ޣައްޒާ ހަނގުރާމައިގައި އިންފަންޓީނޯ އާއި ޗެފެރިން ބައިވެރިވެފައިވާ ކަމަށް ބުނެ އައިސީސީ އަށް މައްސަލަ ހުށަހަޅައިފި

އިޒްރޭލް އިން ޣައްޒާގައި ހިންގަމުން އަންނަ ހަނގުރާމައިގައި ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރައީސް ޖިއާނީ އިންފަންޓީނޯ އާއި، ޔޫރަޕިއަން ފުޓުބޯޅަ ފެޑެރޭޝަން (ޔުއެފާ)ގެ ރައީސް އެލެކްސެންޑާ ޗެފެރިން ބައިވެރިވެފައިވާ ކަމަށް ބުނެ، މައްސަލަ ހުށަހަޅައިފި އެވެ. 

ދުނިޔޭގެ ފުޓުބޯޅައިގެ މައި ދެ ލީޑަރުންގެ މައްޗަށް ދައުވާ ކޮށްފައި ވަނީ، ބައިނަލްއަޤުވާމީ ޖިނާއީ ކޯޓުގަ އެވެ. މި ދެ ލީޑަރުންގެ މައްޗަށް ކޮށްފައިވާ ތުހުމަތަކީ ހަނގުރާމައިގެ ކުށުގައި އެހީތެރިވުމާއި، ފަލަސްޠީނުގެ ސަރަޙައްދުގައި އިންސާނިއްޔަތާ ދެކޮޅު ކުށްތައް ހިންގުމަށް އެހީތެރިވުމުގެ ތުހުމަތެވެ.

ހުކުރު ދުވަހު ރިޕޯޓު ކޮށްފައިވާ ގޮތުގައި، ބައިނަލްއަޤުވާމީ ކްރިމިނަލް ކޯޓަށް ހުށަހަޅާފައިވާ މައްސަލަ އަކީ ސަތޭކަ ޞަފްޙާ ހިމެނޭ މައްސަލަ އެކެވެ. މި މައްސަލައިގައި އިންފަންޓީނޯ އާއި ޗެފެރިންނާ ދެކޮޅަށް ބުނެފައި ވަނީ، ފަލަސްޠީނުގެ ބިމުގައި ޤާނޫނާ ޚިލާފަށް އިޒްރޭލް އިން ޖަރީމާ ހިންގަމުން އަންނައިރު، ފީފާ އާއި ޔުއެފާގެ މުބާރާތް ތަކުގައި އެ ޤައުމު ބައިވެރި ކުރާ ކަމަށެވެެ. 

މައްސަލައިގައި ބުނެފައި ވަނީ އިޒްރޭލް އިން ގެންދަނީ ފަލަސްޠީނުގެ ބިމުގައި ޖަރީމާ ހިންގައި، އަދި ވައްކަން ކުރަމުން ކަމަށެވެ. އެއާ އެކު، އިޒްރޭލްގެ ޓީމު ތަކަށް ފީފާ އާއި ޔުއެފާ އިން މާލީ އެހީތެެރިކަމާއި، އެހެނިހެން ވަސީލަތްތައް ފޯރުކޮށްދިނުމަކީ ހަނގުރާމައިގައި އެހީތެރިވުން ކަމަށް އެ މައްސަލައިގައި ބުނެފައިވެ އެވެ. އަދި އިޒްރޭލްގެ ޓީމު ތަކަށް، ފީފާ އާއި ޔުއެފާގެ މުބާރާތް ތަކުގައި ބައިވެރިވުމުގެ ފުރުސަތު ދިނުމަކީ ވެސް ކުށެއް ކަމަށް ފާހަގަ ކޮށްފައިވެ އެވެ. 

މި މައްސަލަ ހުށަހަޅާފައި ވަނީ އައިރިޝް ސްޕޯޓްސް ފޯ ފަލަސްޠީން އާއި، ސްކޮޓިޝް ސްޕޯޓްސް ފޯ ފަލަސްޠީން އާއި، ޖަސްޓް ޕީސް އެޑްވޮކޭޓްސް އާއި، ޔޫރޯ އެންޑް ހިއުމަން ރައިޓްސް މޮނިޓާ އަދި ސްޕޯޓް ސްކޮލާސް ފޯ ޖަސްޓިން އިން ފަލަސްޠީން ގުޅިގެން އުފައްދާފައިވާ ޖަމާއަތް ތަކުންނެވެ.

އިޒްރޭލް އިން ޣައްޒާގައި ހިންގަމުން އަންނަ ހަނގުރާމައިގައި އެ ސަރަހައްދަށް ބޮޑެތި ގެއްލުން ތަކެއް ލިބުމުގެ އިތުރުން، މައުސޫމު އެތައް ބަަޔަކު ޝަހީދު ކުރަމުން އަންނައިރު، ބައިނަލްއަޤުވާމީ ކުޅިވަރު މައިދާނުގައި އިޒްރޭލް އަށް ފިޔަވަޅު ނާޅާތީ ގިނަ ބައެއްގެ ނުރުހުން ވެސް އަމާޒުވެފައިވެ އެވެ. 

ހަމަ އެއާ އެކު، ރަޝިޔާ އިން ޔޫކްރެއިންއާ ދެކޮޅަށް ހިންގަމުން އަންނަ ހަނގުރާމައިގެ ސަބަބުން ފީފާ އާއި ޔުއެފާ އަދި އެހެނިހެން ކުޅިވަރު އިދާރާ ތަކުން ރަޝިޔާއާ ދެކޮޅަށް ފިޔަވަޅު އަޅާފައިވާއިރު، ޣައްޒާ ހަނގުރާމައާ ގުޅިގެން އިޒްރޭލްއާ ދެކޮޅަށް ފިޔަވަޅު ނާޅާތީ ގިނަ ބަޔަކު ފާޑު ކިޔަމުން ގެންދެ އެވެ. ޚާއްސަކޮށް އެ މައްސަލައިގައި އިންފަންޓީނޯ ދައްކަވާފައިވާ ވާހަކަ ތަކަށް ނުރުހުން އަމާޒު ކޮށްފައިވެ އެވެ.