އެމްޑީޕީ ދެމި އޮންނާނީ ޑިމޮކްރަސީ އާއި ރައްޔިތުންގެ ޙައްގުތައް ކަށަވަރު ކުރުމުގެ މަސައްކަތުގައި: ސައްލެ
ރައްޔިތުންގެ ޙައްގުތަކަށް އުނިކަމެއް އަތުވެދާނެ ކޮންމެ ޙާލަތެއްގައި އެމްޑީޕީ އިން ވަކިން ބޮޑަށް މަސައްކަތް ކުރާނެ ކަމަށާއި، އެ ޙައްގުތައް ނިގުޅައި ގަތުން ހުއްޓުވުމަށް ކުރަން ޖެހޭ ކޮންމެ ކަމެއް އެ ޕާޓީ އިން ކުރާނެ ކަމަށް ސަލީމް ވަނީ ވިދާޅުވެފައި.
ރައްޔިތުންގެ މަޖިލީހުގެ ކުރީގެ ނައިބު ރައީސް އަޙުމަދު ސަލީމް (ސައްލެ). | އެމްޑީޕީ
ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) ދެމި އޮންނާނީ ޑިމޮކްރަސީ އާއި، ދިވެހި ރައްޔިތުންގެ ޙައްގުތައް ކަށަވަރު ކުރުމުގެ މަސައްކަތުގައި ކަމަށް ރައްޔިތުންގެ މަޖިލީހުގެ ކުރީގެ ނައިބު ރައީސް އަޙުމަދު ސަލީމް (ސައްލެ) ވިދާޅުވެއްޖެ އެވެ.
އޭޕްރީލް މަހު އޮންނަ ލޯކަލް ކައުންސިލްގެ އިންތިޚާބާ އެކު ނަގާ ރެފަރަންޑަމް ވޯޓާ ގުޅޭ ގޮތުން އެމްޑީޕީގެ ފަރާތުން އަންގާރަ ދުވަހުގެ މެންދުރު ފަހު ބޭއްވި ނޫސްވެރިންގެ ބައްދަލުވުމުގައި ސަލީމް ވިދާޅުވީ، އެމްޑީޕީ އަކީ ޑިމޮކްރަސީގެ މަސައްކަތުގައި އުފަންވި ޕާޓީއެއް ކަމަށެވެ. އެއާ އެކު އެމްޑީޕީ ދެމި އޮންނާނީ ޑިމޮކްރަސީގެ މަސައްކަތުގައި ކަމަށް ފާހަގަ ކުރައްވައި ސަލީމް ވިދާޅުވީ، ވަކިން ޚާއްސަކޮށް ރައްޔިތުންގެ ޙައްގުތައް ކަށަވަރު ކުރުމުގައި އެ ޕާޓީ ދެމި އޮންނާނެ ކަމަށެވެ.
މީގެ އިތުރުން ރައްޔިތުންގެ ޙައްގުތަކަށް އުނިކަމެއް އަތުވެދާނެ ކޮންމެ ޙާލަތެއްގައި އެމްޑީޕީ އިން ވަކިން ބޮޑަށް މަސައްކަތް ކުރާނެ ކަމަށާއި، އެ ޙައްގުތައް ނިގުޅައި ގަތުން ހުއްޓުވުމަށް ކުރަން ޖެހޭ ކޮންމެ ކަމެއް އެ ޕާޓީ އިން ކުރާނެ ކަމަށް ސަލީމް ވަނީ ވިދާޅުވެފަ އެވެ. އެއާ އެކު ސަލީމް ފާހަގަ ކުރެއްވީ، ދެ އިންތިޚާބު އެއްކޮލުމަށް ނަގާ ފެންނަ ނުފެންނަ ވޯޓަށް، ދިމާ ނޫނެކޭ ބުނަން އެމްޑީޕީގެ ޤައުމީ މަޖިލީހުން ފާސްކޮށްފައިވާ ކަމަށެވެ.
