ލ.އިސްދޫ ވޭސްޓު މެނޭޖުމަންޓު ސެންޓަރ އަޅަން ގެންދިޔަ ސާމާނު ބޭނުންކޮށްގެން އަމިއްލަ މީހެއްގެ ގޯތީގައި ޕީއެންސީގެ ޖަގަހަ އެއް އަޅަނީ

ލ.އިސްދޫ ވޭސްޓު މެނޭޖުމަންޓު ސެންޓަރ އަޅަން ވެމްކޯއިން ގެނެސްފައިވާ ތަކެތި ބޭނުންކޮށްގެން އިސްދޫ އަމިއްލަ މީހެއްގެ ގޯތީގަ ސަރުކާރުގެ ކުންފުނި ތަކުގެ މުވައްޒަފުން ނެރެގެން ރެޔާ ދުވާލު ބޮޑު ހޯލެއް ރާނާ ހިޔާ ކުރަމުންދާ ކަން ހާމަވެއްޖެ އެވެ.

އ ދާއިރާގެ މަޖިލިސް މެމްބަރު ފޭސްބުކްގައި ކުރައްވާފައިވާ ޕޯސްޓެއްގައި ވާގޮތުން މިއީ 2026 ކައުންސިލް އިންތިހާބަށް ޕީ އެންސީ އިން އަޅާ ޖަގަހައެކެވެ. 

2018 އިން ފެށިގެން އެ ރަށުގައި ކައުންސިލުން ވޭސްޓް މެނޭޖްމަންޓް ސެންޓަރެއް ހިންގަ އެވެ. އެ ތަން އަޕްގްރޭޑް ކުރުމުގެ މަސައްކަތަށް އެ ރަށަށް އެޅި ގާ ގެންގޮސްފައި ވެ އެވެ. އަދި އެ ކަމަށް ބޭނުންވާ ހިލަ އާއި ހިލަވެލި ވެސް އެ ރަށަށް ގެންގޮސްފައި ވެ އެވެ. މި މަސައްކަތުގެ އަމަލީ މަސައްކަތް ނުކޮށް އެ ތަކެތި ހުރީ ބަހައްޓާފައެވެ.

އިތުބާރު ހުރި ފަރާތަކުން ރާއްޖެއެމްވީ އަށް މައުލޫމާތު ދިން ގޮތުގައި މި ތަކެތި ހުރި ސައިޓުން އަމިއްލަ މީހެއްގެ ގޯއްޗާއި ހިސާބަށް ގެންދިޔައީ އާރްޑީސީގެ ވެހިކަލް އެއްގަ އެވެ. އަދި އެކަން ކޮށްފައި ވަނީ މީގެ ދެ ތިން ދުވަސް ކުރިން ދަންވަރުގެ ވަގުތެއްގައި ކަމަށް ވެސް މި ނޫހަށް ވަނީ މައުލޫމާތު ލިބިފަ އެވެ. 

އެ ރަށުން ރާއްޖެ އެމްވީ އަށް މައުލޫމާތު ދިން އާއްމުން ބުނި ގޮތުގައި މި ޖަގަހައިގެ މަސައްކަތް ކުރަމުން ދަނީ ސަރުކާރު މުވައްޒަފުން މެދުވެރިކޮށެވެ. ވެމްކޯ މުވައްޒަފުންނާއި އާރްޑީސީ މުވައްޒަފުން މިތަން ރޭނުމުގައި ވެސް ހަރަކާތެރިވާ ކަމަށް ވަނީ މައުލޫމާތު ލިބިފަ އެވެ. ފެނަކަ އޮފީސް ރޭނުމަށް ގެނެސްފައިވާ ގާތައް ވެސް މި މަސައްކަތަށް ބޭނުން ކުރަމުންދާ ކަން މި ނޫހަށް ވަނީ އެނގިފަ އެވެ. މި ތަކެތި ގެންގޮސްފައި ވަނީ ކައުންސިލް އާއި ވެމްކޯ އަށް ވެސް އެނގުމަކާއި ނުލާ މެމްބަރުގެ އިރުޝާދުގެ މަތިން ކަމަށް މި ނޫހަށް މައުލޫމާތު ދިން ފަރާތްތަކުން ފާހަގަކުރެ އެވެ.

"މި މަސައްކަތް ކުރަމުން ދަނީ ބަނަފްސާ ކިޔާ ގެ އެއްގައި މިކަން މި ކުރަނީ. ދައުލަތުގެ މުދަލާއި ވަސީލަތް ބޭނުންކޮށްގެން މިކަން މި ކުރަނީ." އޭނާ ވަނީ ބުނެފަ އެވެ.

ރާއްޖެ އެމްވީ އަށް އެ ރަށު މީހަކު ބުނީ އެ ތަނަށް ކަރަންޓު ވެސް ލާފައި ވަނީ ފެނަކައިގެ އުސޫލާއި ޚިލާފަށް ކަމަށެވެ. އެގޮތުން ސީދާ މެއިން ބޮކްސް އިން މީޓަރަކާއި ނުލާ ކަރަންޓު ލާފައިވާ ކަމަށް ރާއްޖެ އެމްވީ އަށް މައުލޫމާތު ދިން މީހާ ވަނީ ބުނެފަ އެވެ. 

"މެއިން ބޮކްސް އިން ނަގާފައި، އެތަނަށް ކަރަންޓު ލާފައި ހުރީ. ޑީބޯޑުން ކަރަންޓު ނަގާފައި ލާފައި ހުރީ." ރާއްޖެ ޓީވީ އަށް މައުލޫމާތު ދިން މީހާ ވަނީ ބުނެފަ އެވެ.

މިކަމާއި މެދު ހިތްހަމަ ނުޖެހިގެން އާއްމުން ދަނީ މީސްމީޑިއާގައި ކަންބޮޑުވުން ހިއްސާކުރަމުންނެވެ. އެ ރަށުން ވާހަކަ ދެއްކި އިތުރު މީހަކު ބުނެފައި ވަނީ މަޖިލީހުގެ އިސްދޫ ދާއިރާގެ މެމްބަރު އިސްމާއިލް ޝަފީއު އިސްވެ ހުންނަވައިގެން ސިޔާސީ މަސައްކަތަށް ލ.މާބައިދޫ ޔޫތް ސެންޓަރ ވެސް ބޭނުން ކުރަމުންދާތީ އެކަމާއި މެދު ވެސް އާއްމުންގެ ކަންބޮޑުވުންތަކެއް އެބަ ހުރިކަމަށެވެ.