އެފްއޭއެމްގެ ހިޔާނާތުގެ މައްސަލައެއްގައި ދައުވާކޮށްފައިވާ އަގީލް ތައިލެންޑުގެ ބެންކޮކުން ހައްޔަރުކޮށްފި
އަގީލްގެ މައްޗަށް އޮތީ މަނީލޯންޑާކުރުމަށް އެހީތެރިވުމުގެ ކުށުގެ ދައުވާ. އެފްއޭއެމްގެ ކުރީގެ ރައީސް ބައްސާމް ފީފާގެ ފައިސާއަށް ހިޔާނަތްތެރިވި މައްސަލައިގައި މިހާރު 23 އަހަރުގެ ޖަލު ހުކުމެއް ތަންފީޒު ކުރަމުން.
ފީފާއިން އެފްއޭއެމަށް ފޮނުވި ފައިސާ ލޯންޑާކުރަން އެހީތެރިވި މައްސަލައިގެ ތުހުމަތުވާ މުހައްމަދު އަގީލް | ޕޮލިސް މީޑިޔާ
ފުޓުބޯޅައިގެ ގައުމީ މައި އިދާރާ، އެފްއޭއެމްގެ ހިޔާނާތުގެ މައްސަލައެއްގައި ދައުވާކޮށްފައިވާ އެ ތަނުގެ ފިނޭންސް ޑިޕާޓްމަންޓްގެ ކުރީގެ ވެރިޔާ މުހައްމަދު އަގީލް ތައިލެންޑުގެ ބެންކޮކުން ހައްޔަރުކޮށްފި އެވެ.
އެފްއޭއެމްގެ ޚިޔާނާތާ ގުޅިގެން އެ އިދާރާގެ އެކައުންޓްސް ޑިޕާޓްމަންޓްގެ ކުރީގެ ހެޑް، އަގީލް ހައްޔަރުކޮށްގެން ކޯޓަށް ހާޒިރުކުރަން އޮތީ ފުލުހުންގެ މައްޗަށް އަމުރެއް ނެރެފައެވެ. އެއީ، ބައްސާމްގެ ހިޔާނާތާ ގުޅިގެން ހެކިބަސް ނެގުމަށެވެ. އަގީލްގެ މައްޗަށް ވެސް އޮތީ މަނީ ލޯންޑާކުރުމަށް އެހީތެރިވުމުގެ ކުށުގެ ދައުވާ އުފުލާފައެވެ.
އެނގިފައިވާ ގޮތުގައި އަގީލް ތައިލޭންޑްގައި ހިފަހައްޓާފައިވަނީ ވިސާ ވަޔަލޭޝަންގެ މައްސަލައަކާ ގުޅިގެންނެވެ. އަދި، އިންޓަޕޯލް ރެޑް ނޯޓިސްއެއް ނެރެފައިވުމާ އެކު، އެ ގައުމުގެ ކަމާ ބެހޭ އިދާރާއިން އެކަން ދިވެހި ފުލުހުންނަށް އަންގާފައިވާ ކަމަށް ވަނީ މައުލޫމާތު ލިބިފަ އެވެ. އެހެން ނަމަވެސް މިކަމުގެ އިތުރު ތަފްސީލު ލިބިފައެއް ނުވެ އެވެ.
އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް އެ ތަނުގެ ފައިސާއިން އަމިން ކޮންސްޓްރަކްޝަންގެ ލަގްޒަރީ އެޕާޓްމަންޓެއް ގަތް މައްސަލާގައި އަގީލްގެ މައްޗަށް ކޮށްފައިވަނީ މަނީލޯންޑާކުރުމަށް އެހީތެރިވުމުގެ ކުށުގެ ދައުވާ އެވެ.
ނަމަވެސް އަގީލް އުޅޭ ތަނެއް ނޭނގޭތީ، އޭނާ ގެ ބައި ކުރިއަށް ނުގޮސް އޮތީ މަޑުޖެހިފަ އެވެ. އަގީލް ހައްޔަރުކޮށްގެން ކޯޓަށް ހާޒިރުކުރުމަށް ކޯޓުން ވަނީ ފުލުހުންގެ މައްޗަށް އަމުރެއް ވެސް ނެރެފަ އެވެ. ފީފާއިން ދިން ފައިސާއަށް ހިޔާނަތްތެރިވުމާއި މަނީލޯންޑާ ކުރުމުގެ ދައުވާތަކެއް ސާބިތުވެ އެފްއޭއެމްގެ ކުރީގެ ރައީސް ބައްސާމް އަދީލް ޖަލީލު މިހާރު ވެސް އަންނަނީ 23 އަހަރުގެ ޖަލު ހުކުމެއް ތަންފީޒު ކުރަމުންނެވެ.
ބައްސާމާ ދެކޮޅަށް ކޯޓުގައި މިހާރު ހިނގަމުންދާ މައްސަލައަކީ، ފީފާއިން އެފްއޭއެމްއަށް ފޮނުވި 1.2 މިލިއަން ޑޮލަރު ނުވަތަ 18 މިލިއަނަށް ވުރެ ގިނަ ރުފިޔާއަށް ބައްސާމް ޚިޔާނާތްތެރިވެ، އެ ފައިސާ ބޭނުންކުރި ކަމަށް ބުނާ މައްސަލައެކެވެ. މި މައްސަލައިގައި ވެސް ބައްސާމްގެ މައްޗަށް ޚިޔާނާތާއި މަނީ ލޯންޑްރިންގެ ދައުވާ ވަނީ ކޮށްފަ އެވެ.
