2026 ވަނަ އަހަރުގެ ވޯލްޑް ކަޕް ޗެމްޕިއަން ޓީމަށް 50 މިލިއަން ޑޮލަރު ގެ އިނާމު ދޭން ނިންމައިފި
2026 ވަނަ އަހަރުގެ ފީފާ ވޯލްޑް ކަޕް މުބާރާތުގެ ޖުމްލަ އިނާމަކީ 655 މިލިއަން ޑޮލަރު ކަމަށާއި މިއީ ގަތަރުގައި ބޭއްވި ކުރީގެ މުބާރާތާ އަޅާބަލާއިރު 50 ޕަސެންޓުގެ އިތުރުވުމެއް ކަމަށް ފީފާއިން ބުނެފިއެވެ. ދެވަނަ ހޯދާ ޓީމަށް 33 މިލިއަން ޑޮލަރާއި ބައިވެރިވާ 48 ގައުމަށް ތައްޔާރުވުމުގެ ހަރަދަށް 1.5 މިލިއަން ޑޮލަރު ކޮންމެ ޓީމަކަށް ލިބިގެންދާނެއެވެ.
2022 ވަނަ އަހަރު ގަތަރުގައި އޮތް ވޯލްޑްކަޕް ގައި ޗެމްޕިއަންސް ޓްރޮފީ އާޖެންޓިނާގެ ކެޕްޓަން ލަޔަނެލް މެސީ އުފުލާލަނީ
2026 ވަނަ އަހަރުގެ ފީފާ ވޯލްޑް ކަޕްގެ ޗެމްޕިއަން ޓީމަށް ރެކޯޑް އަދަދެއް ކަމަށްވާ 50 މިލިއަން ޑޮލަރުގެ އިނާމު ދޭން ނިންމައިފި ކަމަށް ފުޓްބޯޅައިގެ މައި އިދާރާ -ފީފާ އިން ބުނެފި އެވެ.
މި އަދަދަކީ 2022 ވަނަ އަހަރު ދިން 42 މިލިއަން ޑޮލަރާއި 2018 ވަނަ އަހަރު ދިން 38 މިލިއަން ޑޮލަރަށް ވުރެ ބޮޑު އަދަދެއް ނަމަވެސް މިއީ މި އަހަރުގެ ކުރީކޮޅު ބޭއްވި ފީފާ ކްލަބް ވޯލްޑް ކަޕް ގައި ދޭން ކަނޑައެޅި އަދަދުގެ ދެބައިކުޅަ އަދަދަށްވުރެ މަދު އަދަދެކެވެ.
އަންނަ އަހަރުގެ ވޯލްޑް ކަޕް - އެމެރިކާ، ކެނެޑާ އަދި މެކްސިކޯގައި ބާއްވާ އިރު ޖުމްލަ އިނާމުގެ ގޮތުގައި 655 މިލިއަން ޑޮލަރު ކަނޑައަޅާފައިވާ ކަމަށާއި، މިއީ ގަތަރުގައި ބޭއްވި ކުރީގެ މުބާރާތާ އަޅާބަލާއިރު 50 ޕަސެންޓުގެ އިތުރުވުމެއް ކަމަށް ފީފާ އިން ބުންޏެވެ.
ފީފާ ކްލަބް ވޯލްޑް ކަޕް މުބާރާތް 7 ޓީމުން 32 ޓީމަށް ވަރަށް ބޮޑަށް ފުޅާކޮށްފައިވާއިރު، އެ މުބާރާތައް ޖުމްލަ އިނާމުގެ ގޮތުގައި 1 ބިލިއަން ޑޮލަރު ކަނޑައަޅާފައިވެއެވެ. ޗެމްޕިއަން ޓީމަށް ލިބޭ އިނާމުގެ އަގަކީ 125 މިލިއަން ޑޮލަރު ކަމަށް ހަޖައްސާފައިވާއިރު، މި މުބާރާތަކީ ކުޅުންތެރިންނާއި ލީގުތަކުން ވަރަށް ބޮޑަށް ދެކޮޅު ހެދި އަދި ބައެއް މެޗުތަކަށް މަދު ބަޔަކު ހާޒިރުވި މުބާރާތެކެވެ.
އެމެރިކާ ގައި ބޭއްވި ކްލަބް ވޯލްޑް ކަޕް ކާމިޔާބުކުރީ ޗެލްސީއިންނެވެ.
އިނާމު ފައިސާ ގެ އިތުރަށް، ބައިނަލްއަގްވާމީ ފެންވަރުގައި ފުޓްބޯޅަ ތަރައްގީކުރުމަށް ފީފާ އިން އިތުރު ފައިސާ ދެއެވެ.
ދޯހާ ގައި ބޭއްވި ފީފާ ގެ ކައުންސިލްގެ ބައްދަލުވުމެއްގައި ވޯލްޑް ކަޕްގެ ކޮންމެ ސްޓޭޖަކަށް ދޭ ފައިސާ ގެ އިނާމު މިހާރު ވަނީ ފާސް ކޮށްފަ އެވެ.
މުބާރާތުން ދެވަނަ ހޯދާ ޓީމަށް 33 މިލިއަން ޑޮލަރު ލިބިގެންދާއިރު، ތިންވަނަ އަދި ހަތަރުވަނަ ހޯދާ ޓީމުތަކަށް 29 މިލިއަން ޑޮލަރާއި 27 މިލިއަން ޑޮލަރު ލިބިގެންދާނެއެވެ.
ބައިވެރިވާ 48 ގައުމަށް ފީފާއިން ބުނި ގޮތުގައި "ތައްޔާރުވުމުގެ ހަރަދުތައް" ކަވަރުކުރުމަށް 1.5 މިލިއަން ޑޮލަރު ލިބިގެންދާނެއެވެ.
ޖުމްލަ 727 މިލިއަން ޑޮލަރު ބައިވެރިވާ ފުޓްބޯޅަ ފެޑަރޭޝަންތަކަށް ބެހިގެންދާނެ ކަމަށް ފީފާ އިން ބުންޏެވެ.
ބައިވެރިވާ ގައުމުތަކަށް ދޭ ފައިސާ ކުޅުންތެރިންނަށް ބަހާ ގޮތް ސާފުވެފައެއް ނުވެއެވެ. ނަމަވެސް އެންމެ ފަހުގެ ވޯލްޑް ކަޕްގައި، ފަރަންސޭސިވިލާތުގެ ނޫހަކުން ރިޕޯޓްކުރި ގޮތުގައި ފަރަންސޭސިވިލާތުގެ ކުޅުންތެރިންނަށް ޓްރޮފީ ކާމިޔާބު ކޮށްފި ނަމަ، ފެޑަރޭޝަނުން 586،000 ޑޮލަރުގެ ބޯނަސް ކޮންމެ ކުޅުންތެރި އަކަށް ދޭ ގޮތަށް އޮތީ ހަމަޖައްސާފަ އެވެ. އެހެން ނަމަވެސް ފައިނަލު ގައި ފަރަންސޭސިވިލާތް އާޖެންޓީނާ އާ ބައްދަލުކޮށް ބަލިވިއެވެ.
