އުމުރު ދުވަހުގެ ޖަލު ހުކުމެއްގައި ހުރި ޕީއެންސީ އެކްޓިވިސްޓް ޝަހީބަށް 650،000 ރުފިޔާ ދޭން ހުކުމެއް
މަސްތުވާތަކެތީގެ މައްސަލައެއްގައި 50 އަހަރުގެ ޖަލު ހުކުމެއް ތަންފީޒު ކުރަމުންދާ ޝަހީބު އިބްރާހީމަށް، އެހެން މީހަކު ދައްކަންޖެހޭ 650،000 ރުފިޔާ ތިން މަސް ތެރޭގައި ދެއްކުމަށް ސިވިލް ކޯޓުން ހުކުމްކޮށްފި. މަސްތުވާތަކެތީގެ މައްސަލަ ފެންމަތިވުމާ ހަމައަށް އޭނާއަކީ މިހާރު ވެރިކަން ކުރާ ޕީއެންސީގެ ކައުންސިލް މެންބަރެއްގެ ގޮތުގައި ހަރަކާތްތެރިވި އެ ޕާޓީގެ އިސް އެކްޓިވިސްޓެއް.
މަސްތުވާތަކެތީގެ ބޮޑު މައްސަލައެއްގައި އުމުރު ދުވަހުގެ ޖަލު ހުކުމެއް ތަންފީޒު ކުރަމުންދާ ޕީއެންސީގެ އެކްޓިވިސްޓް ޝަހީބް އިބްރާހިމް. | ސޯޝަލް މީޑިއާ
މަސްތުވާތަކެތީގެ ބޮޑު މައްސަލައެއްގައި އުމުރު ދުވަހުގެ ޖަލު ހުކުމެއް ތަންފީޒު ކުރަމުންދާ ޕީއެންސީގެ އެކްޓިވިސްޓް ގއ. ވިލިނގިލީ، ލައިޓްހައުސް، ޝަހީބު އިބްރާހީމަށް 650،000 ރުފިޔާ ދެއްކުމަށް ށ. ފޯކައިދޫ މީހެއްގެ މައްޗަށް ސިވިލް ކޯޓުން ހުކުމްކޮށްފި އެވެ.
މި ފައިސާއަކީ އެއްބަސްވުމަކާ ގުޅިގެން އުފެދުނު ހިލާފެއްގައި ޝަހީބުގެ ފަރާތުން ހޯދަން އެދިފައިވާ ފައިސާއެކެވެ.
ސިވިލް ކޯޓުން މިދިޔަ އަންގާރަ ދުވަހު ކުރި ހުކުމުގައިވަނީ، ޝަހީބު އިބްރާހީމް ގެ ފަރާތުން ށ. ފޯކައިދޫ އައްސޭރި، އަހްމަދު އަޝްފާގް އާ ދެކޮޅަށް ހުށަހެޅި މައްސަލައަށް ރިއާޔަތްކޮށް، ތިން މަސް ދުވަހުގެ ތެރޭގައި އެ ފައިސާ ޝަހީބަށް ދައްކައި ހަލާސް ކުރުމަށެވެ. މިއީ 2019 ވަނަ އަހަރު ޝަހީބު، އަޝްފާގަށް ދިން ކަމަށް ބުނާ 650،000 ރުފިޔާ އަނބުރާ ހޯދުމަށް ހުށަހެޅި މައްސަލައެ ކެވެ.
މި މައްސަލާގައި ޝަހީބުގެ ފަރާތުން ކޯޓުގައި އެދިފައިވަނީ، 650،000 ރުފިޔާގެ އިތުރުން އެ ފައިސާ ނުދައްކައި ހިނގި މުއްދަތަށް މަހަކު 65،000 ރުފިޔާގެ މަގުން ޖޫރިމަނާ ހިމަނައިގެން ޖުމްލަ ދެ މިލިއަނެއްހާ ރުފިޔާ އަޝްފާގު ގެ ފަރާތުން ނަގައިދިނުމަށެވެ. ނަމަވެސް، މައްސަލަ ބެއްލެވި ގާޒީ ފައްޔާޒް ޝާތިރު ކުރެއްވި ހުކުމުގައި ޖޫރިމަނާގެ ބައި ހިމަނާފައެއް ނުވެ އެވެ. ގާޒީ ހުކުމް ކުރެއްވީ ޝަހީބު އަޝްފާގަށް ދިން ފައިސާ ކަމަށްވާ 650،000 ރުފިޔާ ދެއްކުމަށެވެ.
ޝަހީބަށް މި ފައިސާ ދިނުމަށް ސިވިލް ކޯޓުން ހުކުމް ކުރިއިރު، އޭނާ މިހާރު ވެސް ގެންދަނީ 50 އަހަރުގެ ޖަލު ހުކުމެއް ތަންފީޒު ކުރަމުންނެވެ. އެއީ 2020 ވަނަ އަހަރު ހުޅުމާލޭ ފަޅުތެރޭގައި އޮތް ކަންނެލި ދޯންޏަކުން 130 ކިލޯގެ މަސްތުވާތަކެތި ފެނުނު މައްސަލާގައި އޭނާގެ މައްޗަށް ކުށް ސާބިތުވުމާ ގުޅިގެންނެވެ. ޖަލު ހުކުމުގެ އިތުރުން، އެ މައްސަލާގައި 10 މިލިއަން ރުފިޔާ އިން ޝަހީބު ޖޫރިމަނާކޮށް، އެ ފައިސާ ދައުލަތަށް ދެއްކުމަށް ވެސް މިދިޔަ ސެޕްޓެމްބަރު މަހު ކްރިމިނަލް ކޯޓުން ވަނީ ހުކުމްކޮށްފަ އެވެ. ނަމަވެސް އެ މައްސަލަ މިހާރު އޮތީ ޝަހީބުގެ ފަރާތުން ހައިކޯޓުގައި އިސްތިއުނާފުކޮށްފަ އެވެ.
ޝަހީބު އިބްރާހީމަކީ ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުގައި ހައުސިންގ މިނިސްޓްރީގެ ކޯޑިނޭޓަރުކަން ކުރެއްވި މީހެކެވެ. އަދި މަސްތުވާތަކެތީގެ މައްސަލަ ފެންމަތިވުމާ ހަމައަށް އޭނާއަކީ މިހާރު ވެރިކަން ކުރާ ޕީއެންސީގެ ކައުންސިލް މެންބަރެއްގެ ގޮތުގައި ހަރަކާތްތެރިވި އެ ޕާޓީގެ އިސް އެކްޓިވިސްޓެކެވެ.
