ސުޕްރީމް ކޯޓުގެ އަމުރު ބަލައި ނުގެން، 15 އިންސައްތަ އަށް ޓެރިފް ބޮޑު ކުރަން ޓްރަމްޕް ނިންމަވައިފި

އެމެރިކާ އަށް އެތެރެ ކުރާ މުދަލުން ނަގާ ޓެރިފް ނުވަތަ، އިމްޕޯޓު ޑިއުޓީ 15 އިންސައްތަ އަށް ބޮޑު ކުރަން އެ ޤައުމުގެ ރައީސް ޑޮނަލްޑް ޓްރަމްޕް ނިންމަވައިފި އެވެ. 

ޓްރަމްޕް މިހެން ނިންމަވާފައި ވަނީ ހޮނިހިރު ދުވަހު އެވެ. އެކަން ޓްރަމްޕް އިއުލާން ކުރައްވާފައި މި ވަނީ، އޭނާގެ ޓެރިފް ސިޔާސަތު ތަކުގެ ބޮޑު ބައެއް ބާތިލުކޮށް، އެއީ ޤާނޫނާ ޚިލާފު ކަމެއް ކަަމަށް އެމެރިކާގެ ސުޕްރީމް ކޯޓިން ޙުކުމް ކުރިތާ އެއް ދުވަސް ފަހުންނެވެ. 

ޓްރަމްޕް އޭނާގެ ޓުރުތު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ސުޕްރީމް ކޯޓުން ހުކުރު ދުވަހު ނިންމީ، އެމެރިކާއާ ދެކޮޅު ނިންމުމެއް ކަމަށެވެ. އެ ނިންމުން ދިރާސާ ކުރުމަށް ފަހު، ޤާނޫނީ ގޮތުން އެންމެ މަތިން ނެގޭނެ ކަމަށް ކަނޑައެޅިފައިވާ 15 އިންސައްތަ އަށް ޓެރިފް ބޮޑު ކުރަން ނިންމާފައިވާ ކަމަށް ޓްރަމްޕް ވިދާޅުވި އެވެ.

ސުޕްރީމް ކޯޓުގެ ޙުކުމާ ގުޅިގެން އެންމެ ފުރަތަމަ ޓްރަމްޕް އިއުލާން ކުރައްވާފައި ވަނީ 10 އިންސައްތައާ ހަމައަށް ޓެރިފް ނެގުމަށެވެ. ނަމަވެސް، މިހާރު ޓްރަމްޕް މި ވަނީ އެ އަދަދު އިތުރު ކުރައްވައިފަ އެވެ.

މީގެ އިތުރުން ޓްރަމްޕް ވިދާޅުވީ، ކުރިއަށް އޮތް މަސް ތަކުގެ ތެރޭގައި ޤާނޫނީ އޮނިގަނޑުގެ ތެރެއިން ޓެރިފް އިތުރު ކުރެވޭނެ އެހެން ގޮތް ތަކެއް ހޯދުމަށް އޭނާގެ ސަރުކާރުން މަސައްކަތް ކުރާނެ ކަމަށެވެ. މި ނިންމުމަކީ ސުޕްރީމް ކޯޓުގެ ޙުކުމުން ރެކިވަޑައިގަތުމަށް ޓްރަމްޕް ކުރައްވާ މަސައްކަތެއް ކަމަށް، މަސްރަހު ދިރާސާ ކުރާ ފަރާތްތަކުން ސިފަ ކުރެ އެވެ. އެމެރިކާގެ ސުޕްރީމް ކޯޓުގެ ހަ ފަނޑިޔާރުންގެ ވޯޓާ އެކު ކޮށްފައިވާ މި ޙުކުމަކީ، ޓްރަމްޕްގެ ވިޔަފާރީގެ ސިޔާސަތު ތަކަށް މިހާތަނަށް ކުރިމަތިވި އެންމެ ބޮޑު ހުރަހެވެ. 

ޤާނޫނީ ގޮތުން މިހާރު ކަނޑައެޅި 15 އިންސައްތައިގެ ޑިއުޓީ އަކީ ވަގުތީ ގޮތުން 150 ދުވަހުގެ މުއްދަތަށް ނެގޭނެ ޓެކުހެކެވެ. އެމެރިކާގެ ރިޔާސީ ގަނޑުވަރު، ވައިޓް ހައުސް އިން ނެރުނު މައުލޫމާތު ކަރުދާހެއްގައިވާ ގޮތުން، ބޭސްފަރުވާގެ ސާމާނު ފަދަ ވަކި ޚާއްސަ ދާއިރާ ތަކާއި، އެމެރިކާ-މެކްސިކޯ-ކެނެޑާ އެއްބަސްވުމުގެ ދަށުން އިތުރު ކުރާ މުދަލުން މި ޓެރިފް އިސްތިސްނާ ވެގެން ދާނެ އެވެ. ނަމަވެސް، އެމެރިކާ އާއެކު ވަކި ވަކިން ޓެރިފް އެއްބަސްވުންތައް ހަދާފައިވާ ޤައުމު ތަކުން ވެސް މި އައު ޓެރިފް ދައްކަން ޖެހޭނެ ކަމަށް ސަރުކާރުން ވަނީ ބުނެފަ އެވެ. 

ސުޕްރީމް ކޯޓުގައި ހިމެނޭ ނުވަ ފަނޑިޔާރުންގެ ތެރެއިން، ހަ ފަނޑިޔާރުންގެ އަޣުލަބިއްޔަތުން ކުރި ޙުކުމުގައި ބުނެފައި ވަނީ، 1977 ވަަނަ އަހަރުގެ ޤާނޫނަކަށް ރިއާޔަތްކޮށް ވަކި ވަކި ޤައުމު ތަކުން ނަގާ ޓެރިފް ކުއްލި ގޮތަކަށް ބޮޑު ކުރުމުގެ ބާރު ރައީސް އަށް ލިބިދީފައި ނުވާ ކަމަށެވެ. ސުޕްރީމް ކޯޓުގެ އެ ޙުކުމާ ގުޅިގެން ޓްރަމްޕް ވަނީ ވަރަށް ބޮޑަށް ކޯފާވެ ވަޑައިގެން، ސުޕްރީމް ކޯޓަށް ފާޑު ވިދާޅުވެފަ އެވެ. އަދި އެއީ ބާރާއި، ނުފޫޒުން ކޮށްފައިވާ ޙުކުމެއް ކަމަށް ވެސް ޓްރަމްޕް ތުހުމަތު ކުރައްވާފައިވެ އެވެ. 

ޙުކުމުގެ ފަހުން ވައިޓް ހައުސްގައި އޮތް ނޫސްވެރިންގެ ބައްދަލުވުމެއްގައި ޓްރަމްޕް ވިދާޅުވެފައި ވަނީ، ޤައުމަަށްޓަކައި ރަނގަޅު ގޮތް ނިންމުމުގެ ހިތްވަރު ބައެއް ފަނޑިޔާރުންގެ ކިބައިގައި ނެތް ކަމަށާއި، އެއީ ލަދުވެތި ކަމެއް ކަމަށެވެ. މި ޙުކުމް ނެރުއްވި ފަނޑިޔާރުންގެ ތެރޭގައި، ޓްރަމްޕްގެ ރިޔާސީ ފުރަތަމަ ދައުރުގެ ތެރޭގައި އޭނާ އަމިއްލަފުޅަށް އައްޔަން ކުރެއްވި ދެ ފަނޑިޔާރުން ވެސް ހިމެނި ވަޑައިގަންނަވަ އެވެ.