އެމެރިކާއިން ކޮންމެ މިންވަރެއްގެ ހަމަލާއެއް ދިން ނަމަވެސް އޭގެ ރައްދުގައި ވަރުގަދަ ހަމަލާތަކެއް ދޭނެކަމުގެ އިންޒާރު އީރާނުން ދީފި
އީރާނުގެ ނިއުކްލިއާ މައްސަލައިގައި އެމެރިކާއާއެކު ބާއްވާ މަޝްވަރާތަކުގެ އާ ބުރެއް ބުރާސްފަތި ދުވަހަށް ތާވަލުކޮށްފައިވާއިރު، އެއްބަސްވުމަކަށް ނާދެވިއްޖެ ނަމަ އަސްކަރީ ފިޔަވަޅު އަޅާނެކަމުގެ އިންޒާރު ރައީސް ޓްރަމްޕް ވަނީ ދެއްވާފައި. ނަމަވެސް އީރާނުން ބުނަމުންދަނީ އެ ގައުމަށް ދޭ ކޮންމެ ހަމަލާއަކަށް ވަރުގަދަ ރައްދެއް ދޭނެ ކަމަށް.
އިރާނުގެ ޚާރިޖީ ވުޒާރާގެ ތަރުޖަމާނު އިސްމާޢީލް ބަޣާއީ، 2024 އޮކްޓޫބަރު 28 ވީ ހޯމަ ދުވަހު ތެހެރާންގައި ބޭއްވި ހަފުތާގެ ނޫސްވެރިންގެ ބައްދަލުވުމުގެ ތެރެއިން. | އޭއެފްޕީ
އެމެރިކާގެ ރައީސް ޑޮނަލްޑް ޓްރަމްޕް، އީރާނުގެ ބައެއް ތަންތަނަށް އަމާޒުކޮށް ހަނި ދާއިރާއެއްގެ ހަމަލާތަކެއް ދިނުމަށް ވިސްނަވަމުންދާކަމަށް ވިދާޅުވުމާ ގުޅިގެން، އެމެރިކާއިން ކޮންމެ މިންވަރެއްގެ ހަމަލާއެއް ދިން ނަމަވެސް އޭގެ ރައްދުގައި ވަރުގަދަ ހަމަލާތަކެއް ދޭނެކަމުގެ އިންޒާރު އީރާނުން ހޯމަ ދުވަހު ދީފިއެވެ.
އަންނަ ބުރާސްފަތި ދުވަހު އަލުން ފެށުމަށް ހަމަޖެހިފައިވާ މަޝްވަރާތަކުގައި އެއްބަސްވުމަކަށް އައުމަށް އީރާނަށް ބާރުއެޅުމުގެ ގޮތުން އެމެރިކާއިން ވަނީ މެދުއިރުމަތީގައި އެ ގައުމުގެ އަސްކަރީ ބާރު ގަދަކޮށްފައެވެ. އަދި އެއްބަސްވުމަކަށް ނާދެވިއްޖެ ނަމަ، އީރާނަށް ހަނި ދާއިރާއެއްގެ ހަމަލާތަކެއް ދިނުމާ މެދު ރައީސް ޓްރަމްޕް ގެންދަވަނީ ގޮތެއް ނިންމެވުމަށް ވިސްނަވަމުންނެވެ.
އީރާނުގެ ފޮރިން މިނިސްޓްރީން ހޯމަ ދުވަހު އަނެއްކާވެސް ތަކުރާރުކޮށް ބުނެފައިވަނީ، ކިތަންމެ ކުޑަ ހަމަލާއެއް ދިން ނަމަވެސް، އެއީ އީރާނާ ދެކޮޅަށް ހިންގާ އުދުވާނީ އަމަލެއްގެ ގޮތުގައި ބަލާނެ ކަމަށެވެ.
