ދެ ވަނަ މެޗުގައި އީގަލްސް ބަލިކޮށް، ނިއު ސެމީ ފައިނަލް އަށް

މިހާރު ކުރިއަށްދާ ޕްރެޒިޑެންޓްސް ކަޕްގެ ގުރޫޕް ސްޓޭޖުގައި ކުލަބު އީގަލްސްއާ ދެކޮޅަށް ކުޅުނު މެޗުން މޮޅުވެ، ނިއު ރޭޑިއަންޓް ސްޕޯޓްސް ކުލަބުން މުބާރާތުގެ ސެމީ ފައިނަލްގެ ޖާގަ ހޯދައިފި އެވެ.

ހުކުރު ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ނިއު އިން ކާމިޔާބު ކުރީ 2-1 އިންނެވެ. މެޗުގައި ނިއު އަށް ލީޑު ލިބިފައި ވަނިކޮށް، އީގަލްސް އިން ނަތީޖާ ހަމަހަމަ ވެސް ކުރި އެވެ. ނަމަވެސް، ދެ ވަނަ ލަނޑެއް ޖަހައިގެން ނިއު އިން ވަނީ މެޗުން މޮޅުވެފަ އެވެ.

މެޗު ފަށައިގެން 13 ވަނަ މިނެޓުގައި އީގަލްސްގެ ބިދޭސީ ކުޅުންތެރިޔާ މާވިން ލެބީ އަތުން ބައި ކޮޅަށް ވަތް ލަނޑާ އެކު، ނިއު އަށް ވަނީ ލީޑު ލިބިފަ އެވެ. އޭގެ ފަހުން މެޗުގެ ފުރަތަމަ ހާފުގެ ފަހު ވަގުތުގައި އީގަލްސްގެ ހިސާމް ސަލީމް ވަނީ ލަނޑު ޖަހައި އެ ޓީމަށް ނަތީޖާ ހަމަހަމަ ކޮށްދީފަ އެވެ. މެޗުގެ ދެ ވަނަ ހާފު ފަށައިގެން 12 ވަނަ މިނެޓުގައި ނިއުގެ ބިދޭސީ ކުޅުންތެރިޔާ ލުއިސް ގޯމޭޭޒް ޑަ ސިލްވާ ވަނީ ލަނޑު ޖަަހައި އަލުން ލީޑު ނަގައިފަ އެވެ.

ގުރޫޕް ސްޓޭޖުގައި ނިއު އާއި، އޮޑި ސްޕޯޓްސް ކުލަބު ބައްދަލު ކުރި ފުރަތަމަ މެޗު އެއްވަރުވީއިރު، ދެ ވަނަ މެޗުން މޮޅުވެ ނިއު އިން މި ވަނީ ސެމީ ފައިނަލްގެ ޖާގަ ހޯދައިފަ އެވެ. މި ގުރޫޕް އިން ސެމީ ފައިނަލްގެ ޖާގަ ލިބެނީ އޮޑި އާއި އީގަލްސް ކުޅޭ މެޗުންނެވެ. އެ މެޗުން ބަލި ނުވެ ފަރު ޖައްސާލައިގެން އޮޑި އަށް ސެމީ ފައިނަލްގެ ޖާގަ ލިބޭނެ އެވެ.