އިބްރާހީމް އިމްތިޔާޒް ހޯދަން އިއުލާނު ކުރުމުން ފުލުހަށް ހާޒިރުވެއްޖެ، އޭނާގެ ހާލު ރަނގަޅު

އިބްރާހިމް އިމްތިޔާޒް ގެއްލިގެން ހޯދަމުންދާ ކަމަށް ފުލުހުން އިއުލާނު ކުރުމުން އޭނާ އަމިއްލައަށް ފުލުހަށް ހާޒިރުވެފައިވާ ކަމަށް ފުލުހުން ބުނެފި އެވެ. 

މީގެ ހަފުތާއެއް ކުރިން ގެއިން ނުކުމެގެން ދިޔަ ހ. ފެވަރިޓްވިލާ، އިބްރާހީމް އިމްތިޔާޒް އަލީ (30އ) ގެއްލިގެން ހޯދަން ފަށާފައިވާ ކަން ފުލުހުން ހާމަ ކޮށްފައިވަނީ ހުކުރު ދުވަހުގެ ރޭ 8:40 ގަ އެވެ.

ހުކުރު ދުވަހުގެ ރޭ ފުލުހުން ބުނެފައި ވަނީ  2026 ފެބްރުއަރީ 13 ވަނަ ދުވަހު މެންދުރު 12:00 އާއި 13:00 އާ ދެމެދުގެ ވަގުތެއްގައި އިބްރާހީމް އިމްތިޔާޒް އަލީ ގޭގައި އުޅެނިކޮށް އާއިލާގެ މެންބަރުންނަށް ފެނިފައިވާ ކަމަށެވެ. 

ނަމަވެސް އެ ދުވަހު ގެއިން ބޭރަށް ދިޔަ ފަހުން ހަބަރެއް ނުވެ ގެއްލިފައިވާ ކަމަށް 2026 ފެބްރުއަރީ 17 ވަނަ ދުވަހުގެ ހަވީރު 17:15 ހާއިރު އާއިލާ އިން ފުލުހުންނަށް ރިޕޯޓު ކޮށްފައިވާ ކަމަށެވެ.

މި މައްސަލަ ރިޕޯޓްކުރުމާ ގުޅިގެން ފުލުހުންގެ ކަމާގުޅުންހުރި ހުރިހާ ބަހާތަކަށް އެ މައުލޫމާތު ހިއްސާކޮށް އޭނާ ހޯދުމުގެ މަސައްކަތް ކުރަމުންދާ ކަމަށް ވެސް އޭރު ފުލުހުން ވަނީ ބުނެފަ އެވެ. 

އެކަމާ ގުޅިގެން ހޮނިހިރު ދުވަހުގެ ރޭ ފުލުހުން ބުނީ  ހޮނިހިރު ދުވަހުގެ ރޭ ގެ ވަގުތެއްގައި އިމްތިޔާޒް ފުލުހުންގެ އިދާރާއަށް ހާޒިރުވެފައިވާ ކަމަށެވެ. އަދި އޭނާ ގެ ހާލު ރަނގަޅު ކަމަށް ވެސް ފުލުހުން ވަނީ ބުނެފަ އެވެ.