އީގަލްސް ބަލިކޮށް، އޮޑި ސެމީ ފައިނަލް އަށް

ޕްރެޒިޑެންޓްސް ކަޕްގެ ގުރޫޕް ސްޓޭޖުގެ ފަހު މެޗުގައި ކުލަބު އީގަލްސްއާ ދެކޮޅަށް ކުޅުނު މެޗުން މޮޅުވެ، އޮޑި ސްޕޯޓްސް ކުލަބުން މުބާރާތުގެ ސެމީ ފައިނަލްގެ ޖާގަ ހޯދައިފި އެވެ. 

ހޯމަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު އޮޑިން ކާމިޔާބު ކުރީ 4-2 އިންނެވެ. މެޗުގައި އީގަލްސް އިން ލަނޑު ޖަހައި ކުރި ހޯދާފައި ވަނިކޮށް، އޮޑިން ވަނީ ފަހަތުން އަރައި ހަތަރު ލަނޑު ޖަހައިގެން ލީޑު ހޯދައިފަ އެވެ. 

މެޗުގެ ފުރަތަމަ ހާފުގެ 20 ވަނަ މިނެޓުގައި އީގަލްސް އިން ލަނޑު ޖަހައި ލީޑު ނެގި އެވެ. އެ ޓީމަށް ލީޑު ނަގައިދިނީ އިސްމާއީލް އީސަ (މެސީ) އެވެ. އެއާ އެކު އީގަލްސް އިން މެޗުގެ ފުރަތަމަ ހާފު ނިންމާލީ އެއް ލަނޑުގެ ލީޑެއްގައި އޮވެގެންނެވެ.

މެޗުގެ ދެ ވަނަ ހާފު ފަށައިގެން ސާދަ ވަނަ މިނެޓުގައި އޮޑި އަށް ނަތީޖާ ހަމަހަމަ ކޮށްދިނީ އަހްޒަމް ރަޝީދު އެވެ. އޭގެ ފަހުން މެޗުގެ 71 ވަނަ މިނެޓުގައި އަހްޒަމް ވަނީ އޮޑީގެ ދެ ވަނަ ލަނޑު ޖަހައި އެ ޓީމަށް ލީޑު ނަގައިދީފަ އެވެ.

މެޗުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް އޮޑީގެ ތިން ވަނަ ލަނޑު ޖަހައިދިނީ އަޙުމަދު އައިހަމް އެވެ. އޭގެ ތިން މިނެޓު ފަހުން އަޔާޒް އަޙުމަދު ވަނީ އޮޑީގެ ހަތަރު ވަނަ ލަނޑު ޖަހައިފަ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި އީގަލްސްގެ ދެ ވަނަ ލަނޑު ޖެހީ އިބްރާހީމް މަހުދީ ޙުސެއިން (ފޭދޫ އިއްބެ) އެވެ.

އީގަލްސް ބަލިކޮށް އޮޑިން މުބާރާތުގެ ސެމީ ފައިނަލްގެ ފުރުސަތު ހޯދީ އެއް ވަނަ ޓީމުގެ ގޮތުގަ އެވެ. އޮޑީގެ ފުރަތަމަ މެޗުގައި ނިއު ރޭޑިއަންޓް ސްޕޯޓްސް ކުލަބާ ވަނީ އެއްވަރުވެފަ އެވެ. މި ގުރޫޕުގެ ދެ ވަނަ ޓީމުގެ ގޮތުގައި ސެމީ ފައިނަލްގެ ޖާގަ ހޯދީ ނިއު އެވެ.

މުބާރާތުގެ ސެމީ ފައިނަލްގައި އޮޑި ނިކުންނާނީ ބުރު ސްޕޯޓްސް ކުލަބާ ދެކޮޅަށެވެ.