ވެމްކޯގެ ކުނި ހުސްކުރާ ރޭމްޕް މަތިން ވެއްޓި ޑްރައިވަރަކަށް ސީރިއަސް އަނިޔާވި މައްސަލަ ވެމްކޯއިން ސިއްރު ކުރަނީ
ވެމްކޯގެ ރޭމްޕް މަތިން ވެއްޓި ސީރިއަސް އަނިޔާތަކެއް ލިބުނު ޑްރައިވަރަކަށް އައިޖީއެމްއެޗްގެ ވެންޓިލޭޓަރުގައި ފަރުވާދެމުންދާއިރު، މި މައްސަލަ ފުލުހުން މިހާރު ދަނީ ތަހުގީގު ކުރަމުން. މި ހާދިސާއާ ގުޅިގެން ކުންފުނީގެ އިހުމާލު އޮތްކަމަށް އާއިލާއިން ތުހުމަތުކުރާއިރު، މުވައްޒަފުންގެ ސަލާމަތާއި ރައްކާތެރިކަމަށް ވެމްކޯއިން އެކަށީގެންވާ ފިޔަވަޅު ނާޅާކަމުގެ ޝަކުވާތައް ވަނީ ބޮޑުވެފަ. މީގެ އިތުރުން މުވައްޒަފުންގެ އިންޝުއަރެންސާއި އިނާޔަތްތައް ކަނޑާލާފައިވާ މައްސަލައިގައި ވެސް ކުންފުންޏަށް ބޮޑެތި ފާޑުކިޔުންތަކެއް ވަނީ އަމާޒުވެފަ.
ހަސަން ނަޒީރު ރޭމްޕްމަތިން ވެއްޓިފައި | ސޯޝަލް މީޑިއާ
ވެމްކޯގެ ކުނި ހުސްކުރާ ރޭމްޕް މަތިން ވެއްޓި ޑްރައިވަރަކަށް ސީރިއަސް އަނިޔާވި މައްސަލަ ވެމްކޯއިން ސިއްރު ކުރަމުންދާކަން ހާމަވެއްޖެ އެވެ.
މި ހާދިސާ ހިނގީ މިދިޔަ އާދީއްތަ ދުވަހު އެވެ. މިދިޔަ އާދިއްތަ ދުވަހުގެ ރޭ ދަންވަރު 3:00 ހާއިރު، ވެމްކޯގެ ވެހިކަލްތައް ކުނި ހުސްކުރާ ރޭމްޕް މަތިން ކޮންޓޭނަރެއްގެ ތެރެއަށް ވެއްޓި ހަސަން ނަޒީރަށް ބޮޑެތި އަނިޔާތަކެއް ވެފައިވާ ކަމަށް އޭނާގެ އާއިލާއިން މައުލޫމާތުދެ އެވެ.
އަނިޔާވި ނަޒީރަށް މިހާރު އައިޖީއެމްއެޗްގެ ވެންޓިލޭޓަރުގައި ފަރުވާދެމުން އަންނަ އިރު، އޭނާގެ މޭކަށިގަނޑުގެ ތިން ތަނަކުން ބިންދައިގެން ގޮސް، އަމިއްލައަށް ނޭވާލުމަށް ނުކެޅިދިފައިވެ އެވެ. ވެމްކޯއިން މި މައްސަލައިގައި އަޅާނުލާ އޮތުމުން އެންމެ ފަހުން އާއިލާއިން ވަނީ މި މައްސަލަ ފުލުހަށް ހުށަހަޅާފަ އެވެ.
މިކަމާއި ގުޅިގެން ފުލުހުން ބުނީ ފެބްރުއަރީ 22 ވަނަ ދުވަހު މާލޭގައި ހުންނަ ވެމްކޯގެ ސައިޓް ތެރޭގައި ހިނގި ހާދިސާއެއްގައި މީހަކަށް ބޮޑެތި އަނިޔާތަކެއް ވެފައިވާ މައްސަލަ ފެބްރުއަރީ 23 ވަނަ ދުވަހުގެ ހަވީރުގެ ވަގުތެއްގައި ފުލުހުންނަށް ހުށަހަޅާފައިވާ ކަމަށެވެ. އަދި މި ހާދިސާގައި އަނިޔާވި މީހާ އަށް އައިޖީއެމްއެޗް ވެންޓިލޭޓަރުގައި ފަރުވާ ދެމުންދާ ކަމަށް ފުލުހުން ބުނެ އެވެ.
ފުލުހުން އަންނަނީ މި މައްސަލަ ތަހުގީގު ކުރަމުންނެވެ. ނަމަވެސް ތަހުގީގު ކުރަނީ ސިދާ ކޮން ކަމެއް ކަން ފުލުހުން ހާމަ ނުކުރެ އެވެ.
ވެމްކޯގެ މުވައްޒަފުންނަށް ކުންފުނިން އިހުމާލުވަމުން އަންނަ ކަމުގެ އެތައް އަޑުތަކެއް ފެތުރިފައިވާ އިރު، ދާދިފަހުން މުސާރަ ދިނުން ލަސްކުރުމާއި، ރޯދަ އެލަވަންސް ވެސް ނުދީ ހިފެހެއްޓި އެވެ. މީގެ އިތުރުން ބިދޭސީ މުވައްޒަފުންނަށް މުސާރަ ނުދީ ހިފަހައްޓާފައިވާ މައްސަލަ ވެސް ފެންމަތިވި އެވެ.
ވެމްކޯގެ މުވައްޒަފުން ބުނީ އެކުންފުނީގެ ހެލްތް އިޝިއުރަންސް 2022 ވަނަ އަހަރު ކަނޑާލާފައިވާ ކަމަށާއި، އަދިވެސް އެއްވެސް މުވައްޒަފަކަށް މިހާތަނަށް ރިސްކު އެލަވަންސް ވެސް ދީފައި ނުވާ ކަމަށެވެ. އަދި ނަޒީރު ވެއްޓުނު ހާދިސާއާ ގުޅިގެން އެހެން ޑްރައިވަރުން ކަންބޮޑުވުން ފާޅުކޮށް، ރިސްކު އެލަވަންސް ހޯދުމަށް މަސައްކަތް ކުރުމުން، ވަޒީފާއިން ވަކިކުރާނެ ކަމުގެ އިންޒާރުދީ އެ ފަރާތްތަކަށް ބިރު ދައްކަމުންދާ ކަމަށެވެ.
