ޔުރޭނިއަމް މުއްސަނދި ކުރުން ހުއްޓާލަން އެމެެރިކާ އިން ހުށަހަޅާފައި ނުވޭ، އީރާން އިން އެކަމަށް ނުވެސް އެދޭނެ: އަރާގްޗީ

އެމެރިކާ އާއި އީރާންއާ ދެމެދު ކުރިއަށް ގެންދަމުން އަންނަ ނިއުކްލިއާ މަޝްވަރާ ތަކުގައި އެންމެ ފަހުން ބޭއްވި ބައްދަލުވުމުގައި ޔުރޭނިއަމް މުއްސަނދި ކުރުން އެއްކޮށް ހުއްޓާލުމަށް އެމެެރިކާ އިން އެދިފައި ނުވާ ކަމަށާއި، އެ މަސައްކަތް މެދު ކަނޑާލުމަށް އީރާން އިން ހުށަހަޅާފައި ވެސް ނުވާނެ ކަމަށް އެ ޤައުމުގެ ފޮރިން މިނިސްޓަރު އައްބާސް އަރާގްޗީ ވިދާޅުވެއްޖެ އެވެ. 

ހުކުރު ދުވަހު އަރާގްޗީ މިހެން ވިދާޅުވީ، އެމެރިކާގެ މީޑިއާ އަކަށް ދެއްވި އިންޓަވިޔުއެއްގަ އެވެ. އެގޮތުން ކުރިއަށް އޮތް މަދު ދުވަސް ކޮޅެއްގެ ތެރޭގައި އީރާންގެ ފަރާތުން ދިފާއުގައި ހުށަހަޅާ ހުށަހެޅުން، ނުވަތަ ކައުންޓަޕްރޮޕޯސަމްގެ ދެލި ކޮޕީއެއް ތައްޔާރު ވާނެ ކަމަށް އުންމީދު ކުރައްވާ ކަމަށް އަރާގްޗީ ވިދާޅުވި އެވެ. 

އަރާގްޗީ ވިދާޅުވީ މިހާރު ކުރިއަށްދާ މަޝްވަރާ ތަކުގެ މައިގަނޑު އަމާޒަކީ، އީރާންގެ ނިއުކްލިއާ ޕްރޮގްރާމް އަކީ ސުލްޙަވެރި ބޭނުން ތަކަށް ކުރިއަށް ގެންދާ މަސައްކަތެއްކަން ކަށަވަރު ކުރުން ކަމަށެވެ. އަދި އީރާން އަށް އަޅާފައިވާ ދަތި ކުރުމުގެ ފިޔަވަޅު ތަކަށް ލުޔެއް ހޯދުމުގެ ބަދަލުގައި، ނިއުކްލިއާ ޕްރޮގްރާމް ސުލްޙަވެރިކަންމަތީ ދެމި އޮންނާނެކަން ޔަޤީން ކޮށްދިނުމަށްޓަކައި ފަންނީ އަދި ސިޔާސީ ގޮތުން އިތުބާރު އުފެއްދުމުގެ ފިޔަވަޅު ތަކެއް އެޅުމަށް ތައްޔާރަށް އޮތް ކަމަށް އޭނާ ވިދާޅުވި އެވެ. ނަމަވެސް، އެ ފިޔަވަޅު ތަކުގެ އިތުރު ތަފްސީލެއް ދެއްވާފައި ނުވެ އެވެ. 

