ރިޔާސީ ބަޔާން 2026: އެމްޑީޕީގެ މެމްބަރުން އިހުތިޖާޖު ކުރަން ފަށައިފި

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ރިޔާސީ ބަޔާން އިއްވަވާ ޖަލްސާއި، އިދިކޮޅު ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީީޕީ)ގެ މެމްބަރުން އިހުތިޖާޖު ކުރަން ފެށުމުން، މެމްބަރުންގެ ނަން އިއްވައިފި އެވެ.

ރައީސް މުޢިއްޒު ރިޔާސީ ބަޔާން އިއްވަން ފެށުމާ އެކު، އެމްޑީޕީގެ މެމްބަރުން ވަނީ މަޖިލީހުގައި އިހުތިޖާޖު ކުރަން ފަށައިފަ އެވެ. އެގޮތުން މެމްބަރުން ވަނީ ކަށި ގަނޑު ބޭނުން ކޮށްގެން މަޖިލީހުގައި އަޑު ގަދަ ކުރަން ފަށައިފަ އެވެ. އޭގެ ފަހުން އެކި ޝިއާރުތައް ލިޔެފައިވާ ބޯޑުތައް ހިފައިގެން މެމްބަރުން ވަނީ، ރައީސް މުޢިއްޒުގެ ކުރިފުޅުމަތީގައި އިހުތިޖާޖު ކޮށްފަ އެވެ. 

މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް ޢަބްދުއްރަޙީމް ޢަބްދުﷲ ވަނީ ގަލޮޅު ދެކުނު ދާއިރާގެ މެމްބަރު މީކާއީލް އަޙުމަދު ނަސީމް އާއި، ވައިކަރަދޫ ދާއިރާގެ މެމްބަރު ޙުސެއިން ޒިޔާދުގެ ނަން އިއްވައި މަޖިލީހުން ނިކުތުމަށް އަންގަވައިފަ އެވެ. އޭގެ ފަހުން ރިޔާސަތުން ވަނީ ހަނިމާދޫ ދާއިރާގެ މެމްބަރު ޢަބްދުލް ޣަފޫރު މޫސާގެ ނަން އިއްވަން މަސައްކަތް ކޮށްފަ އެވެ. ނަމަވެސް، ފަހުން ނަން އިއްވާފައި ނުވެ އެވެ.

އެމްޑީޕީގެ މެމްބަރުން މަޖިލީހުގައި އިހުތިޖާޖު ކޮށްފައި ވަނީ، ރައީސް މުޢިއްޒު އިއްވަވާ ރިޔާސީ ބަޔާނުގައި ދޮގު ހައްދަވާ ކަމަށް ފާހަގަކޮށެވެ. އެގޮތުން 2025 ވަނަ އަހަރުގެ ރިޔާސީ ބަޔާނުގައި ވެސް ގިނަ ވާހަކަ ތަކެއް ދައްކަވައި، ވައުދު ތަކެއް ވެވަޑައިގެންފައި ވީ ނަމަވެސް، މިހާތަނަށް އައިއިރު އެކަންކަން ފުރިހަމަ ވެފައި ނުވާ ކަމަށް ބުނެފައިވެ އެވެ.