ލުބުނާނުގައި ހުންނަ އެމެރިކާ އެމްބަސީގެ މުވައްޒަފުން ފޭބުމަށް އަމުރުކޮށްފި
މިއީ އެމްބަސީގެ މުވައްޒަފުންގެ ރައްކާތެރިކަން ކަށަވަރުކުރުމަށް އެޅި ވަގުތީ ފިޔަވަޅެއް ކަމަށް ބުނެފައިވާއިރު، މި ނިންމުމާއެކު ގާތްގަނޑަކަށް 40 މުވައްޒަފުން މިހާރު ވަނީ ލުބުނާނުން ފުރާފައި.
މި ފޮޓޯއިން ފެންނަނީ ބެއިރޫތުގެ އިރުމަތީގައި އޮންނަ އައުކާރުގައި ހުންނަ އެމެރިކާގެ އެމްބަސީ އިމާރާތް. | އޭއެފްޕީ
އީރާނަށް ހަމަލާދޭނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވަމުން ގެންދަވާ ދަނޑިވަޅެއްގައި، ބެއިރޫތުގައި ހުންނަ އެމެރިކާގެ އެމްބަސީގައި މަސައްކަތްކުރާ ކޮންމެހެން ތިބެން ނުޖެހޭ މުވައްޒަފުން އެ ގައުމުން ފޭބުމަށް ހޯމަ ދުވަހު އެމެރިކާ ސަރުކާރުން އަމުރުކޮށްފިއެވެ.
އާންމުކޮށް އަމަލުކުރާ އުސޫލުގެ މަތިން ނަން ހާމަނުކުރުމަށް ޝަރުތުކޮށް އެމެރިކާގެ ސްޓޭޓް ޑިޕާޓްމަންޓުގެ އިސް އޮފިޝަލަކު ވިދާޅުވީ، މިއީ އެމެރިކާގެ ރައްޔިތުންނަށް އެހީތެރިކަން ފޯރުކޮށްދިނުމުގެ ގާބިލުކަން ދަމަހައްޓަމުން، އެމްބަސީގެ މުވައްޒަފުންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި އެޅި ވަގުތީ ފިޔަވަޅެއް ކަމަށެވެ.
ލުބުނާނުގެ ސަލާމަތީ ބާރުތަކުގެ މަސްދަރަކުން އޭއެފްޕީ ނިއުސް އެޖެންސީއަށް މައުލޫމާތު ދިން ގޮތުގައި، އެމްބަސީގެ ގާތްގަނޑަކަށް 40 މުވައްޒަފުން ހޯމަ ދުވަހު ވަނީ ބެއިރޫތުގެ ބައިނަލްއަގުވާމީ ވައިގެ ބަނދަރު މެދުވެރިކޮށް އެ ގައުމުން ފުރާފައެވެ.
މި އަމުރު ނެރެފައިވަނީ ކޮންމެހެން ތިބެން ނުޖެހޭ މުވައްޒަފުންނާއި އެ މީހުންގެ އާއިލާތަކުގެ މެންބަރުންނަށެވެ. ނަމަވެސް، ބެއިރޫތުގައި ހުންނަ އެމެރިކާގެ އެމްބަސީ ބަންދުނުކޮށް ހުޅުވާފައި ހުންނާނެއެވެ.
އެމެރިކާގެ އޮފިޝަލް އިތުރަށް ވިދާޅުވީ، އެ ގައުމުން އަބަދުވެސް ސަލާމަތީ މާހައުލު ވަޒަންކުރަމުންދާ ކަމަށާއި، އެންމެ ފަހުން ހެދި ރިވިއުއަށް ބިނާކޮށް، އެމްބަސީގައި ތިބޭ މުވައްޒަފުންގެ އަދަދު ހަމައެކަނި ކޮންމެހެން ބޭނުންވާ މުވައްޒަފުންނަށް މަދުކުރުމަކީ ބުއްދިވެރި ގޮތެއް ކަމަށް ނިންމާފައިވާ ކަމަށެވެ.
އީރާނުގެ ނިއުކްލިއާ ޕްރޮގްރާމާ ގުޅޭގޮތުން ހުރި ކަންބޮޑުވުންތަކާ އެކު، އެ ގައުމުން ހަރުކަށި ޝަރުތުތަކެއް ހިމެނޭ އެއްބަސްވުމެއް ގަބޫލުކުރަންޖެހޭނެ ކަމަށް ވިދާޅުވެ، ރައީސް ޓްރަމްޕް އީރާނަށް ހަމަލާދޭނެ ކަމުގެ އިންޒާރު ދެއްވަމުން ގެންދަވާއިރު، އެ ސަރަހައްދަށް ފޮނުވާ އެމެރިކާގެ ސިފައިންގެ އަދަދު އިތުރުކުރުމަށް ވެސް ޓްރަމްޕް ވަނީ އަމުރުކުރައްވާފައެވެ.
އީރާނާއި އިޒްރޭލާ ދެމެދު ހަނގުރާމައެއް ފެށިއްޖެ ނަމަ، އިޒްރޭލާ ދެކޮޅަށް ލުބުނާނުގެ ހިޒްބުﷲ އިން ބައިވެރިވާނެ ކަމަށް ވަނީ ބެލެވިފަ އެވެ.
އިޒްރޭލުން ދާދި ފަހުން ދިން އާ ހަމަލާއެއްގައި ހިޒްބުﷲގެ އަށް މެންބަރަކު މަރުވުމާ ގުޅިގެން، އެ ޖަމާޢަތުން ހޮނިހިރު ދުވަހު ވަނީ އިޒްރޭލާ ދެކޮޅަށް ބަދަލު ހިފުމުގެ ހަރަކާތްތައް ކުރިއަށްގެންދާނެ ކަމަށް ބުނެ އަހުދުވެފައެވެ.
