މޯދީ ބުދަ ދުވަހު އިޒްރޭލަށް ވަޑައިގަންނަވަނީ
އިންޑިއާގެ ބޮޑުވަޒީރު ނަރެންދުރަ މޯދީ އިޒްރޭލަށް ކުރައްވާ މި ދަތުރުފުޅަކީ ދެ ގައުމުގެ ދެމެދުގައި އޮތް އިގްތިސާދީ އަދި ސަލާމަތީ ގުޅުން އިތުރަށް ވަރުގަދަކުރުމަށް ކުރައްވާ ދަތުރުފުޅެއް. މި ދަތުރުފުޅާ ގުޅިގެން ބޮޑުވަޒީރު ނަތަންޔާހޫ ވިދާޅުވީ، މިއީ ދެ ގައުމަށް ހުރި ނުރައްކާތަކާ ދެކޮޅަށް މަސައްކަތްކުރުމަށް އުފައްދާ އާ އިއްތިހާދެއްގެ ފެށުން ކަމަށް. މޯދީ ވަނީ އިޒްރޭލާއެކު އޮތް ޒަމާންވީ އެކުވެރިކަމަށް އިންޑިއާއިން ވަރަށް ބޮޑަށް އިސްކަންދޭކަން ހާމަކުރައްވާފައި.
ޖެނުއަރީ 15، 2018 ގައި ނިއުދިއްލީގެ ހައިދަރުއާބާދު ހައުސްގައި ބޭއްވި ނޫސްވެރިންގެ ބައްދަލުވުމެއްގައި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވާހަކަދައްކަވަމުން ގެންދަވާއިރު، އަރިހުގައި އިންޑިއާގެ ބޮޑުވަޒީރު ނަރެންދުރަ މޯދީ (ކަނާތްފަރާތުގައި). | އޭއެފްޕީ
އިންޑިއާގެ ބޮޑުވަޒީރު ނަރެންދުރަ މޯދީ އަންނަ ބުދަ ދުވަހު އިޒްރޭލަށް ރަސްމީ ދަތުރުފުޅެއް ކުރައްވާނެ ކަމަށް އެ ގައުމުގެ ބޮޑުވަޒީރު ބެންޖަމިން ނަތަންޔާހޫ އިއުލާނު ކުރައްވައިފިއެވެ. ނަތަންޔާހޫ ވިދާޅުވީ މި ދަތުރުފުޅުގެ ސަބަބުން، އޭނާ ސިފަކުރެއްވި ގޮތުގައި "ހަރުކަށި" ދުޝްމަނުންނާ ދެކޮޅަށް މަސައްކަތް ކުރުމަށް އާ އިއްތިހާދެއް ގާއިމުކުރުމަށް މަގުފަހިވެގެންދާނެ ކަމަށެވެ.
އިޒްރޭލުގެ ވަޒީރުންގެ މަޖިލީހުގެ ބައްދަލުވުން ފެއްޓެވުމުގެ ގޮތުން އާދީއްތަ ދުވަހު ވާހަކަދައްކަވަމުން ނަތަންޔާހޫ ވިދާޅުވީ، އަންނަ ބުދަ ދުވަހު އިންޑިއާގެ ބޮޑުވަޒީރު ނަރެންދުރަ މޯދީ އެ ގައުމަށް ވަޑައިގަންނަވާނެ ކަމަށާއި، އެ ދަތުރުފުޅުގައި އިޒްރޭލުގެ ގާނޫނު ހަދާ މަޖިލިސް، ކްނެސެޓްގައި މޯދީ ތަގުރީރު ކުރައްވާނެ ކަމަށެވެ.
އިޒްރޭލުގެ ބޮޑުވަޒީރު ވަނީ ދެ ގައުމުގެ ދެމެދުގައި އޮތް ގުޅުން ބަދަހިވަމުންދާ ދިއުމަށް ވަރަށް ބޮޑަށް ތައުރީފު ކުރައްވާފައެވެ.
އިގްތިސާދީ، ސިޔާސީ އަދި ސަލާމަތީ ދާއިރާއިން އޮތް އެއްބާރުލުމަށް އަލިއަޅުއްވާލައްވަމުން ނަތަންޔާހޫ ވިދާޅުވީ، ދެ ގައުމުގެ ދެމެދުގައި އޮތް ގުޅުމުގެ ބަދަހިކަން އިތުރުވެފައިވާ ކަމަށާއި، ބޮޑުވަޒީރު މޯދީ ވަޑައިގަންނަވަނީ އެ ގުޅުން މިހާރަށްވުރެ ވެސް ވަރުގަދަ ކުރެއްވުމަށް ކަމަށެވެ.
ބޮޑުވަޒީރުގެ ހައިސިއްޔަތުން މޯދީ އެންމެ ފުރަތަމަ އިޒްރޭލަށް ވަޑައިގަތީ 2017 ވަނަ އަހަރުއެވެ. އޭގެ ފަހުން ޖެހިގެން އައި 2018 ވަނަ އަހަރު ނަތަންޔާހޫ ވަނީ އިންޑިއާއަށް ރަސްމީ ދަތުރުފުޅެއް ކުރައްވާފައެވެ.
ނަތަންޔާހޫ ވިދާޅުވި ގޮތުގައި އިޒްރޭލާއި އިންޑިއާގެ މި ގުޅުމަކީ، ދެ ގައުމުން ވެސް "ހަރުކަށި" ދުޝްމަނުންނާ ދެކޮޅަށް މަސައްކަތް ކުރުމަށް ސަރަހައްދީ ފެންވަރުގައި އުފައްދާ ފުޅާ އިއްތިހާދެއްގެ ބައެކެވެ.
އިޒްރޭލުގެ ލީޑަރު އިތުރަށް ވިދާޅުވީ، އޭނާގެ ތަސައްވުރަކީ މެދުއިރުމަތީގައި ނުވަތަ އެ ސަރަހައްދު ވަށައިގެން ހަ ފަރާތެއް ހިމެނޭ "ހެކްސަގަން" އިއްތިހާދެއްގެ ނިޒާމެއް ބިނާކުރުން ކަމަށެވެ.
އާދީއްތަ ދުވަހުގެ ރޭ މޯދީ ކުރެއްވި މީސްމީޑިއާ ޕޯސްޓެއްގައި ވިދާޅުވީ، އިޒްރޭލަށް ކުރައްވާ ދަތުރުފުޅުގައި ކުރިއަށްދާނެ މަޝްވަރާތަކަށް ވަރަށް ބޮޑަށް އިންތިޒާރު ކުރައްވާ ކަމަށެވެ.
މީސްމީޑިއާ މަންސަ "އެކްސް" ގައި ކުރެއްވި ޕޯސްޓުގައި މޯދީ ވިދާޅުވީ، އިތުބާރާއި، އައު އީޖާދުތަކާއި، ސުލްހަޔާއި ކުރިއެރުމަށް ދެ ގައުމުން ކުރާ މަސައްކަތުގެ މައްޗަށް ބިނާވެފައިވާ އިޒްރޭލާއި އިންޑިއާގެ ޒަމާންވީ އެކުވެރިކަމަށް އިންޑިއާއިން ވަރަށް ބޮޑަށް އިސްކަންދޭ ކަމަށެވެ.
މަސްދަރު: އޭއެފްޕީ
