާނަކު ވިދާޅުވި ގޮތުގައި، މެކްސިކޯ، މެދުތެރޭ އެމެރިކާ، ޕެނަމާ، ބޮގޯޓާ، ގުއަޔަކުއިލް އަދި މަޒަޓްލާންގެ ކަނޑުގެ ސަރަހައްދުތަކުގެ އިތުރުން އިރުމަތީ ޕެސިފިކް ކަނޑުގެ ވައިގެ ސަރަހައްދަށް އަމާޒުކޮށް ޕައިލެޓުންނަށް ހާއްސަ އިރުޝާދުތަކެއް ވަނީ ނެރެފައެވެ.
މި އިރުޝާދު ކުރިއަށް އޮތް 60 ދުވަހުގެ މުއްދަތަށް ދެމިއޮންނާނެ ކަމަށް ވެސް ބުނެފައިވެ އެވެ.
މި އެންގުން ނެރެފައި މިވަނީ، ޖެނުއަރީ 3 ވަނަ ދުވަހު އެމެރިކާގެ ސިފައިންގެ ޚާއްސަ ފައުޖުތަކުން ދިން ހަމަލާއެއް ގައި ވެނެޒުއޭލާގެ ރައީސް ނިކޮލަސް މަދޫރޯ އާއި އޭނާގެ އަނބިކަނބަލުން ސިލިއާ ފްލޯރެސް ހައްޔަރުކޮށް، މަސްތުވާތަކެތީގެ ވިޔަފާރިކުރުމުގެ ދައުވާ އުފުލުމަށް ގެންދިޔަ ހާދިސާގެ އަސަރުތައް އަދިވެސް ދެމިއޮތް ދަނޑިވަޅެއްގަ އެވެ.
މީގެ އިތުރުން، އެމެރިކާގެ އަވަށްޓެރި އަދި ވިޔަފާރީގެ މުހިންމު ބައިވެރިއެއް ކަމަށްވާ މެކްސިކޯ ގައި ހަރަކާތްތެރިވާ މަސްތުވާތަކެތީގެ ނެޓްވޯކްތަކަށް އަމާޒުކޮށް އެއްގަމު މަގުން ހަމަލާދިނުމަށް ރޭވުންތަކެއް ހުރި ކަމަށް ރައީސް ޑޮނަލްޑް ޓްރަމްޕް ވަނީ އިޝާރާތް ކުރައްވާފަ އެވެ. މިއީ އެ ގައުމާ ދެކޮޅަށް ހިންގޭ ކުރިމަތިލުމަކަށް ވެދާނެ ކަމަށް ބެލެވެ އެވެ.
"މަސްތުވާތަކެތީގެ ކާޓެލްތަކާ ގުޅިގެން އަޅުގަނޑުމެން މިހާރު މި ފަށަނީ އެއްގަމު މަގުން ހަމަލާދޭން. މެކްސިކޯގެ ކޮންޓްރޯލް އޮތީ އެ ކާޓެލްތަކުގެ އަތްމަތީގައި،" ވޭތުވެދިޔަ ހަފުތާގައި ފޮކްސް ނިއުސް އަށް ދެއްވި ބަސްދީގަތުމެއްގައި ޓްރަމްޕް ވިދާޅުވި އެވެ.
