ކޯޕަންހޭގަންއާ ދެކޮޅަށް ކުޅެން ޖެހޭނީ އެންމެ މޮޅު ކުޅުން: ފްލިކް

ޔުއެފާ ޗެމްޕިއަންސް ލީގުގައި އެފްސީ ކޯޕަންހޭގަންއާ ދެކޮޅަށް ނިކުންނައިރު، އެ މެޗުގައި ކުޅެން ޖެހޭނީ ބާސެލޯނާގެ އެންމެ މޮޅު ކުޅުން ކަމަށް އެ ޓީމުގެ ކޯޗު ހަންސީ ފްލިކް ބުނެފި އެވެ. 

ކޯޕަންހޭގަން މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ފްލިކް ބުނީ، އެ ޓީމަށް ފުރިހަމަ އިހުތިރާމް އަދާ ކުރަން ޖެހޭ ކަމަށެވެ. އެއާ އެކު، ބާސެލޯނާ އިން އެ މެޗުގައި ވަރަށް ރޭވުންތެރިކަމާ އެކު، އެ ޓީމުގެ އެންމެ ފުރިހަމަ ކުޅުން ދައްކަން ޖެހޭ ކަމަށް ފްލިކް ބުންޏެވެ. ޚާއްސަކޮށް ބައި ކޮޅަށް ލަނޑެއް ވަނަ ނުދީ، މެޗުން މޮޅުވާން މަސައްކަތް ކުރަން ޖެހޭނެ ކަމަށް އޭނާ ބުންޏެވެ.

ބާސެލޯނާގެ އަމާޒަކީ ޗެމްޕިއަންސް ލީގުގެ ލީގު ބުރުގެ ގަދަ އަށް ޓީމުގެ ތެރޭގައި ހިމެނުންކަން ފާހަގަކޮށް ފްލިކް ބުނީ، ކޯޕަންހޭގަން މެޗު ފަސޭހަ ނުވާނެ ކަމަށެވެ. އެ މެޗުގައި އެންމެ ބޮޑު ސަމާލު ކަމެއް ދޭން ޖެހޭނީ ބާސެލޯނާގެ ވައްޓަފާޅީގައި، ބާސެލޯނާގެ އަމިއްލަ ގޭމު ކުޅުން ކަމަށް ފްލިކް ވަނީ ބުނެފަ އެވެ.

ޗެމްޕިއަންސް ލީގުގައި އަބަދު ވެސް ބާސެލޯނާގެ ޑިމާންޑު ބޮޑު ކަމަށާއި، އިތުރު މެޗަކަށް ފޯކަސް ކުރުމަކީ މިވަގުތު ކުރެވޭނެ ކަމެއް ނޫން ކަމަށް ފްލިކް ދެކެ އެވެ. އޭނާ ބުނީ މެޗުގައި ލިބޭ ފުރުސަތު ތަކުގެ ބޭނުން ހިފައި، މެޗުން މޮޅުވުމަށް މަސައްކަތް ކުރާއިރު ބާސެލޯނާގެ ވައްޓަފާޅި އަށް އިސްކަން ދޭން ޖެހޭނެ ކަމަށެވެ.

ކޯޕަންހޭގަންއާ ދެކޮޅަށް ނިކުންނައިރު، ބާސެލޯނާ އޮތީ ޗެމްޕިއަންސް ލީގު ތާވަލްގެ ނުވަ ވަނައިގަ އެވެ. މިހާތަނަށް ކުޅެފައިވާ ހަތް މެޗުގެ ތެރެއިން އެ ޓީމު މޮޅުވެފައި ވަނީ ހަތަރު މެޗުންނެވެ. ދެ މެޗުން ބަލިވެފައިވާއިރު، އަނެއް މެޗު ވަނީ އެއްވަރުވެފަ އެވެ. ގަދަ އަށް ޓީމުގެ ތެރޭގައި ހިމެނެން ބޭނުން ނަމަ، ބާސެލޯނާާ އަށް ޖެހޭނީ ތަފާތު ބޮޑު ނަތީޖާ އަކުން ކޯޕަންހޭގަން ބަލި ކުރާށެވެ.