ސީޒަންގައި މާޒިޔާ ބަލިކުރި ފުރަތަމަ ޓީމުގެ ޝަރަފާ އެކު، އޮޑިން ޕްރެޒިޑެންޓްސް ކަޕް ކާމިޔާބު ކޮށްފި
މާޒިޔާ ބަލިކޮށް އޮޑިން ޕްރެޒިޑެންޓްސް ކަޕް ކާމިޔާބު ކޮށްފައިވާއިރު، މިއީ މި ސީޒަންގައި މާޒިޔާ ބަލިވި ފުރަތަމަ މެޗު. އަނެއްކޮޅުން މިއީ އޮޑިން ފުރަތަމަ ޑިވިޝަންގައި ވާދަ ކުރާ ފުރަތަމަ ފަހަރު ކަމަށްވާއިރު، އެ ޓީމަށް މިއީ ކާމިޔާބު ސީޒަނެއް.
ރައީސް މުޢިއްޒު، ޕްރެޒިޑެންޓްސް ކަޕްގެ ތަށި އޮޑި ޓީމާ ހަވާލު ކޮށްދެއްވަނީ | ރައީސް އޮފީސް
ޕްރެޒިޑެންޓްސް ކަޕްގެ ފައިނަލްގައި މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށް، އޮޑި ސްޕޯޓްސް ކުލަބުން މުބާރާތުގެ ޗެމްޕިއަންކަން ހޯދައިފި އެވެ.
އަންގާރަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު ފައިނަލް މެޗު އޮޑިން ކާމިޔާބު ކުރީ ޕެނަލްޓީގައި ކުރި ހޯދައިގެންނެވެ. މެޗުގެ ފުރިހަމަ ވަގުތު ހަމަވީއިރު ދެ ޓީމު 1-1 އިން އެއްވަރުވެފައި އޮތުމުން، ނަތީޖާ ނެރެވުނީ ޕެނަލްޓީ ޖަހައިގެންނެވެ.
މެޗު ފަށައިގެން ތިން ވަނަ މިނެޓުގައި މާޒިޔާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު މާޒިޔާ އަށް ޖަހައިދިނީ ނާއިޒް ޙަސަން (ދާދު) އެވެ. ނަމަވެސް، މެޗުގެ 14 ވަނަ މިނެޓުގައި އޮޑިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު ޖަހައި އޮޑި އަށް ނަތީޖާ ހަމަހަމަ ކޮށްދިނީ އެ ޓީމުގެ ބިދޭސީ ކުޅުންތެރިޔާ ކިއާނޫ މާޝް ބްރައުން އެވެ.
ނަތީޖާ ނެރުމަށް ޖެހި ހަތް ޕެނަލްޓީގެ ތެރެއިން އޮޑިން، ފަސް ޕެނަލްޓީ ކާމިޔާބު ކުރިއެވެ. އެ ޓީމުގެ ދެ ޕެނަލްޓީ ވަނީ ނާކާމިޔާބުވެފަ އެވެ. މާޒިއާ އަށް ހަތް ޕެނަލްޓީގެ ތެރެއިން، ހަތަރު ޕެނަލްޓީ ކާމިޔާބު ކުރެވުނުއިރު، އެ ޓީމުގެ އަނެއް ތިން ޕެނަލްޓީ ވަނީ ނާކާމިޔާބުވެފަ އެވެ.
މާޒިޔާ ބަލިކޮށް އޮޑިން ޕްރެޒިޑެންޓްސް ކަޕް ކާމިޔާބު ކޮށްފައިވާއިރު، މިއީ މި ސީޒަންގައި މާޒިޔާ ބަލިވި ފުރަތަމަ މެޗެވެ. އަނެއްކޮޅުން މިއީ އޮޑިން ފުރަތަމަ ޑިވިޝަންގައި ވާދަ ކުރާ ފުރަތަމަ ފަހަރު ކަމަށްވާއިރު، އެ ޓީމަށް މިއީ ކާމިޔާބު ސީޒަން އެކެވެ. އެގޮތުން އެފްއޭއެމް އިން ބޭއްވި ލީގު ކަޕްގެ ފައިނަލްގައި އެ ޓީމު ވާދަކުރިއިރު، މާޒިޔާ އަތުން ވަނީ ބަލިވެފަ އެވެ.
އޭގެ ފަހުން މި ސީޒަންގެ ދިރާގު ދިވެހި ޕްރިމިއާ ލީގު އޮޑިން ނިންމާލީ ދެ ވަަނައިގަ އެވެ. މާޒިޔާ ބަލިކޮށް އޮޑިން ޕްރެޒިޑެންޓްސް ކަޕް ކާމިޔާބު ކުރިއިރު، މިއީ ފުރަތަމަ ޑިވިޝަންގައި އެ ޓީމުން ހޯދި ފުރަތަމަ ތަށްޓެވެ. އޮޑި އަތުން ބަލިވި މާޒިޔާ ވަނީ، 2023 ވަނަ އަހަރު އޮތް ޕްރެޒިޑެންޓްސް ކަޕް ކާމިޔާބު ކޮށްފަ އެވެ.
މިއަހަރުގެ ޕްރެޒިޑެންޓްސް ކަޕްގެ ފައިނަލް މެޗު ޝަރަފުވެރި ކޮށްދެއްވީ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އެވެ. އޭގެ އިތުރުން ކުޅިވަރު ވަޒީރު ޢަބްދުﷲ ރާފިޢު އާއި، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަޙުމަދު ޠާރިޤު (ޓޮމް) ވެސް ވަނީ ބައިވެރިވެ ވަޑައިގެންފަ އެވެ.
