މާޒިޔާ އިން ބުރު ބަލިކުރިއިރު، ނިއު އާއި އޮޑި އެއްވަރު

ޕްރެޒިޑެންޓްސް  ކަޕްގެ ގުރޫޕް ސްޓޭޖުގައި ބުރު ސްޕޯޓްސް ކުލަބާ ދެކޮޅަށް ކުޅުނު މެޗުން މާޒިޔާ ސްޕޯޓްސް އެންޑް ރެކްރިއޭޝަން މޮޅުވީއިރު، ނިއު ރޭޑިއަންޓް ސްޕޯޓްސް ކުލަބާއި އޮޑި ސްޕޯޓްސް ކުލަބު ބައްދަލު ކުރި މެޗު އެއްވަރުވެގެން ނިމިއްޖެ އެވެ.

އަންގާރަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗުގައި މާޒިޔާ އިން ވަނީ 1-0 އިން ބުރު ބަލިކޮށްފަ އެވެ. މެޗުގައި މާޒިޔާ އިން ލަނޑު ޖެހީ ފުރަަތަމަ ހާާފުގަ އެވެ. އެގޮތުން މެޗުގެ 19 ވަނަ މިނެޓުގައި މާޒިޔާ އަށް އެ ލަނޑު ޖަހައިދިނީ ބިދޭސީ ކުޅުންތެރިޔާ ނާޒިމް މަމަދުޒާދާ އެވެ. މާޒިޔާ އަކީ ޕްރެޒިޑެންޓްސް ކަޕްގެ އެންމެ ފަހުގެ ޗެމްޕިއަނުންނެވެ.

އަންގާރަ ދުވަހުގެ ރޭ ނިއު ރޭޑިއަންޓް އާއި، އޮޑި ބައްދަލު ކުރި މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ނިއު ރޭޑިއަންޓް އިންނެވެ. އޭގެ ފަހުން އޮޑިން ވަނީ ފަހަތުން އަރައި ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.

މެޗު ފަށައިގެން 13 ވަނަ މިނެޓުގައި ނިއު ރޭޑިއަންޓް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ނިއު ރޭޑިއަންޓް އަށް ޖަހައިދިނީ ބިދޭސީ ކުޅުންތެރިޔާ ބިލިޓީ އެވެ. މެޗުގެ ދެ ވަނަ ހާފުގައި އޮޑި އަށް ނަތީޖާ ހަމަހަމަވީ ނިއު ރޭޑިއަންޓްގެ އަޙުމަދު އިނާން އަތުން ބައި ކޮޅަށް ވަތް ލަނޑުންނެވެ. 

ޕްރެޒިޑެންޓްސް ކަޕްގެ ފޯމެޓު އޮތީ ލީގުގެ ހަތަރު ޓީމަށް މުބާރާތުގެ ގްރޫޕް ސްޓޭޖް އިން ޖާގަ ލިބޭ ގޮތަށެވެ. ލީގު ތާވަލްގެ ފަސް ވަނަ އާއި، އަށް ވަނައާ ދެމެދު އޮތް ޓީމުތަކަށް ޖެހުނީ ޕްލޭ އޮފްގައި ކުޅެގެން، ގުރޫޕް ސްޓޭޖް އިން ޖާގަ ހޯދާށެވެ. ކޮންމެ ގުރޫޕެއްގެ އެއް ވަނަ އާއި ދެ ވަނަ ޓީމު ކްރޮސްކޮށް ސެމީ ފައިނަލް ކުޅުމަށް ފަހު، މޮޅުވާ ދެ ޓީމު ފައިނަލަށް ދާނެ އެވެ.