އަށް މެޗުން ވެސް މޮޅުވެ، އާސެނަލް ގަދަ 16 އަށް

ޔުއެފާ ޗެމްޕިއަންސް ލީގުގައި ކައިރަޓް އަލްމަޓީއާ ދެކޮޅަށް ކުޅުނު މެޗުން ވެސް މޮޅުވެ، ފުރިހަމަ ރެކޯޑަކާ އެކު އާސެނަލް އިން މުބާރާތުގެ ގަދަ 16 އިން ޖާގަ ހޯދައިފި އެވެ. 

ޗެމްޕިއަންސް ލީގުގެ ގަދަ އަށް ޓީމަށް މުބާރާތުގެ ގަދަ 16 އިން ޖާގަ ކަށަވަރުވާއިރު، އަނެއް އަަށް ޖާގަ ލިބޭނީ ޕްލޭ އޮފް ކުޅެެގެން މޮޅުވާ ޓީމު ތަކަށެވެ. އާސެނަލް އިން ގަދަ 16 އިން ޖާގަ ހޯދީ އަށް މެޗުން ވެސް މޮޅުވެގެންނެވެ. 

އާސެނަލްގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 3-2 އިންނެވެ. މެޗުގެ ފުރަތަމަ ހާފުގައި އާސެނަލް އިން ތިން ލަނޑު ޖެހިއިރު، ކައިރަޓް އަލްމަޓީ އިން ވަނީ ކޮންމެ ހާފެއްގައި އެއް ލަނޑު ޖަހައިފަ އެވެ.

މެޗު ފަށައިގެން ތިން ވަނަ މިނެޓުގައި އާސެނަލް އަށް ލީޑު ނަގައިދިނީ ވިކްޓާ ޔޮކަރޭޝް އެވެ. އޭގެ ހަތަރު މިނެޓު ފަހުން ކައިރަޓް އަލްމަޓީ އަށް ލިބުނު ޕެނަލްޓީ ކާމިޔާބުކޮށް، އެ ޓީމަށް ނަތީޖާ ހަމަހަމަ ކޮށްދިނީ ޖޯޖް ގެބްރިއެލް ޖޯޖީނިއޯ އެވެ. ދެ ވަނަ ފަހަރަށް މެޗުގައި އާސެނަލް އިން ލީޑު ނެގީ 15 ވަނަ މިނެޓުގައި ކައި ހަވާޓްޒް ޖެހި ލަނޑުންނެވެ. 

އޭގެ ފަހުން ފުރަތަމަ ހާާފު ނިމުމުގެ ކުރިން ގަބްރިއެލް މާޓިނެލީ ވަނީ އާސެނަލްގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. މެޗުގައި ކައިރަޓް އަލްމަޓީގެ ފަހު ލަނޑަކީ، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ރިކާޑީނިއޯ ޖެހި ލަނޑެކެވެ.

އާސެނަލް އިން ގަދަ 16 ގެ ޖާގަ ކަށަވަރު ކުރީ އަށް މެޗުން ވެސް މޮޅުވެ 24 ޕޮއިންޓާ އެކު އެވެ. މި ސީޒަންގެ ޗެމްޕިއަންސް ލީގުގައި މިހާތަނަށް ބަލި ނުވެ އޮތް ހަމައެކަނި ޓީމަކީ އާސެނަލް އެވެ.