އެމްޑީޕީ އަކީ ޑިމޮކްރަސީގެ މަސައްކަތުގައި އުފަންވި ޕާޓީއެއް، އަދި މި ޕާޓީ ދެމި އޮންނާނީ ވެސް ޑިމޮކްރަސީގެ މަސައްކަތުގައި. ޚާއްސަކޮށް ދިވެހި ރައްޔިތުންގެ ޙައްގުތައް ކަށަވަރު ކުރުމުގައި، އަދި ޙައްގު ތަކަށް އުނިކަމެއް އަތުވެދާނެ ކޮންމެ ޙާލަތެއްގައި އެމްޑީޕީ ވަކިން ބޮޑަށް މަސައްކަތްކޮށް، އެ ޙައްގުތައް ނިގުޅައި ގަތުން ހުއްޓުވުމަށް ކުރަން ޖެހޭ ކޮންމެ ކަމެއް އަޅުގަނޑުމެން ކުރާނެ.އަޙުމަދު ސަލީމް / ކޮމެޓީގެ ޗެއާ އަދި ރައްޔިތުންގެ މަޖިލީހުގެ ކުރީގެ ނައިބު ރައީސް
އެމްޑީޕީގެ ޤައުމީ މަޖިލީހުން އެގޮތަށް ފާސް ކުރުމާ އެކު، ސަރުކާރުން ކުރިއަށް ގެންދާ ދެ އިންތިޚާބު އެއްކޮށްލުމުގެ ފެންނަ ނުފެންނަ ވޯޓަށް ނޫނެކޭ ބުނުމަށް އެމްޑީޕީ އިން ފަށާ ކެމްޕޭނުގެ މަސައްކަތް ކުރުމަށް ޚާއްސަ އެކްޝަން ގުރޫޕެއް، އެކުލަވާލާފައިވާ ކަމަށް ސަލީމް ވިދާޅުވި އެވެ. ސަލީމް ވިދާޅުވީ، ފެންނަ ނުފެންނަ ވޯޓު ކައުންސިލް އަދި ޑަބްލިޔުޑީސީ އިންތިޚާބުގެ ހިޔަނީގައި ފޮރުވައިގެން ކުރިއަށް ގެންދަނީ އަޑި ނޭނގޭ ގޮތެއްގައި ކަމަށެވެ.
މީގެ އިތުރުން އެ ކޮމެޓީގެ ތަރުޖަމާނުގެ ގޮތުގައި ހަމަޖައްސަވާފައި ވަނީ ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޛާކިރު އެވެ.
އެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން މައުރޫފް ވިދާޅުވީ، ކުރިއަށް އޮތް ލޯކަލް ކައުންސިލް އިންތިޚާބާ އެކު ފެންނަ ނުފެންނަ ވޯޓަކަށް ދާން ރައީސް ޑޮކްޓަރު މުޙައްމަދު މުޢިއްޒު ނިންމަވާފައިވާއިރު، އެކަމުގެ އަޑީގައި އޮތް ކަމެއް ރައްޔިތުންނަށް ނޭނގޭ ކަމަށެވެ. އެކަމުގައި ފޮރުވިގެންވާ އެތައް ކަމެއް އޮތް ކަމަށް ފާހަގަ ކުރައްވައި މައުރޫފް ވިދާޅުވީ، ރައްޔިތުން މިހާތަނަށް ޤަބޫލު ކުރަމުން އައި ޑިމޮކްރަޓިކް ހަމަތައް ބޮލާލައި ޖަހާލައި، ހުދުމުހުތާރު ވެރިކަަމެއް ދިވެހި ރާއްޖޭގައި ޤާއިމު ކުރުމަށް ރައީސް މުޢިއްޒު ކުރައްވާ މަސައްކަތުގެ މުހިންމު ބޮޅެއް ކަމަށެވެ.
އެމްޑީޕީ އަކީ ޑިމޮކްރަޓިކް މަސައްކަތުގައި، ދިވެހި ރާއްޖޭގެ މިނިވަންކަމަށްޓަކައި މިހާތަނަށް މަސައްކަތް ކޮށްފައިވާ ޕާޓީ ކަމަށް ފާހަގަ ކުރައްވައި މައުރޫފް ވިދާޅުވީ، އެމްޑީޕީ އިން އޮތީ ރައީސް މުޢިއްޒު އަށް އެ ފުރުސަތު ދީގެން ތިބެން ނޫން ކަމަށެވެ. އެއާ އެކު މައުރޫފް ވިދާޅުވީ، ދެ އިންތިޚާބު އެއްކޮށްލައި، ވެރިކަމުގެ ނިޒާމު ގަޑުބަޑު ކުރުމަށް ދިވެހި ރައްޔިތުން ނޫނެކޭ ބުނަން ޖެހޭ ކަމަށެވެ. އަދި ވޯޓުލުމުގެ ހައްގު ނުގުޅައިގަނެ، ވަކި މީހެއްގެ ބާރުގެ ދަށަށް މުޅި ޤައުމާއި ސިޔާދަތު ދޫކޮށްލައިގެން ތިބެވެން ނެތް ކަމަށް ވެސް މައުރޫފް ވިދާޅުވި އެވެ.
