"ރަމަޟާން މަހު ފަހު 10 އެއްގައި އިތުރުގަޑީގެ ފައިސާ ލިބޭ އުސޫލަށް ބަދަލު ގެންނަކަން އަންގަނީ އަނގަބަހުން، މެމޯ އެއް ނުދޭ"
ސަރުކާރުގެ ބައެއް ކުންފުނިތަކުން މުސާރަ އާއި އިނާޔަތްތައް ދިނުމުގައި އިހުމާލުވަމުންދާތީ މުވައްޒަފުންގެ ކަންބޮޑުވުން ވަނީ އިތުރުވެފަ. ޚާއްސަކޮށް ރޯދަ އިނާޔަތާއި މުސާރަ ދިނުން ލަސްވުމުގެ މައްސަލަތައް ފެންމަތިވަމުންދާއިރު، ބަޖެޓު ކަނޑައެޅިފައިވާ މިފަދަ ފައިސާ ދިނުމުގައި ލަސްވާ ސަބަބާމެދު ގިނަ ބަޔަކު ދަނީ ސުވާލު އުފައްދަމުން.
ސްޓެލްކޯ | ސްޓެލްކޯ
ސަރުކާރުގެ ބައެއް ކުންފުނިތަކުގައި ރަމަޟާން މަހު ފަހު 10އެއްގައި އިތުރު ވަގުތުގެ ފައިސާ ދޭ އުސޫލަށް ބަދަލު ގެނައި ނަމަވެސް އާއްމު އުސޫލާއި އެއްގޮތަށް އެކަން މެމޯ އިން ނާންގާ ކަމަށް ބުނެ ބައެއް މުވައްޒަފުން ކަންބޮޑުވުން ފާޅުކޮށްފި އެވެ.
މިގޮތަށް އަމަލުކުރަމުންދާ ތަންތަނުގެ ތެރޭގައި ސްޓެލްކޯ އާއި ސަރުކާރުގެ އެހެން ބައެއް ކުންފުނިތައް ހިމެނެ އެވެ. އެ ކުންފުނިތަކުން ދަނީ ބައެއް ސެކްޝަންތަކުގެ މުވައްޒަފުންނާއި ވަކި ވަކިން ބައްދަލުކޮށް އޯޓީ ލިބޭނީ އާއްމު އުސޫލުން ރޯދަ މަހު ވަޒީފާ އަދާކުރާ ވަގުތުގެ އިތުރުން ވަޒީފާ އަދާ ކުރާ ނަމަ އެކަނި ކަމަށް އަންގަމުންނެވެ. ނަމަވެސް އެކަމާއި ގުޅުން ހުރި ރަސްމީ ލިޔެކިޔުން ނުވަތަ މެމޯ ނުނެރޭތީ އެކަން ރަސްމީ ސިފަ އެއްގައި ކަމާއި ގުޅުން ހުރި ފަރާތްތަކުން ސަމާލުކަމަށް ވެސް ނުގެނެވޭ ކަމަށް އެ މުވައްޒަފުން ދަނީ ބުނަމުންނެވެ.
"ސަރުކާރު ބަންދު ނަމަ ސަރުކާރު ބަންދު ދުވަހު ލިބޭ ފައިސާ ލިބެން ވާނެ. އެ ދުވަސް އޮންނަންވާނީ ފުލް ޑޭ އޯޓީ ގޮތުގައި. ނުވަތަ އެއް ބަޔަކަށް ޗުއްޓީ ލިބިފައި އަނެއް ބަޔަކަށް ނުލިބި ފައިސާގެ އިނާޔަތް ވެސް ނެތުން އެއީ ބަލައިގަނެވޭ ކަމެއް ނޫން." މި ނޫހާއި ވާހަކަދެއްކި މުވައްޒަފަކު ކިޔާދިނެވެ.
ފަހަކަށް އައިސް ސަރުކާރު ބައެއް ކުންފުނިތަކުން ފައިސާގެ މުއާމަލާތުތައް ކުރުމުގައި ފަރުވާ ކުޑަ ވުމާއި ފައިސާ ދިނުން ލަސްވުމުގެ މައްސަލަތައް ދަނީ ފެންމަތިވަމުންނެވެ. އެގޮތުން ރަމަޟާން މަސް ފެށިގެން ދިޔައިރު ވެސް ވޭސްޓް މެނޭޖްމެންޓް ކޯޕަރޭޝަން (ވެމްކޯ) ގެ ބައެއް މުވައްޒަފުންނަށް ރޯދަ އިނާޔަތް ނުދީ އޮތުމަށްފަހު، އެ މައްސަލަ މީޑިއާތަކުގެ ސަމާލުކަމަށް އައުމުން އެ ފައިސާ ވަނީ ދީފަ އެވެ. އޭގެ ކުރިން ވެސް ވެމްކޯ އިން ބައެއް މުވައްޒަފުންނަށް މި ފެބްރުއަރީ މަހު މުސާރަ ދިނުން ވެސް ލަސްވިކަން ފާހަގަކުރެވިފައިވެ އެވެ.
މީގެ އިތުރުން ސިވިލް ސާވިސް އާއި ސަރުކާރުގެ ކުންފުނިތަކުގައި މަސައްކަތް ކުރާ މުވައްޒަފުންގެ ޕެންޝަން ފައިސާ ގަވައިދުން ޖަމާ ނުވާ މައްސަލަ ވެސް ވަނީ ފެންމަތިވެފަ އެވެ.
މިފަދަ ކަންކަމަކީ ސަރުކާރުގެ މުވައްޒަފުންނާއި ކުރިން ކުރިމަތިލާން ޖެހޭ ކަންތައްތަކެއް ނޫންކަން ފާހަގަކޮށް މުވައްޒަފުން ދަނީ ކަންބޮޑުވުން ފާޅުކުރަމުންނެވެ. ޚާއްސަކޮށް މުސާރަ އާއި އިނާޔަތުގެ ފައިސާ އަކީ ބަޖެޓް ކަނޑައެޅިފައިވާ ކަންކަމަށް ވާއިރު އެ ފައިސާ ލަސްވާ ސަބަބާއި މެދު މުވައްޒަފުން ސުވާލު އުފައްދަ އެވެ.
