ޕެނަލްޓީގައި ނިއު ރޭޑިއަންޓް ބަލިކޮށް، ތަށި ދިފާއު ކުރަން މާޒިޔާ ފައިނަލަށް

މިހާރު ކުރިއަށްދާ ޕްރެޒިޑެންޓްސް ކަޕްގެ ފުރަތަމަ ސެމީ ފައިނަލްގައި ނިއު ރޭޑިއަންޓް ސްޕޯޓްސް ކުލަބާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އިން މުބާރާތުގެ ފައިނަލްގެ ޖާގަ ހޯދައިފި އެވެ. 

ހުކުރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު މާޒިޔާ އިން ކާމިޔާބު ކުރީ ޕެނަލްޓީގައި ކުރި ހޯދައިގެންނެވެ. މެޗުގައި މާޒިޔާ އިން ދެ ލަނޑު ޖަހައިގެން ލީޑު ނަގާފައި ވަނިކޮށް، ފަހަތުން އަރައި ދެ ލަނޑު ޖަހައިގެން ނިއު އިން ނަތީޖާ ހަމަހަމަ ކުރި އެވެ. 

މެޗު ފަށައިގެން ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނުއިރު، ދެ ޓީމުން ވެސް ދިޔައީ ލިބުނު ފުރުސަތުގައި ލަނޑު ޖަހަން މަސައްކަތް ކުރަމުންނެވެ. މެޗުގެ ފުރަތަމަ ހާފުގެ 28 ވަނަ މިނެޓުގައި ނިއުގެ އޭރިޔާ ތެރެއިން ލިބުނު ބޯޅަ ތިރި ތިރިން ގޯލަށް ފޮނުވާލައިގެން މާޒިޔާ އަށް ލީޑު ނަގައިދިނީ އަޙުމަދު އައިހަމް އެވެ. އޭގެ ފަހުން މެޗުގެ 40 ވަނަ މިނެޓުގައި އައިހަމް ވަނީ ދެ ވަނަ ލަނޑެއް ޖަހައި މާޒިޔާގެ ލީޑު ފުޅާ ވެސް ކޮށްފަ އެވެ.

މެޗުގެ ދެ ވަނަ ހާފު ފަށައިގެން ނިއު އިން ވަނީ ރަނގަޅަށް ކުޅެން މަސައްކަތް ކޮށްފަ އެވެ. އެގޮތުން ދެ ވަނަ ހާފު ފަށައިގެން ހަ ވަނަ މިނެޓުގައި ނިއުގެ ބިދޭސީ ކުޅުންތެރިޔާ އަލްހާޖީ ގޭރޯ ވަނީ އެ ޓީމުގެ ފުރަތަމަ ލަނޑު ޖަހައި ފަރަގު ކުޑަ ކޮށްފަ އެވެ. އޭގެ ފަހުން މެޗގެ 67 ވަނަ މިނެޓުގައި ނިއުގެ ދެ ވަނަ ލަނޑު ޖަހައި ނަތީޖާ ހަމަހަމަ ކޮށްދިނީ ބަދަލު ކުޅުންތެރިޔެއްގެ ގޮތުގައި ކުޅެން ނިކުތް އަލީ އަޝްފާޤު (ދަގަނޑޭ) އެވެ.

މެޗުގެ ފުރިހަމަ ވަގުތު ހަމަވީއިރު ދެ ޓީމު އެއްވަރުވެފައި އޮތުމުން ނަތީޖާ ނެރުމަށް ޖެހި ޕެނަލްޓީގައި މާޒިޔާ އިން ވަނީ ހަތަރު ޕެނަލްޓީ ކާމިޔާބު ކޮށްފަ އެވެ. އެއީ ހަމްޒާ މުޙައްމަދު (ހަމްޕު) އާއި، ނާޒިމް މަމަދްޒާދާ އާއި، އައިހަމް އަދި ރެެގެން އޮބެން އެވެ. މާޒިޔާގެ އިބްރާހީމް އައިސަމްގެ ޕެނަލްޓީ ވަނީ ނާކާމިޔާބުވެފަ އެވެ. 

ޕެނަލްޓީގައި ނިއު އަށް ކާމިޔާބު ކުރެވުނީ ތިން ޕެނަލްޓީ އެވެ. އެއީ އަލްހާޖީ ގޭރޯ އާއި، އަލީ ފާޞިރު (ސެންޓޭ) އަދި އަޙުމަދު ހުސާމްގެ ޕެނަލްޓީ އެވެ. ނިއުގެ ދަގަނޑޭ އަދި ޔާޔާ ބިލިޓީގެ ޕެނަލްޓީ ވަނީ ނާކާމިޔާބުވެފަ އެވެ.

ނިއު ބަލިކޮށް މާޒިޔާ އިން މުބާރާތުގެ ފައިނަލްގެ ޖާގަ ހޯދިއިރު، މާޒިޔާ އަކީ ޕްރެޒިޑެންޓްސް ކަޕްގެ އެންމެ ފަހުގެ ޗެމްޕިއަނުންނެވެ. މީގެ ކުރިން އެންމެ ފަހުން ޕްރެޒިޑެންޓްސް ކަޕް ބާއްވާފައި ވަނީ 2023 ވަނަ އަހަރު އެވެ.