ބުރުގެ މައްޗަށް ކުރި ހޯދައި އޮޑި ފައިނަލް އަށް

ޕްރެޒިޑެންޓްސް ކަޕްގެ ދެ ވަނަ ސެމީ ފައިނަލްގައި ބުރު ސްޕޯޓްސް ކުލަބާ ދެކޮޅަށް ކުޅުނު މެޗުން މޮޅުވެ، އޮޑި ސްޕޯޓްސް ކުލަބުން މުބާރާތުގެ ފައިނަލްގެ ފަހު ޖާގަ ހޯދައިފި އެވެ.

ހޮނިހިރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު އޮޑިން ކާމިޔާބު ކުރީ 2-0 އިންނެވެ. މެޗުގައި އޮޑިން އެ ޓީމުގެ ދެ ލަނޑު ވެސް ޖެހީ ދެ ވަނަ ހާފުގަ އެވެ. 

މެޗު ފަށައިގެން އޮޑިން ވަނީ ރަނގަޅަށް ކުޅެ، ލަނޑު ޖަހަން މަސައްކަތް ކޮށްފަ އެވެ. އެގޮތުން މެޗުގެ ފުރަތަމަ ހާފުގައި ވެސް އޮޑިން ވަނީ ލަނޑު ޖަހަން ފުރުސަތު ތަކެއް ހޯދައިފަ އެވެ. ނަމަވެސް، މެޗުގެ ފުރަތަމަ ހާފު ނިމުނީ ލަނޑެއް ނުޖެހި އެވެ.

މެޗުގެ ދެ ވަނަ ހާފު ފަށައިގެން ހަ ވަނަ މިނެޓުގައި އޮޑިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އޮޑި އަށް ޖަހައިދިނީ އެ ޓީމުގެ ބިދޭސީ ކުޅުންތެރިޔާ އިސްލާމް ފެކްރީ ޒެއިއަޑާ އެވެ. އޭގެ ފަހުން މެޗުގެ 63 ވަނަ މިނެޓުގައި އޮޑީގެ އަހްޒަމް ރަޝީދު ވަނީ އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

މޮޅާ އެކު އޮޑިން މުބާރާތުގެ ފައިނަލްގެ ޖާގަ ހޯދިއިރު، ފައިނަލްގައި އޮޑި ނިކުންނާނީ މުބާރާތުގެ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަންއާ ދެކޮޅަށެވެ. މީގެ ކުރިން ވެސް މި ސީޒަންގައި މި ދެ ޓީމު ވަނީ ބައްދަލު ކޮށްފަ އެވެ. އެގޮތުން އެފްއޭއެމް އިން ބޭއްވި ލީގު ކަޕްގެ ފައިނަލްގައި މާޒިޔާ އިން ވަނީ އޮޑި ބަލިކޮށް މުބާރާތް ކާމިޔާބު ކޮށްފަ އެވެ. 

މީގެ އިތުރުން ދިރާގު ދިވެހި ޕްރިމިއާ ލީގުގައި ވެސް މި ދެ ޓީމު ބައްދަލު ކުރިއިރު، ދެ މެޗުން ވެސް މޮޅުވެފައި ވަނީ މާޒިޔާ އެވެ. މިއީ އޮޑިން ފުރަތަމަ ޑިވިޝަންގައި ވާދަ ކުރަމުން އަންނަ ފުރަތަމަ ސީޒަން ކަމަށްވާއިރު، އޮޑި މި ވަނީ ފުރަތަމަ ސީޒަންގައި ވެސް ދެ  ފައިނަލް އިން ޖާގަ ހޯދައިފަ އެވެ.