ހަމާސް އިން ހަތިޔާރު ނުބަހައްޓައިފި ނަމަ އިޒްރޭލުން މުޅި ޣައްޒާ ހިފާނެ: ސްމޮޓްރިޗް

ފަލަސްތީނުގެ ހަމާސް ޖަމާއަތުން ހަތިޔާރު ބެހެއްޓުމަށް ވަރަށް އަވަހަށް ސުންގަޑިއެއް ކަނޑައަޅައި އަންގާނެ ކަމަށާއި، އެ ގޮތުން ހަތިޔާރު ނުބަހައްޓައިފި ނަމަ މުޅި ޣައްޒާ އިޒްރޭލުން ހިފާނެ ކަމަށް ކަމަށް އެގައުމުގެ ހަރުކަށި ފިކުރުގެ ފިނޭންސް މިނިސްޓަރު ބެޒަލެލް ސްމޮޓްރިޗް ހޯމަ ދުވަހު ބުނެފި އެވެ.

އިޒްރޭލުގެ ދައުލަތުގެ މީޑިއާ "ކާން" އަށް ދިން އިންޓަވިއުއެއްގައި ސްމޮޓްރިޗް ބުނީ، ކުރިއަށް އޮތް ދުވަސްތަކުގައި ހަމާސް އިން ހަތިޔާރު ބަހައްޓައި، ޣައްޒާއަކީ ހަތިޔާރު ނެތް ސަރަހައްދަކަށް ހެދުމަށް އެ ޖަމާއަތަށް ފަހުގެ އިންޒާރު ނުވަތަ "އަލްޓިމޭޓަމް" އެއް ދެވޭނެ ކަމަށް ލަފާކުރެވޭ ކަމަށެވެ.

އިޒްރޭލުގެ ބޮޑެތި އަސްކަރީ އޮޕަރޭޝަންތައް ފާސްކުރުމުގެ ޒިންމާ އޮންނަ ސެކިއުރިޓީ ކެބިނެޓްގެ މެންބަރެއްގެ ގޮތުގައިވެސް ހުރި ސްމޮޓްރިޗް ބުނީ، ހަމާސް އިން އެ އެންގުމަށް އަމަލުނުކޮށްފި ނަމަ، އިޒްރޭލުގެ އަސްކަރިއްޔާ (އައި.ޑީ.އެފް) އިން އަމިއްލައަށް އެކަން ކުރުމަށް ބައިނަލްއަގުވާމީ ގޮތުން ސަރުކާރަށް ގާނޫނީ ހުއްދަ ލިބި، އެމެރިކާގެ އެހީތެރިކަންވެސް ލިބޭނެ ކަމަށެވެ. އަދި މިކަމަށްޓަކައި އިޒްރޭލުގެ އަސްކަރިއްޔާއިން މިހާރުވެސް ތައްޔާރުވަމުންދާ ކަމަށާއި، ރޭވުންތައް އެކުލަވާލަމުންދާ ކަމަށް އޭނާ ހާމަ ކުރިއެވެ.

އިޒްރޭލާއި ހަމާސްއާ ދެމެދު ދެ އަހަރު ވަންދެން ކުރި ހަނގުރާމަ ހުއްޓާލުމަށް އެމެރިކާގެ މެދުވެރިވެގެން އެކުލަވާލި އެއްބަސްވުމުގެ ފުރަތަމަ މަރުހަލާގެ ދަށުން، އިޒްރޭލުގެ އަސްކަރިއްޔާ ވަނީ "ޔެލޯ ލައިން" ގެ ނަމުން ނަންދެވިފައިވާ ސަރަހައްދުގެ ފަހަތަށް ޖެހިފައެވެ. ނަމަވެސް، ޣައްޒާގެ ދެބައިކުޅަ އެއްބަޔަށްވުރެ ބޮޑު ސަރަހައްދެއް އަދިވެސް އޮތީ އިޒްރޭލުގެ ކޮންޓްރޯލްގެ ދަށުގައެވެ.

މިދިޔަ މަހު ރަސްމީކޮށް ފެށި ދެވަނަ މަރުހަލާގައި ރޭވިފައިވަނީ އިޒްރޭލުގެ އަސްކަރިއްޔާ ޣައްޒާއިން މަޑުމަޑުން ފޭބުމަށާއި ހަމާސްގެ ހަތިޔާރު އަތުލުމަށެވެ. ނަމަވެސް ހަމާސް އިން ވަނީ މިކަމާ ވަރަށް ބޮޑަށް ދެކޮޅު ހަދާފައެވެ.

ސްމޮޓްރިޗް ބުނީ، ހަމާސް އިން އަމިއްލައަށް އެ ޖަމާއަތް އުވާލައި ހަތިޔާރު ނުބަހައްޓައިފި ނަމަ، އިޒްރޭލުގެ އަސްކަރިއްޔާއިން ކަނޑައެޅިގެން ޣައްޒާއަށް ވަދެ އެ ސަރަހައްދު ހިފާނެ ކަމަށެވެ.

އަސްކަރިއްޔާއިން އެކަން ކުރާނީ ކިހިނެއްތޯ ސުވާލު ކުރުމުން އޭނާ ބުނީ، އެކަމަށްޓަކައި މިހާރުވެސް ދެތިން ގޮތެއް ބަލަމުންދާ ކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕް ހުށަހެޅުއްވި ސުލްހައިގެ މަޝްރޫއުގައި، "އިންޓަނޭޝަނަލް ސްޓެބިލައިޒޭޝަން ފޯސް" (އައި.އެސް.އެފް) ގެ ނަމުގައި 20،000 ސިފައިންގެ ސުލްހަ ބަލަހައްޓާ ފައުޖެއް އެކުލަވާލުމަށް ވަނީ ގޮވާލާފައެވެ. މި ފައުޖަށް ސިފައިން ފޮނުވުމަށް ބައެއް ގައުމުތަކުން މިހާރު ވަނީ އެއްބަސްވެފައެވެ.

ބޭރުގެ ސިފައިން ޣައްޒާގައި ތިބޭ ހާލަތެއްގައި، ހަމާސްއާ ދެކޮޅަށް އިޒްރޭލުގެ އަސްކަރިއްޔާއިން އޮޕަރޭޝަންތައް ކުރިއަށް ގެންދާނީ ކިހިނެއްތޯ ސުވާލު ކުރުމުން ސްމޮޓްރިޗް ބުނީ، އެފަދަ ހާލަތެއްގައި ބޭރުގެ ސިފައިން ވަރަށް އަވަހަށް އެ ސަރަހައްދުން ފޭބުމަށްފަހު އިޒްރޭލުގެ އަސްކަރިއްޔާއަށް ވަނުމުގެ ފުރުސަތު ދޭނެ ކަމަށެވެ. އަދި މިއީ އެމެރިކާއާ ގުޅިގެން ކަނޑައެޅިފައިވާ އުސޫލެއް ކަމަށްވެސް އޭނާ ބުންޏެވެ.

މީގެ އިތުރުން، އައި.އެސް.އެފްގެ ސިފައިން އެހާ އަވަހަށް ޣައްޒާއަށް ވަދެދާނެ ކަމަށް އަދި ގަބޫލުނުކުރާ ކަމަށްވެސް ސްމޮޓްރިޗް ބުންޏެވެ.