ތެހެރާންގައި ބޭއްވި ނޫސްވެރިންގެ ބައްދަލުވުމެއްގައި އީރާނުގެ ޚާރިޖީ ވުޒާރާގެ ތަރުޖަމާނު އިސްމާއީލް ބަޣާއީ ވިދާޅުވީ، އަމިއްލަ ނަފްސުގެ ދިފާއުގައި މަސައްކަތް ކުރުމުގެ ހައްގުގެ ދަށުން، ކޮންމެ ގައުމަކުންވެސް އުދުވާނީ ހަމަލާއަކަށް ވަރުގަދަ ރައްދެއް ދޭނެ ކަމަށާއި، އީރާނުންވެސް އަމަލުކުރާނީ އެގޮތަށް ކަމަށެވެ.
އޮމާން މެދުވެރިވެގެން ސްވިޒަލޭންޑުގައި ދެ ގައުމުގެ ދެމެދުގައި ނުސީދާކޮށް ކުރިއަށްގެންދިޔަ މަޝްވަރާތަކުގެ ދެވަނަ ބުރު އަންގާރަ ދުވަހު ވަނީ ނިންމާލާފައެވެ.
އީރާނާއި އޮމާނުން ކަށަވަރުކޮށްދީފައިވާ ގޮތުގައި، މަޝްވަރާތަކުގެ އިތުރު ބުރެއް އަންނަ ބުރާސްފަތި ދުވަހަށް ވަނީ ތާވަލުކޮށްފައެވެ. ނަމަވެސް އެމެރިކާއިން މިކަން އަދި ކަށަވަރުކޮށްދީފައެއް ނުވެއެވެ.
އީރާނުގެ މައްސަލައިގައި މެދުވެރިއެއްގެ ދައުރު އަދާކުރުމުން އެއްފަރާތްކުރެވިފައިވާ ޔޫރަޕިއަން ޔޫނިއަން (އީޔޫ) އިން ވަނީ، މަޝްވަރާތައް ފެށުމުގެ ކުރިން ޑިޕްލޮމެޓިކް ހައްލެއް ހޯދުމަށް ގޮވާލާފައެވެ.
އީޔޫގެ ޚާރިޖީ ވަޒީރުންގެ ބައްދަލުވުމުގެ ކުރިން އެ އިއްތިހާދުގެ ޚާރިޖީ ސިޔާސަތާ ބެހޭ ވެރިޔާ ކާޖާ ކަލާސް ވިދާޅުވީ، މި ސަރަހައްދަށް އިތުރު ހަނގުރާމައެއް ބޭނުންނުވާ ކަމަށާއި، މިހާރުވެސް ގިނަ ހަނގުރާމަތަކެއް ހިނގަމުންދާ ކަމަށެވެ.
އޭނާ އިތުރަށް ވިދާޅުވީ، އީރާން މިހާރު އޮތީ ތާރީޚުގައިވެސް އެ ގައުމު އެންމެ ބަލިކަށިވި ހާލަތުގައި ކަމަށްވާއިރު، ޑިޕްލޮމެޓިކް ހައްލެއް ހޯދުމަށް މި ވަގުތުގެ ބޭނުން ހިފަންޖެހޭ ކަމަށެވެ.
އީރާނުގެ ލީޑަރުންނަށް މި ފަހަކަށް އައިސް ބޮޑެތި ގޮންޖެހުންތަކަކާ ވަނީ ކުރިމަތިލާން ޖެހިފައެވެ. އޭގެ ތެރޭގައި ޖެނުއަރީ މަހު ހިނގި މުޒާހަރާތަކާއި، މިދިޔަ އަހަރު އިސްރާއީލާއެކު ކުރި 12 ދުވަހުގެ ހަނގުރާމައާއި، ސަރަހައްދީ ގޮތުން އީރާނުން ވާގިވެރިވާ ޖަމާއަތްތައް ބަލިކަށިވުން ހިމެނެއެވެ.