އެމެެރިކާގެ ފަރާތުން މަޝްވަރާ ތަކުގައި ބައިވެރިވާ ސްޓީވް ވިޓްކޮފް އާއި ޖެރާޑް ކުޝްނާ އަށް ހުށަހަޅާ އީރާންގެ ހުށަހެޅުން ތައްޔާރު ކުރުމަށް ވަކި ސުން ގަޑިއެއް އަރާގްޗީ ކަނޑައަޅުއްވާފައި ނެތެވެ. ނަމަވެސް، ކުރިއަށް އޮތް ދެ ތިން ދުވަހުގެ ތެރޭގައި އެ ލިޔުން ތައްޔާރު ކުރުމަށް ފަހު، އީރާންގެ އިސްވެރިންނަށް ހުށަހަޅުއްވާނެ ކަމަށް އޭނާ ވިދާޅުވި އެވެ. އަދި ވަރަށް ކުރު މުއްދަތެއްގެ ތެރޭގައި ޑިޕްލޮމެޓިކް އެއްބަސްވުމަކަށް އާދެވިދާނެ ކަމަށް ޤަބޫލު ކުރައްވާ ކަމަށާއި، ކުރިއަށް އޮތް ހަފުތާއެއްހާ ދުވަހުގެ ތެރޭގައި އެ ޤައުމުގެ ދެ މެދުގައި އިތުރު މަޝްވަރާ ތަކެއް ބޭއްވުމުގެ ފުރުސަތު އޮތް ކަމަށް ވެސް އޭނާ ފާހަގަ ކުރެއްވި އެވެ. 

އަރާގްޗީގެ މި ވާހަކަތަކާ ގުޅިގެން އެެމެރިކާގެ ރިޔާސީ ގަނޑުވަރު، ވައިޓް ހައުސް އިން ވަގުތުން އެއްޗެއް ބުނެފައި ނުވެ އެވެ. ނަމަވެސް، އެމެރިކާގެ ރައީސް ޑޮނަލްޑް ޓްރަމްޕް ބުރާސްފަތި ދުވަހު ވިދާޅުވެފައި ވަނީ، އެއްބަސްވުމަކަށް އައުމަށް 10 ދުވަހާއި، 15 ދުވަހުގެ މުއްދަތެއް ދެއްވާފައިވާ ކަމަށެވެ. އަދި އެ މުއްދަތުގެ ތެރޭގައި އެއްބަސްވުމަކަށް ނާދެވިއްޖެ ނަމަ، އެކަމުގެ ހިތި ނަތީޖާއާ ކުރިމަތިލާން ޖެހޭނެ ކަމުގެ އިންޒާރު ވެސް ޓްރަމްޕް ވަނީ ދެއްވައިފަ އެވެ. 

އެމެރިކާ އާއި އީރާންއާ ދެމެދު ނިއުކްލިއާ މަޝްވަރާ ކުރަމުން އަންނަ މި ދަނޑިވަޅުގައި، އެމެރިކާ އިން އަންނަނީ މެދު އިރުމަތީގެ ސަރަހައްދުގައި އެ ޤައުމުގެ އަސްކަރީ ޙަރަކާތްތައް އިތުރު ކުރަމުންނެވެ. އެކަމަށް އިޝާރާތް ކުރައްވައި އަރާގްޗީ ވިދާޅުވީ، އަސްކަރީ ފިޔަވަޅު އެޅުމަކީ މައްސަލަ އިތުރަށް ގޯސްވެ، އެއްބަސްވުމަކަށް އައުމަށް ކުރާ މަސައްކަތަށް ހުރަސް އެޅޭނެ ކަމެއް ކަމަށް އަރާގްޗީ ވިދާޅުވި އެވެ. 

އެމެރިކާ އާއި، އީރާންއާ ދެމެދު ބާއްވަމުން އަންނަ މަޝްވަރާތައް އަލުން ފަށާފައިވާއިރު، މިހާތަނަށް ވަނީ މަޝްވަރާ ތަކުގެ ދެ ބުރެއް ކުރިއަށް ގެންގޮސްފަ އެވެ. އެންމެ ފަހުން ސްވިޒަލެންޑުގެ ޖެނީވާގައި ކުރިއަށް ދިޔަ ބައްދަލުވުމަށް ފަހު، ދެ ޤައުމުން ވެސް ވަނީ ތިން ވަނަ ބުރުގެ ބައްދަލުވުމެއް ބާއްވަން އެއްބަސްވެފަ އެވެ.