މެމްބަރުންނާއި ކުންފުނިތަކުގެ ވެރިންނަށް މުއިއްޒު އަށް ކަޓު ނުދީ ވިޔަފާރި އެއް ވެސް ނުހިންގޭ: މައުރޫފް
ދައުލަތުގެ މުއައްސަސާތަކުގެ ނަޒާހަތްތެރިކަން ގެއްލި، ކޮރަޕްޝަނުގެ އަމަލުތައް ބަލާނެ ފަރާތެއް ނެތުމުގެ ކަންބޮޑުވުން ކެންދޫ ދާއިރާގެ މެމްބަރު މައުރޫފް ޒާކިރު ފާޅުކުރައްވައިފި. ސަރުކާރު ހިންގާ ޕާޓީގެ ޖަގަހަތައް ހެދުމަށް ދައުލަތުގެ ކުންފުނިތަކުގެ މުވައްޒަފުންނާއި ވަސީލަތްތައް ނަހަމަ ގޮތުގައި ބޭނުންކުރަމުންދާ ކަމަށް އޭނާ ތުހުމަތުކުރެއްވި.
ކެންދޫ ދާއިރާގެ މެމްބަރު މައުރޫފް ޒާކިރު ރާއްޖެ ޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަނީ. | ރާއްޖެ އެމްވީ
މެމްބަރުންނާއި ކުންފުނިތަކުގެ ވެރިންނަށް ވެސް ރައީސް ޑރ.މުހައްމަދު މުއިއްޒު އަށް ކަޓު ނުދީ ވިޔަފާރި އެއް ވެސް ނުހިންގޭ ކަމަށް ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެ އެވެ.
އޭނާ އެފަދައިން ވިދާޅުވީ ރާއްޖެ ޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ.
އޭނާ ވިދާޅުވީ ކޮރަޕްޝަނާއި ޚިޔާނާތުގެ ކަންކަން ގައުމުގައި ގިނަ ވަނީ އެކަންކަން ބަލާނެ ނަޒާހަތްތެރި މުއައްސަސާ އެއް ނެތުމުން ކަމަށެވެ. އެފަދަ ކަންކަން ނުބެލުމުން ކޮރަޕްޝަނަކީ ވަރިހަމަ އެއްޗަކަށް ހަދަމުންދާ ކަަމަށް މައުރޫފް ވިދާޅުވި އެވެ. މި ސަރުކާރުގެ އިސްމަޤާމުތަކުގައި ރައްޔިތުންގެ މަޖިލީހުގެ މެމްބަރުންގެ ޝަކުވާ އަކީ އެ ބޭފުޅުން ވެސް ވިޔަފާރި އެއް ކުރާ ނަމަ ރައީސް މުއިއްޒު އަށް ކަޓު ދޭން ޖެހުން ކަމަށް މައުރޫފް ވިދާޅުވި އެވެ.
މައުރޫފް ވިދާޅުވީ ބޮޑެތި މީހުން ކޮރަޕްޓް ވުމުން އޭގެ ދަށަށް ތިބި މީހުންގެ އަމަލުތައް ވެސް ހިނގާނީ އެ މޭރުމުން ކަމަށެވެ. މާލޭގައި ވެސް އަދި ރަށްރަށުގައި ވެސް ޕީއެންސީގެ ޖަގަހަ ހެދުމަށް ސަރުކާރުގެ މުވައްޒަފުން ލައްވާ މަސައްކަތް ކުރުވާ ކަމަށާއި އެކަންކަމަކީ ބަލައިގަންވޭނެ ކަންކަން ނޫން ކަމަށް މައުރޫފް ވިދާޅުވި އެވެ.
" އެ މަސައްކަތުގައި އުޅުނު މީހުން އެބަ ބުނޭ ތިމަންނަ މެން ކައިރީ އެބަ ބުނެ އޭ ކުލަ ހެދުމުގައި ދާށޭ އެތަނަށް. ކުންފުނިތަކުގެ މީހުން ލައްވާ މި މަސައްކަތް ކުރުވަނީ." އޭނާ ވިދާޅުވި އެވެ.
ސަރުކާރުގެ ހާލަތު ގޯހުން ގޯހަށް ގޮސް ސަރުކާރު ކުންފުނިތަކާއި މިނިވަން މުއައްސަސާތައް ޕީއެންސީގެ ގޮފިތަކަށް ބަދަލުވެފައިވާ ކަމަށް މައުރޫފް ވިދާޅުވި އެވެ. ޑިމޮކްރެސީގެ ކުރިން ރާއްޖެ އޮތް ހާލަތަށް މިހާރު ރާއްޖެ ވެއްޓިފައި ވާ ކަމަށާއި ރައްޔިތުންގެ ބާރު ގެއްލިފައިވާ ކަމަށް އޭނާ ވިދާޅުވި އެވެ.
މައުރޫފް މިހެން ވިދާޅުވެފައިވާ އިރު ލ.އިސްދޫ ވޭސްޓު މެނޭޖުމަންޓު ސެންޓަރ އަޅަން ވެމްކޯއިން ގެނެސްފައިވާ ތަކެތި ބޭނުންކޮށްގެން އިސްދޫ އަމިއްލަ މީހެއްގެ ގޯތީގަ ސަރުކާރުގެ ކުންފުނި ތަކުގެ މުވައްޒަފުން ނެރެގެން ރެޔާ ދުވާލު ބޮޑު ހޯލެއް ރާނާ ހިޔާ ކުރަމުންދާ ކަން ދާދިފަހުން ވަނީ ހާމަވެފަ އެވެ. މީގެ އިތުރުން މާލޭގެ ޕީއެންސީ ޖަގަހަ އިމާރާތްކުރުމުގައި ވެސް ސަރުކާރު ކުންފުނިތަކުގެ މުވައްޒަފުން ބައިވެރިވާ މަންޒަރު ފެންނަ ފޮޓޯ އާއި ވީޑިއޯ ވަނީ ދައުރުވެފަ އެވެ.