ހަނގުރާމައިގެ ބިރުވެރިކަން
ނަމަވެސް، މެދުވެރިން މެދުވެރިކޮށް ކުރިއަށްދާ މަޝްވަރާތަކުގައި ވާހަކަދެއްކޭނީ ހަމައެކަނި އެ ގައުމުގެ ނިއުކްލިއާ ޕްރޮގްރާމާ ގުޅޭގޮތުން ކަމަށް އީރާނުން ވަނީ ބުނެފައެވެ. ހުޅަނގުގެ ގައުމުތަކުން ގަބޫލުކުރާ ގޮތުގައި އީރާނުގެ ނިއުކްލިއާ ޕްރޮގްރާމަކީ ނިއުކްލިއާ ބޮން އުފެއްދުމަށް ހިންގާ ޕްރޮގްރާމެކެވެ. ނަމަވެސް ތެހެރާނުން އެކަން ދޮގުކުރެއެވެ.
އީރާނުގެ ފަރާތުން މި މަޝްވަރާތަކުގައި އިސްކޮށް ހުންނެވީ ޚާރިޖީ ވަޒީރު އައްބާސް އަރާގްޗީއެވެ. އެމެރިކާގެ ފަރާތުން ބައިވެރިވަނީ މަންދޫބު ސްޓީވް ވިޓްކޮފް އާއި ރައީސް ޓްރަމްޕްގެ ދަނބިދަރިފުޅު ޖެރެޑް ކުޝްނަރެވެ.
ވޮޝިންގޓަނުން އަސްކަރީ ބާރުތައް ރުކުރުވާލާފައިވާއިރުވެސް، އީރާނުން އަމާންނުދީ ހިފަހައްޓަމުންދާތީ ރައީސް ޓްރަމްޕް ހައިރާންވެވަޑައިގަންނަވާ ކަމަށް، ފޮކްސް ނިއުސްއަށް ދެއްވި އިންޓަވިއުއެއްގައި ވިޓްކޮފް ވިދާޅުވިއެވެ.
މިކަމަށް ރައްދު ދެއްވަމުން ބަޣާއީ ހޯމަ ދުވަހު ވިދާޅުވީ، އީރާނުގެ ތާރީޚުގެ އެއްވެސް ހިސާބެއްގައި އެ ގައުމުގެ ރައްޔިތުން ބައެއްގެ ކުރިމަތީގައި އިސްޖަހައި އަމާންދީފައި ނުވާނެ ކަމަށެވެ.
މިދިޔަ ހަފްތާ ބަންދުގައި ޔުނިވަރސިޓީތަކުގެ ކިޔެވުން އަލުން ފެށުމާއެކު، ސަރުކާރަށް ތާއީދުކުރާ ފަރާތްތަކާއި ސަރުކާރާ ދެކޮޅު ފަރާތްތަކުން ކުރި މުޒާހަރާތަކުގައި މަރުވި މީހުންގެ ހަނދާން އާކުރުމަށް ދަރިވަރުން ވަނީ އެއްވުންތައް ބާއްވާފައެވެ.
އީރާނުގެ ރައްޔިތުންގެ މެދުގައި އާ ހަނގުރާމައެއްގެ ބިރުވެރިކަން ބޮޑުވެފައިވާއިރު، ބައެއް ބޭރު ގައުމުތަކުން ވަނީ އެ ގައުމުތަކުގެ ރައްޔިތުން އީރާނުން ފޭބުމަށް އިލްތިމާސްކޮށްފައެވެ.
ސްވިޑަން، ސާބިއާ، ޕޮލެންޑް އަދި އޮސްޓްރޭލިއާއަށް ފަހު، އިންޑިއާއިން ވެސް ވަނީ އީރާނުގައި ތިބި އެ ގައުމުގެ ރައްޔިތުން އެ ގައުމުން ފޭބުމަށް ހޯމަ ދުވަހު ގޮވާލާފައެވެ. އިންޑިއާގެ ޚާރިޖީ ވުޒާރާގެ އަންދާޒާތަކުން ދައްކާގޮތުގައި އީރާނުގައި އިންޑިއާގެ 10،000 އެއްހާ ރައްޔިތުން ދިރިއުޅެއެވެ.
