ނިއުގެ ޗެއާމަން މުބީންގެ ތައުރީފު މާޒިޔާ އާއި އެ ކުލަބުގެ އިސްވެރިންނަށް

މާޒިޔާ ސްޕޯޓްސް އެންޑް ރެކްރިއޭޝަން އާއި، އެ ކުލަބުގެ އިސްވެރިންގެ މަސައްކަތާއި ހިތްވަރަށް، ނިއު ރޭޑިއަންޓް ސްޕޯޓްސް ކުލަބުގެ ޗެއާމަން އަޙުމަދު މުބީން ތައުރީފު ކޮށްފި އެވެ. 

މާޒިޔާ އިން ވަނީ މިފަހަރުގެ ދިރާގު ދިވެހި ޕްރިމިއާ ލީގު ކާމިޔާބު ކޮށްފަ އެވެ. ޖެހި ޖެހިގެން ފަސް ވަނަ ފަހަރަށް މާޒިޔާ އިން ލީގު ކާމިޔާބު ކުރީ އެއްވެސް މެޗަކުން ބަލި ނުވެ އެވެ. މާޒިޔާ އިން ވަނީ މިހާތަނަށް ޖުމުލަ ހަ ފަހަރެއްގެ މަތިން ލީގު ކާމިޔާބު ކޮށްފަ އެވެ.

މާޒިޔާ އަށް މަރުޙަބާ ކިޔައި މުބީން އޭނާގެ ސޯޝަލް މީޑިއާގައި ކުރި ޕޯސްޓެއްގައި ވިދާޅުވީ، މާޒިޔާ އިން ހޯދި ކާމިޔާބީ އަކީ އެ ކުލަބުގެ މެނޭޖުމަންޓާއި، ކޯޗުން އަދި ހީވާގި ކުޅުންތެރިން މުޅި ލީގުގައި ކުރި ބުރަ މަސައްކަތުގެ ނަތީޖާ ކަމަށެވެ. މީގެ އިތުރުން ދަނޑު މަތީގައި ދެއްކި ހިތްވަރާއި، އެކަކު އަނެކަކަށް ބެހެއްޓި ގާތް ގުޅުމަކީ، މިއަދު އެ ފެންނަ ކާމިޔާބީގެ އަސްލު ކަމަށް މުބީން ފާހަގަ ކުރެއްވި އެވެ. 

މާޒިޔާ އަކީ ދިވެހި ފުޓުބޯޅައިގައި ފާއިތުވި އަހަރު ތަކުގައި ވަރުގަދަ އަޒުމެއްގައި މަސައްކަތް ކުރާ ކުލަބެއްކަން މިފަހަރު ވެސް ސާބިތު ކޮށްދީފައިވާ ކަމަށް މުބީން ވިދާޅުވި އެވެ. މާޒިޔާގެ ސަޕޯޓަރުންނަށް މަރުޙަބާ ދަންނަވައި މުބީން ވިދާޅުވީ، މާޒިޔާގެ ސަޕޯޓަރުން ދެއްކި ހިތްވަރަކީ ކުޅުންތެރިންނަށް ލިބޭނެ އެންމެ ބޮޑު ބާރު ކަމަށެވެ.

މުބީންގެ ޕޯސްޓުގައި ވަނީ ރާއްޖޭގެ ފުޓުބޯޅަ އައު އުސްމިން ތަކަކަށް ގެންދިޔުމަށް މާޒިޔާގެ އިސްވެރިން ކުރާ މަސައްކަތުގައި ކާމިޔާބަށް ވެސް އެދިފަ އެވެ. އަދި ކުރިއަށް އޮތް މުބާރާތް ތަކުގައި ވެސް މާޒިޔާގެ ފަރާތުން މޮޅު ކުޅުމެއް ފެންނާނެ ކަމަށް އުންމީދު ކުރައްވާ ކަމަށް ވިދާޅުވެފައިވެ އެވެ. 

ފާއިތުވި އަހަރު ތަކުގައި ރާއްޖެ އިން އެންމެ ރަނގަޅު ކާމިޔާބީ ތަކެއް ހޯދި ކުލަބަކީ މާޒިޔާ އެވެ.