ނަވީން, ފުލުހުންގެ މުއައްސަސާއިން ރިޓަޔަރ ކުރައްވައިފި
ފުލުހުންގެ ޚިދުމަތުގައި 32 އަހަރު ހޭދަކުރެއްވުމަށްފަހު، ކޮމިޝަނަރ އޮފް ޕޮލިސް އިސްމާޢީލް ނަވީން ރިޓަޔަރ ކުރެއްވިކަން މިއަދު ވަނީ ހާމަކުރައްވާފައި. 1994 ވަނަ އަހަރުން ފެށިގެން ފުލުހުންގެ މުއައްސަސާގެ އެކި ދާއިރާތަކުގައި އިސް މަގާމުތަކެއް ފުރުއްވާފައިވާ ނަވީން މި ނިންމެވުން ނިންމެވީ ވަރަށް ގިނަ ކަންކަމަށް ވިސްނެވުމަށްފަހު ކަމަށް އޭނާ ވިދާޅުވި.
ކޮމިޝަނަރ އޮފް ޕޮލިސް އިސްމާޢީލް ނަވީން | ޕޮލިސް
މި ސަރުކާރުގެ ދެ ވަނަ ޕޮލިސް ކޮމިޝަނަރު އިސްމާއިލް ނަވީން, ފުލުހުންގެ މުއައްސަސާއިން ބުދަ ދުވަހު ރިޓަޔަރ ކުރައްވައިފި އެވެ.
ކޮމިޝަނަރ އޮފް ޕޮލިސްގެ މަގާމަށް އިސްމާޢީލް ނަވީން އައްޔަން ކުރެއްވީ 10 ޖޫން 2025 ގަ އެވެ.
ކޮމިޝަނަރުގެ މަގާމުން ރިޓަޔަރ ކުރައްވަން ނިންމަވާފައިވާކަން ލިޔުއްވައި ފުލުހުންގެ އެގްޒެކެޓިވް ވެރިންނަށް ނަވީން އާދިއްތަ ދުވަހު ފޮނުއްވި މެސެޖެއްގައި ވިދާޅުވީ ރިޓަޔަރ ކުރަން އެދި ހުށަހެޅުމަށް ނިންމާފައިވާ ކަމަށެވެ. އަދި ދުވަސްތަކެއް ވަންދެން ބޮލުތެރޭގައި އެ ވިސްނުން ގެންގުޅުމަށްފަހު މިއަދު މިކަން ކުރަން ނިންމީ ވަރަށް ގިނަ ކަންކަމަށް ވިސްނާ ފިކުރު ކުރުމަށްފަހުގައި ކަމަށް މެސެޖުގައި ވިދާޅުވެފައިވެ އެވެ.
ބުދަ ދުވަހު ސޯޝަލް މީޑިއާގައިކުރެއްވި ޕޯސްޓެއްގައި ނަވީން ވިދާޅުވެފައިވަނީ މި ފެށުނު ރަމަޟާން މަހާއެކު، އޭނާގެ ރިޓަޔަރމަންޓް ވެސް ފައްޓަވާފައިވާ ކަމަށެވެ. ނަވީން ރިޓަޔަރ ކުރެއްވީ ފުލުހުންގެ ހިދުމަތުގައި 32 އަހަރު އުޅުއްވުމަށްފަހު އެވެ.
ނަވީން ދިވެހި ފުލުހުންގެ ޚިދުމަތާ ގުޅިވަޑައިގަތީ 1994 ޖުލައި 7 ވަނަ ދުވަހުއެވެ. ފުލުހުންގެ ޚިދުމަތުގައި ހޭދަކުރެއްވި 32 އަހަރުގެ ތެރޭގައި ދިވެހި ފުލުހުންގެ ޚިދުމަތުގެ ތަފާތު އެކި ބަހާތަކުގައި މަސައްކަތް ކުރައްވާފައިވާފައިވެ އެވެ. އެގޮތުން އޮޕަރޭޝަނަލް ދާއިރާ، ތަހުގީގީ ދާއިރާ، އެޑްމިނިސްޓްރޭޓިވް އެންޑް ސަޕޯޓް ދާއިރާގެ އެކި ބަހަތާކުގެ ވެރިއެއްގެ ގޮތުގައި މަސައްކަތްޕުޅު ކުރައްވާފައިވެއެވެ. އަދި ޑެޕިއުޓީ ކޮމިޝަނަރު އޮފް ޕޮލިސްގެ މަގާމަށް އައްޔަންކުރެއްވުމާ ހަމަައަށް ހުންނެވީ ހެޑް އޮފް ކޯޕަރޭޓް ސަރވިސަސް ޑައިރެކްޓްރޭޓްގެ މަގާމުގަ އެވެ.
