އާޓެޓާ ހުރީ އާސެނަލް އަށް ކާމިޔާބު ވާނެ ކަމުގެ ޔަޤީންކަމާ އެކު

އާސެނަލް އިން ބޭނުންވާ ލަނޑު ދަނޑި އަށް ވާސިލުވެ، އެ ޓީމުން ބޭނުންވާ ކަންކަން ކާމިޔާބު ވާނެ ކަމުގެ ފުރިހަމަ ޔަޤީންކަން އެބަ އޮތް ކަމަށް، އާސެނަލްގެ ކޯޗު މިކޭލް އާޓެޓާ ބުނެފި އެވެ.

އާޓެޓާ މިހެން ބުނީ، ޔުއެފާ ޗެމްޕިއަންސް ލީގުގައި ކައިރަޓް އަލްމަޓީއާ ދެކޮޅަށް އާސެނަލް ނިކުންނަ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. އެ މެޗަށް ނިކުންނައިރު، އެންމެ ފަހުން އިނގިރޭސި ޕްރިމިއާ ލީގުގައި މެންޗެސްޓަރ ޔުނައިޓެޑާ ދެކޮޅަށް ކުޅުނު މެޗުން އާސެނަލް ވަނީ ބަލިވެފަ އެވެ.

ޔުނައިޓެޑު އަތުން ވީ ބައްޔަށް އިޝާރާތް ކުރަމުން އާޓެޓާ ބުނީ، އާސެނަލްގެ "ރިއެކްޝަން" ރަނގަޅު ކަމަށެވެ. އޭނާ ބުނީ ޓީމުގައި އޮތް ޕްރެޝަރު ކުޑަ ކުރަން ހުރިހާ ކުޅުންތެރިން ވެސް މަސައްްކަތް ކުރި ކަމަށެވެ. އާސެނަލް އަށް އިހުސާސް ކުރެވެނީ ކޮން ކަމެއްކަން ބަލަން ބޭނުންވި ކަމަށާއި، ކުރިއަށް އޮތް ހަތަރު މަސް ދުވަހުގެ ތެރޭގައި ކުރާނެ ކަންކަމަށް ވިސްނި ކަމަށް އޭނާ ބުންޏެވެ.

އާޓެޓާ ބުނީ އޭގެއިން ވިސްނުނީ އެންމެ ކަމެއް ކަމަށެވެ. އެއީ ހަތަރު މުބާރާތުގައި ވެސް އާސެނަލް އޮތީ ރަނގަޅު މަގާމެއްގައި ކަމަށާއި، އެއީ އާސެނަލް އަށް ހައްގު މަގާމެއް ކަމަށް އޭނާ ބުންޏެވެ. އެހެންކަމުން ކުރިއަށް އޮތް ހަތަރު މަސް ދުވަހުގެ ތެރޭގައި ވެސް އެކަން ދަމަހައްޓައި، އާސެނަލްގެ ގޮތުގައި ކުރިއަށް ދާން ކުޅުންތެރިންގެ ޢަޒުމު އޮތް ކަމަށް އާޓެޓާ ބުންޏެވެ. 

އެކަން ފާހަގަކޮށް އާޓެޓާ ބުނީ އާސެނަލްގެ ކުޅުންތެރިންގެ ވިސްނުން ވެސް އެގޮތުގައި ހުންނަން ބޭނުންވާ ކަމަށެވެ. އޭނާ ބުނީ އާސެނަލް އިން ކުރަމުން އަންނަ މަސައްކަތް ހުއްޓާ ނުލާނެ ކަމަށާއި، ޓީމުގެ އަމާޒަކީ ކުރިއަށް ގޮސް ކާމިޔާބާ ހަމައަށް ވާސިލުވުން ކަމަށެވެ. އެކަން ކުރެވޭނެ ކަމުގެ ޔަގީންކަން އޭނާ އަށް އޮތް ކަމަށާއި، ޓީމުގެ ސަޕޯޓަރުން ޓީމާ އެކު ތިބުމަށް އެދޭ ކަމަށް އާޓެޓާ ބުންޏެވެ.

މި މެޗަށް ނިކުންނައިރު، މިހާތަނަށް ޗެމްޕިއަންސް ލީގުގައި ކުޅުނު ހަތް މެޗުން ވެސް މޮޅުވެ، އާސެނަލް އެއް ވަނައިގައި އޮތީ 21 ޕޮއިންޓާ އެކު އެވެ. މި ސީޒަންގެ ޗެމްޕިއަންސް ލީގުގައި މިހާތަނަަށް ބަލި ނުވެ އޮތް ހަމައެކަނި ޓީމަކީ ވެސް އާސެނަލް އެވެ.