ވޯލްޑް ކަޕް މެޗުތަކަށް 500 މިލިއަނަށް ވުރެ ގިނަ ޓިކެޓުގެ ބުކިން ހަދައިފި
މުބާރާތް ބާއްވާ ގައުމުތައް ފިޔަވައި، އެންމެ ގިނައިން ޓިކެޓަށް އެދިފައި ވަނީ ޖަރުމަނު، އިންގްލެންޑް، ބްރެޒިލް، ސްޕެއިން، ޕޯޗުގަލް، އާޖެންޓީނާ އަދި ކޮލަމްބިއާގެ ސަޕޯޓަރުން.
ޑިސެމްބަރު 05، 2025 ގައި ވޮޝިންޓަންގެ ޖޯން އެފް ކެނެޑީ ސެންޓަރ ފޯ ދަ ޕާފޯމިންގ އާޓްސްގައި އޮތް ފީފާ ވޯލްޑް ކަޕް 2026 ގެ އޮފިޝަލް ޑްރޯ ނެގުމުގެ ރަސްމިއްޔާތުގައި ފީފާ ވޯލްޑް ކަޕް ޓްރޮފީ ސްޓޭޖު މަތީގައި ދައްކާލަނީ. | ގެޓީ އިމޭޖަސް
މި އަހަރު ބާއްވާ ވޯލްޑް ކަޕް ފުޓްބޯޅަ މުބާރާތުގެ ޓިކެޓުގެ އަގުތައް ބޮޑުވުމުގެ ސަބަބުން ފާޑުކިޔުންތައް އަމާޒުވެފައިވީ ނަމަވެސް، 500 މިލިއަނަށް ވުރެ ގިނަ ޓިކެޓުގެ ބުކިން ހަދައިފި ކަމަށް ފުޓްބޯޅައިގެ މައި އިދާރާ ފީފާ އިން ބުދަ ދުވަހު ހާމަކޮށްފި އެވެ.
ފީފާ އިން ނެރުނު ބަޔާނެއްގައި ބުނެފައި ވަނީ، އެމެރިކާ، ކެނެޑާ އަދި މެކްސިކޯގައި ބާއްވާ މި މުބާރާތުގެ ޓިކެޓަށް އެދި ފީފާގެ މެންބަރު 211 ގައުމަކާއި ސަރަހައްދުތަކުން ސަޕޯޓަރުން ހުށަހަޅާފައިވާ ކަމަށެވެ.
ޓިކެޓް ދޫކުރާނެ ފަރާތްތައް ހޮވުމަށް ބާއްވާ ގުރުއަތުލުމުގައި ބައިވެރިވުމަށް ހުޅުވާލި ފުރުސަތު މިދިޔަ އަންގާރަ ދުވަހު ވަނީ ހަމަވެފަ އެވެ. ފީފާ އިން ބުނި ގޮތުގައި ޓިކެޓް ލިބުނުކަން ނުވަތަ ނޫންކަން އަންނަ ފެބްރުއަރީ މަހުގެ 5 ވަނަ ދުވަހުގެ ކުރިން ސަޕޯޓަރުންނަށް އަންގާނެ އެވެ.
މުބާރާތް ބާއްވާ ގައުމުތައް ފިޔަވައި، އެންމެ ގިނައިން ޓިކެޓަށް އެދިފައި ވަނީ ޖަރުމަނު، އިންގްލެންޑް، ބްރެޒިލް، ސްޕެއިން، ޕޯޗުގަލް، އާޖެންޓީނާ އަދި ކޮލަމްބިއާގެ ސަޕޯޓަރުންނެވެ.
އެންމެ ގިނަ ބަޔަކު ބަލަން ބޭނުން ވެގެން ހުށަހަޅާފައި ވަނީ ޖޫން 27 ގައި މިއާމީ ގައި ކޮލަމްބިއާ އާއި ޕޯޗުގަލް ބައްދަލުކުރާ މެޗުގެ ޓިކެޓަށެވެ. ދެވަނަ އަށް އެންމެ ގިނަ ހުށަހެޅުން ލިބުނީ ޖޫން 18 ގައި ގުއަޑަލަހާރާ ގައި މެކްސިކޯ އާއި ދެކުނު ކޮރެއާ ބައްދަލުކުރާ މެޗަށެވެ. އަދި ޖުލައި 19 ގައި ނިއު ޖާޒީގައި ކުޅޭ ފައިނަލް މެޗަށް ވެސް ބޮޑު ތަރުހީބެއް ވަނީ ލިބިފަ އެވެ.
"މަހެއްހާ ދުވަހުގެ ތެރޭގައި ބިލިއަނެއްގެ ދެބައިކުޅަ އެއްބައި މީހުން ޓިކެޓަށް އެދުމަކީ ހަމައެކަނި ޑިމާންޑެއް ނޫން، އެއީ މުޅި ދުނިޔެ އިން ދިން ވަރުގަދަ މެސެޖެއް،" ފީފާގެ ރައީސް ޖިއާނީ އިންފަންޓީނޯ ވިދާޅުވި އެވެ. "ދުނިޔޭގެ ހުރިހާ ކަންކޮޅުތަކެއްގައި ތިބި ފުޓްބޯޅަ ސަޕޯޓަރުން މި ދިން ތަރުހީބަށްޓަކައި ޝުކުރާއި މަރުހަބާ ދަންނަވަން."
އޭނާ އިތުރަށް ވިދާޅުވީ، ދުނިޔޭގެ އެކި ކަންކޮޅުތަކުގެ މީހުންނަށް މި މުބާރާތަކީ ކިހާ މުހިންމު އެއްޗެއްކަން އެނގޭއިރު، އޮތް ހަމައެކަނި ހިތާމައަކީ ހުރިހާ ސަޕޯޓަރުންނަށް ސްޓޭޑިއަމްތަކުން ފުރުސަތު ދެވެން ނެތުން ކަމަށެވެ.
48 ޓީމު ވާދަކުރާ މި މުބާރާތުގެ ޓިކެޓް އަގުކޮށްފައިވާ ގޮތާ މެދު ފީފާ އަށް ވަނީ ވަރަށް ބޮޑަށް ފާޑުކިޔުން އަމާޒުވެފަ އެވެ. ސަޕޯޓަރުންގެ ޖަމިއްޔާތަކުން ބުނާ ގޮތުގައި ޓިކެޓްގެ އަގުތައް ހުރީ އަތްނުފޯރާ ފަށުގައެވެ.
ފުޓްބޯލް ސަޕޯޓާސް ޔޫރަޕް (އެފް.އެސް.އީ) އިން ހާމަކޮށްފައިވާ ގޮތުގައި، މިފަހަރުގެ ޓިކެޓްގެ އަގުތައް 2022 ވަނަ އަހަރު ގަތަރުގައި ބޭއްވި މުބާރާތުގެ އަގުތަކަށް ވުރެ ފަސް ގުނަ ބޮޑެވެ.
މި ފާޑުކިޔުންތަކާ ގުޅިގެން، ފީފާ އިން ވަނީ މިދިޔަ ޑިސެމްބަރު މަހު އަގުހެޔޮ ޓިކެޓްތަކެއް ތައާރަފުކޮށްފަ އެވެ. އެއީ 60 އެމެރިކާ ޑޮލަރު (ގާތްގަނޑަކަށް 51 ޔޫރޯ) އަށް ލިބޭ ޓިކެޓްތަކެކެވެ.
